މާލޭގެ ގެއަކުން އިލެކްޓްރޯނިކް ސާމާނުތަކެއް ވަގަށް ނަގައިގެން ފިލަން މަސައްކަތް ކުރި މީހަކު ހައްޔަރުކޮށްފި އެވެ.
އެ މައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެސްފައި ވަނީ 30 އަހަރުގެ ދިވެހި ފިރިހެނެކެވެ.
އޭނާ ފުލުހުންގެ ބެލުމުގެ ދަށަށް ގެނެސްފައި ވަނީ މިއަދު ހެނދުނު 07:55 ހާއިރު މާފަންނުގައި ހުންނަ ގެއަކުން ލެޕްޓޮޕަކާއި ފޯނެއް ވަގަށް ނަގައިގެން ފިލަން މަސައްކަތް ކުރަނިކޮށް އެތަކެއްޗާއެކު އެވެ.
ފުލުހުންގެ ބެލުމުގެ ދަށަށް ގެނެސްފައިވާ މީހާއަކީ ތަފާތު އެކި ކަންކަމާއި ގުޅިގެން 80 ފަހަރު ހުއްޓުވާ ސުވާލުކޮށް 42 ފަހަރު ފުލުހުންގެ ބެލުމުގެ ދަށަށް ގެނެސް 13 ފަހަރު ހައްޔަރު ކޮށްފައިވާ މީހެކެވެ. މީގެ އިތުރުން އޭނާ އަކީ ވައްކަމާއި މަސްތުވާތަކެތީގެ ގިނަ އަދަދެއްގެ މައްސަލަތަކުގެ އިތުރުން މާރާމާރީ މައްސަލަތަކުގެ ރެކޯޑް އޮންނަ މީހެއް ކަމަށް ފުލުހުން ބުނެ އެވެ.
އެ މައްސަލަ ފުލުހުންގެ ޖެނެރަލް އިންވެސްޓިގޭޝަން ޑިޕާޓްމަންޓުން ތަހުގީގު ކުރަމުންދާ ކަމަށްވެސް ފުލުހުން ބުނެ އެވެ.