އެއް އަހަރު ވެސް ނުފުރޭ ތުއްތު ކުއްޖަކު ގޮވައިގެން ދިވެހިންތަކެއް ސީރިޔާއަށް ޖިހާދަށް ގޮސްފިއެވެ.
ރާއްޖޭގެ ބައެއް މީޑިޔާތަކުގައި ރިޕޯޓުކޮށްފައިވާ ގޮތުން ހަ ދިވެއްސަކު ވަނީ މިދިޔަ ހަފްތާގައި ތުރުކީ މަގުން ސީރިޔާއަށް ޖިހާދަށް ގޮސްފައެވެ. އޭގެ ތެރެއިން އެކަކު ދިޔައީ އޭނާގެ އެއް އަހަރު ނުވާ ތުއްތު ދަރިފުޅު ގޮވައިގެން ކަމަށާއި، އެހެން ދެ މީހަކު ދިޔައީ އެމީހުންގެ އަނބިން ވެސް ގޮވައިގެން ކަމަށް ރިޕޯޓު ކޮށްފައިވެއެވެ.
މަޢުލޫމާތު ފެތުރިފައިވާ ގޮތުން، އެ މީހުން ތުރުކީ މަގުން ސީރިޔާއަށް ގޮސްފައި ވަނީ އެކުގައި ދަތުރުކޮށްގެންނެވެ.
މިކަން މިހެން ހިނގާފައިވާ އިރު، ދާދި ފަހުން، އާއިލާއަށް ނޭނގި 18 އަހަރުން ދަށުގެ ދަރިފުޅު ގޮވައިގެން ބައްޕައަކު ސީރިޔާއަށް ޖިހާދަށް ދިޔަ މައްސަލައެއް ވެސް ވަނީ ފެންމަތިވެފައެވެ.
ސީރިޔާގައި ދިވެހިންގެ ތެރެއިން ގިނަ ބަޔަކު ދަނީ ހަނގުރާމަ ކުރަމުންނެވެ. އެމީހުން ހަނގުރާމަ ކުރަމުން ދަނީ، އަލްޤައިދާގެ ގޮތްޕެއް ކަމުގައިވާ ޖަބްހަތުލް ނުސްރާ ޖަމާޢަތާ ގުޅިގެން ކަން ވަނީ އެނގިފައެވެ.
ސީރިޔާގައި ދިވެހިންގެ ބަޔަކު ދިރިއުޅޭ އިރު، އެޤައުމުގެ ދާޚިލީ ހަނގުރާމައިގައި ބައިވެރިވެ، ބައެއް ދިވެހިން ވަނީ މަރުވެސް ވެފައެވެ.