ވ. ރަކީދޫ ކައުންސިލްގެ އިދާރީ މުވައްޒަފުންނާއި ދެ ކައުންސިލް މެންބަރަކު އިސްތިއުފާ ދިނުމުން ޚިދުމަތް ނުދެވޭ މައްސަލައަށް އިޝާރާތް ކުރައްވައި، އިގުތިސާދީ ފުރުސަތު އިތުރުވާ ކުދި އާބާދީތަކުގައި ކައުންސިލަށް އިދާރީ މުވައްޒަފުން ހޯދަން ދަތިވާ ކަމަށް ލޯކަލް ގަވަމެންޓް މިނިސްޓަރު އާދަމް ޝަރީފް އުމަރު މިއަދު ވިދާޅުވެއްޖެއެވެ. އާބާދީގެ ގޮތުން އެންމެ ކުޑަ އެއް ރަށް ކަމަށްވާ ރަކީދޫގައި ކައުންސިލުގެ އިދާރީ މުވައްޒަފުންނާއި ދެ ކައުންސިލް މެންބަރަކު އިސްތިއުފާ ދިނުމުން، ރައްޔިތުންނަށް ދޭންޖެހޭ ޚިދުމަތްތައް ނުލިބޭތީ، ރައްޔިތުން ނިކުމެ މިއަދު ވަނީ އެ ރަށުގެ ކައުންސިލް އިދާރާ ބަންދުކޮށްފައެވެ. https://sun.mv/218604 އެ މައްސަލައަށް އިޝާރާތް ކުރައްވައި އާދަމް ޝަރީފް އެކްސްގައި ކުރެއްވި ޕޯސްޓެއްގައި ވަނީ، ފަތުރުވެރިކަމާއި އެނޫންވެސް އިގުތިޞާދީ ފުރުޞަތުތައް ފަހިވެފައިވާ ކުދިކުދި އާބާދީތަކުގެ ކައުންސިލް އިދާރާތަކުގައި މަސައްކަތް ކުރާނެ އިދާރީ މުވައްޒަފުން ނުލިބުމުގެ މައްސަލަ އިތުރުވަމުން އަންނަ ކަމަށެވެ. އޭނާ ވިދާޅުވީ އެ މައްސަލަ ހައްލު ކުރުމަށް، ގުޅުންހުރި މުއައްސަސާތަކާއެކު މިހާރު މަސައްކަތް ކުރަމުން އަންނަ ކަމަށެވެ. https://x.com/adamshareefz/status/2028441103079559522 ރަކީދޫ ކައުންސިލުގެ ރައީސް ޢަބްދުالله ރަޝީދު މީގެ ކުރިން "ސަން"އަށް ވިދާޅުވީ، ކައުންސިލު އިދާރާގައި މަސައްކަތްކުރާ އިދާރީ މުވައްޒަފުން އިސްތިއުފާދިންތާ ހަފުތާއެއް ވެފައި ވާކަމަށެވެ. އެ މަގާމުތަކަށް މުވައްޒަފުން ހޯދުމުގެ މަސައްކަތް މިހާރު ކުރަމުން އަންނަ ކަމަށް އޭނާ ވިދާޅުވިއެވެ. އެގޮތުން މުވައްޒަފުން ބޭނުންވާކަން ސިވިލް ސާވިސް ކޮމިޝަން (ސީއެސްސީ)އަށާއި ކައުންސިލުތަކުގެ ބެލެނިވެރި އިދާރާ ލޯކަލް ގަވަމަންޓް އޮތޯރިޓީ (އެލްޖީއޭ)އަށްވެސް އަންގާފައިވާނެ ކަމަށް ރަޝީދު ވަނީ ވިދާޅުވެފައެވެ. ނަމަވެސް ކައުންސިލްތަކުގެ ދައުރު ނިމެން އަހަރެއް ވުމުން، އެލްޖީއޭއާއި ފިނޭންސް މިނިސްޓްރީގެ ހުއްދަލިބިގެން ނޫނީ ކައުންސިލުތަކަށް މުވައްޒަފުން ނުނެގޭ ގޮތަށް ލާމަރުކަޒީ ގާނޫނަށް ގެނައި ބަދަލުގެ ސަބަބުން އިދާރީ މުވައްޒަފުން ނެގުން އޮތީ ހުއްޓިފައިކަން އޭނާ ފާހަގަކުރެއްވިއެވެ. އަދި ސީއެސްސީން ވެސް، އެލްޖީއޭއިން ވެސް އެ ހުއްދަ ނުލިބޭ ކަމަށް، ޢަބްދުالله ވިދާޅުވިއެވެ.