ހިދުމަތުގެ ފެންވަރު ރަނގަޅުކުރުމުގެ މަސައްކަތެއް ކުރުމަށް، މާދަމާ ހެނދުނާއި، ހަވީރު، ހެންވޭރު އަދި ގަލޮޅުގެ ބައެއް ސަރަހައްދުތަކުން ކަރަންޓްގެ ޚިދުމަތް މެދުކެނޑޭނެކަމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ބުނެފި އެވެ.
ސްޓެލްކޯގެ އިސް އޮފިޝަލަކު ވީނިއުސް އަށް މައުލޫމާތު ދެއްވަމުން ވިދާޅުވީ އެކުންފުނީގެ މީޑިއަމް ވޯލްޓޭޖް ޑިސްޓްރިބިއުޝަން ނެޓްވޯކް އަޕްގްރޭޑް ކުރުމަށްޓަކައި މާދަމާ ހެނދުނު 6:30 އާއި އަދި ހަވީރު 4:00 ޖަހާއިރު ހެންވޭރު އަދި ގަލޮޅުގެ ބައެއް ސަރަހައްދުތަކުން ކުޑަ ވަގުތުކޮޅަކަށް ކަރަންޓްގެ ޚިދުމަތް މެނދުކެނޑިގެން ދާނެ ކަމަށެވެ.
އޭނާ ވިދާޅުވީ ކަރަންޓް ކެނޑުނު ނަމަވެސް ގިނަވެގެން ގަޑިއެއްހާ އިރު ތެރޭގައި ކަރަންޓް ލިބޭނެ ކަމަށެވެ. އަދި ހަވީރު 4:00 ޖަހާއިރު ކަރަންޓް ކަނޑާލާ ސަރަހައްދު ތަކުންވެސް ގަޑިއެއްހާ އިރަށް ކަރަންޓް ކެނޑިގެންދާނެ ކަމަށް ބެލެވޭ ކަމުގައިވެސް އޭނާ ވިދާޅުވި އެވެ.
ސްޓެލްކޯއިން ބުނީ ހިދުމަތުގެ ފެންވަރު ރަނގަޅުކުރުމަށް ކުރާ މަސައްކަތާއެކު ބައެއް ސަރަހައްދު ތަކުން ކަރަންޓް ކެނޑުމުން ދިމާވާ މައްސަލަތަކަށް އެކުންފުނިން މައާފަށް އެދޭ ކަމަށެވެ.