އީރާނުން ގަލްފުގެ ގައުމުތަކަށް ދެމުންދާ ރައްދު ހަމަލާތަކާ ގުޅިގެން ދަތުރުތައް މެދުކަނޑާލުމަށް ފަހު، ލިމިޓްކޮށްގެން ފްލައިދުބާއީ އާއި އެމިރޭޓްސްގެ ދަތުރުތައް އަލުން މިއަދު ފަށައިފި އެވެ.
ވީ ކިހިނެއް؟ - އެމެރިކާ އާއި އިޒްރޭލުން އީނާރަށް މިދިޔަ ހޮނިހިރު ދުވަހު ދޭން ފެށި ވައިގެ ހަމަލާތަކާ ގުޅިގެން ރައްދުގައި އީރާނުން އަންނަނީ އެމެރިކާގެ އަސްކަރީ ބޭސްތައް ހުންނަ އެ ސަރަހައްދުގެ ހުރިހާ ގައުމަކަށް ހަމަލާތައް ދެމުންނެވެ.
އެގޮތުން ގަތަރާއި، ކުވެއިތާއި އޮމާން އާއި ޔޫއޭއީ އާއި އުރުދުންއަށް ވެސް އީރާނުން ވަނީ ވައިގެ ހަމަލާތަކެއް ދީފަ އެވެ. ރާއްޖެ އަންނަ އެމިރޭޓްސް، ފްލައިދުބާއީ، އިއްތިހާދު އަދި ގަތަރު އެއާވޭސްގެ އިތުރުން، ކުވައިތު އެއާވޭސް ފަދަ އެއާލައިންތަކުން ވަނީ ދަތުރުތައް މެދުކަނޑާލައިފަ އެވެ. އެއާ އެކު ގިނަ އަދަދެއްގެ ފަތުރުވެރިން ރާއްޖޭގައި ވެސް ނުފުރި އެބަ ތިއްބެވެ.
ތަފްސީލް - ފްލައިޓުތައް މަދުކޮށް، އެމިރޭޓްސް އާއި ފްލައިދުބާއީން މިއަދު ދަތުރުތައް ފެށި ނަމަވެސް، ފްލައިޓްތަކުގެ ހާލަތު ޔަގީންކޮށްފައި ނޫނީ އެއާޕޯޓަށް ނުދާން އިލްތިމާސްކުރި އެވެ. 
އިސްކަން ދޭނީ ކުރިޔާލައި ބުކިން ހަދާ ދަތުރުވެރިންނަށް ކަމަށާއި އަލުން ބުކިން ހަދާ ދަތުރުވެރިންނަށް ސީދާ އެއާލައިނުން ގުޅައި މައުލޫމާތު ހިއްސާކުރާނެ ކަމަށް ވެސް ބުންޏެވެ. 
އެނގުން މުހިންމު - އެއް ވަގުތެއްގައި ގިނަ ގައުމުތަކެއްގެ ވައިގެ ސަރަހައްދު ބަންދުކުރުމުގެ ސަބަބުން، އިރުމައްޗާއި ހުޅަނގުގެ ދަތުރުފަތުރަށް ބޮޑެތި ހުރަސްތަކެއް ކުރިމަތިވެ، މުޅި ސަރަހައްދުގެ ވައިގެ ދަތުރުފަތުރުގެ ނިޒާމަށް ވަނީ ބޮޑު ލޮޅުމެއް އަރައިފަ އެވެ.