ރާއްޖެއަކީ ވިޔަފާރިއާ ރައްޓެހި އަދި ހަރުދަނާ ގޮތެއްގައި އިންވެސްޓްމަންޓް ކުރެވޭނެ މާހައުލެއް އޮތް ގައުމެއް ކަމަށް، 'އައިލާ ސަސްޓެއިނަބަލް ޓައުންޝިޕް' މަޝްރޫއު ހިންގާ ކްރިސްޓަލް ހޯލްޑިންސް ޕްރައިވެޓް ލިމިޓެޑްގެ ސީއީއޯ ޕެޓާ ކާސްޓިކް މިއަދު ވިދާޅުވެއްޖެއެވެ. މިއަދު ވަނީ އެ މަޝްރޫއުގެ ބިންގާ އަޅައިފައެވެ. ރައީސް ޑރ. މުހައްމަދު މުއިއްޒާއި، އިކޮނޮމިކް މިނިސްޓަރު މުހައްމަދު ސައީދުގެ އިތުރުން ސަރުކާރުގެ އިސްވެރިން ވެސް ބައިވެރިވެވަޑައިގެންނެވި އެ ރަސްމިއްޔާތުގައި ވާހަކަދައްކަވަމުން ކާސްޓިކް ވިދާޅުވީ މި މަޝްރޫއަކީ ރައީސް މުއިއްޒުގެ ޚާއްސަ ވިޝަންއެއް ކަމަށެވެ. މި މަޝްރޫއުން ވެސް އެނގި ހާމަވަނީ، އެމަނިކުފާނުގެ ވަރުގަދަ ލީޑަޝިޕް ކަމަށާއި، އެކަން ކުރުމަށް އެމަނިކުފާނާއި ރާއްޖޭގެ ސަރުކާރުން ދޭ އަހައްމިއްޔަތުކަން ކަމަށް ކާސްޓިކް ވިދާޅުވިއެވެ. އެ ވިޝަން، ހަގީގަތަކަށް ހަދައި މިއަދު ބިންގާ އެޅިގެން ދިޔައިރު، އެމަނިކުފާނު ދެއްވި އެއްބާރުލުން ފާހަގަކުރައްވައި ކާސްޓިކް ވަނީ އެމަނިކުފާނަށާއި، ސަރުކާރަށް ޝުކުރުއަދާކުރައްވައިފައެވެ. ސަސްޓެއިނަބަލް ޓައުންޝިޕް މަޝްރޫއުގެ ބިންގާ އެޅުމުގެ ރަސްމިއްޔާތުގައި ކްރިސްޓަލް ހޯލްޑިންސް ޕްރައިވެޓް ލިމިޓެޑްގެ ސީއީއޯ ޕެޓާ ކާސްޓިކް ވާހަކަދައްކަވަނީ -- ފޮޓޯ/ ރައީސް އޮފީސް އޭނާ ވިދާޅުވި ގޮތުގައި މި މަޝްރޫއަކީ ރާއްޖޭގެ ތާރީޚުގައި މިހާތަނަށް ޕްރައިވެޓް ސެކްޓާގައި ކުރެވޭ އިންވެސްޓްމަންޓްތަކުގެ ތެރެއިން އެންމެ ބޮޑު އިންވެސްޓްމަންޓަށް ވާނެއެވެ. އެގޮތުން ގާތްގަނޑަކަށް 800 މިލިއަން ޑޮލަރު އެ މަޝްރޫއަށް އިންވެސްޓް ކުރާނެކަން އޭނާ ފާހަގަކުރެއްވިއެވެ. ބޭރު އިންވެސްޓަރެއްގެ ހައިސިއްޔަތުން އަޅުގަނޑު ދަންނަވާލަން ބޭނުންވަނީ، ރާއްޖެއަކީ ވިޔަފާރިއާ ރައްޓެހި އަދި ހަރުދަނާ އިންވެސްޓްމަންޓް މާހައުލެއް އޮތް ގައުމެއްކަން. އުންމީދުކުރަނީ މި އިންވެސްތްމަންޓާއެކު މިއީ ކުރިއަށް އޮތް ތަނަށް އެޅިގެން ދާނެ މުހިންމު ތަރައްގީގެ ފިޔަވަޅެއް ކަމަށް، ކްރިސްޓަލް ހޯލްޑިންސް ޕްރައިވެޓް ލިމިޓެޑްގެ ސީއީއޯ ޕެޓާ ކާސްޓިކް ކާސްޓިކް ވިދާޅުވި ގޮތުގައި އަމާޒަކީ ހަމައެކަނި ފާހަގަކޮށްލެވޭ މަންޒިލެއް ރާއްޖޭގައި ބިނާކުރުން ނޫން ކަމަށެވެ. އަދި އަމާޒަކީ ރާއްޖޭގެ ތާރީޚަށް މުހިންމު ދައުރެއް އަދާކުރުން ކަމަށް އޭނާ ވިދާޅުވިއެވެ. އޭނާ ވިދާޅުވި ގޮތުގައި އެ މަޝްރޫއު 2028 އަށް ނިންމައި، ހުޅުވޭނެއެވެ. ސަސްޓެއިނަބަލް ޓައުންޝިޕް މަޝްރޫއުގެ ބިންގާ އެޅުން: އެއީ 790 މިލިޔަން ޑޮލަރުގެ މަޝްރޫއެއް -- ފޮޓޯ/ ރައީސް އޮފީސް ސަރުކާރުން ބުނި ގޮތުގައި، ސްޕެޝަލް އިކޮނޮމިކް ޒޯންގެ މި މަޝްރޫއަކީ، އިގުތިސާދީ ގޮތުން ރާއްޖެއަކީ ފުދުންތެރި ގައުމަކަށް ހެދުމަށް ސަރުކާރުގެ ތަސައްވުރުގެ ތެރެއިން ކުރިއަށްގެންދާ މުހިންމު މަޝްރޫއެކެވެ. މި މަޝްރޫއަކީ މުޅި އިންޑިއާ ކަނޑުގެ ސަރަހައްދުގައި ފާހަގަކޮށްލެވޭ އަދި، ދުނިޔޭގެ ފެންވަރުގައި ފާހަގަކުރެވޭނެ ދެމެހެއްޓެނިވި ތަރައްގީގެ ނަމޫނާއަކަށް ވާނެ ކަމަށް ސަރުކާރުން ވަނީ ބުނެފައެވެ. މި ޕްރޮޖެކްޓް ކުރިއަށްގެންދިއުމަށް ހަމަޖެހިފައި ވަނީ ވަކިވަކި ރަށްތަކެއްގެ ގޮތުގައި، ތިން ފަޅެއް ތަރައްގީކޮށްގެންނެވެ. އެއީ ނ. އަތޮޅުގެ ދިގުފަރު ފަޅާއި، ދެކުނުފަރު އަދި ކުރަމާދޫ ހިމެނޭ ސަރަހައްދުގައެވެ. ޕްރޮޖެކްޓް އައިލާގައި، ލަގްޒަރީ ވިލާތަކާއި ހައިއެންޑް ހޯމްސް ހިމެނޭހެން ތަރައްގީކުރާ ރިއަލްއެސްޓޭޓް ޑިވޮލޮޕްމެންޓް މަޝްރޫތައް ހިމެނެއެވެ. އަދި ބައިނަލްއަގްވާމީ ފެންވަރުގެ ސިއްޚީ ޚިދުމަތްދޭ މަރުކަޒެއް ގާއިމްކުރުމާއި، ބައިނަލްއަގްވާމީ ފެންވަރުގެ ހޮސްޕިޓާލިޓީ ތަމްރީނުދޭ މަރުކަޒެއް ގާއިމްކުރުމަށް ހަމަޖެހިފައިވާއިރު އަލްޓްރާ ލަގްޒަރީ ޓޫރިސްޓް ރިޒޯޓް ހޮޓެލް އަދި މެރީނާ ގާއިމްކުރުމަށް ވަނީ ހަމަޖެހިފައެވެ. ފާހަގަކޮށްލެވޭޭ ގޮތުގައި ޓައުންޝިޕް މަޝްރޫއަކީ ފަތުރުވެރިކަމަށާއި ދިގު މުއްދަތަކަށް ރާއްޖޭގައި ދިރިއުޅެން ބޭނުންވާ މީހުންނަށް ވެސް ޚާއްސަކޮށްގެން ކުރިއަށްގެންދާ މަސައްކަތެކެވެ.