އިޒްރޭލާއި އީރާނާ ދެމެދު ކުރި 12 ދުވަހުގެ ހަނގުރާމައަށް ފަހު އަދި ބޮޑެތި ގެއްލުންތަކެއް ލިބުމަށް ފަހު އީރާނުން ޗައިނާގެ ޗެންގްޑޫ ޖޭ-10ސީ މަލްޓިރޯލް ފައިޓާ ޖެޓް ގަތުމަށް ޗައިނާއާ އެކު މަޝްވަރާތައް ފަށައިފި އެވެ.
އީރާނުން މަސައްކަތް ކުރަނީ އެ ގައުމުގެ ވައިގެ އަސްކަރިއްޔާ ހަލުވިކަމާ އެކު ޒަމާނީ ކުރުމަށް މަސައްކަތް ކުރަމުން ކަމަށް ރިޕޯޓްތައް ބުނެ އެވެ.
ރަޝިއާގެ އެސްޔޫ-35އަށް ވުރެ ޗައިނާގެ ޖޭ-10ސީއަކީ ހަރަދުގެ ގޮތުން ވެސް ހެޔޮ މޮޑެލެކެވެ.
ޖޭ-10ސީ އަކީ ސިންގަލް އިންޖީނުގެ، މަލްޓިރޯލް ފައިޓާ ޖެޓެކެވެ. އެއީ ހުޅަނގުގެ އެފް-16ވީ ނުވަތަ ސްވިޑެންގެ ގްރިޕެން އީއަށް ވުރެ ވެސް ހަރަދު ކުޑަ އުޅަނދެކެވެ.
އެ އުޅަނދުގައި ހަތިޔާރާއި ސްޕެއާ ޕާޓްސް، ޓްރެއިނިން އަދި ވޮރެންޓީ ސަޕޯޓް ފަދަ އިތުރު ފީޗާތައް ހިމެނުމުން އެއް ބޯޓުގެ އަގު 60 މިލިއަން ޑޮލަރުން ގާތްގަނޑަކަށް 90 މިލިއަން ޑޮލަރަށް އަރާނެ ކަމަށް ލަފާ ކުރެވެ އެވެ.
އީރާނުން ވަނީ 2023 ވަނަ އަހަރު ރަޝިއާގެ 50 އެސްޔޫ-35 ފައިޓާ ޖެޓް ގަތުމުގެ އެއްބަސްވުމެއްގައި ސޮއިކޮށްފަ އެވެ. ނަމަވެސް ރަޝިއާއިން ޔޫކްރެއިންއާ ދެކޮޅަށް ކުރަމުންދާ ހަނގުރާމައިގެ ސަބަބުން މިހާތަނަށް ލިބުނީ ހަތަރު ބޯޓެވެ.
މިއީ ޖޭ-10ސީ ގަތުމާ ގުޅޭ ގޮތުން އީރާނުން ޗައިނާއާ އެކު މަޝްވަރާކުރި ފުރަތަމަ ފަހަރެއް ނޫނެވެ. އެގޮތުން، 2015 ވަނަ އަހަރު ކުރި މަޝްވަރާތަކުގެ ތެރޭގައި 150 މަތިންދާބޯޓު ހޯދުމުގެ ފުރުސަތު އޮތް ކަމަށް ބެލެވުނެވެ.
ނަމަވެސް އެ އެއްބަސްވުން ހުއްޓުނީ އދ.ގެ ހަތިޔާރު މަނާކުރުމާއި ފައިސާ ދެއްކުމާ މެދު ހިޔާލު ތަފާތުވުންތަކުގެ ސަބަބުންނެވެ. ޗައިނާއިން ނަގުދު ފައިސާ ދެއްކުމަށް އެދުނު އިރު، އީރާނުން ހުށަހެޅީ އޭގެ ބަދަލުގައި ތެލާއި ގޭހުން އަގު ދެއްކޭނެ ގޮތެއް ހޯދުމަށެވެ.
އެ ފިޔަވަޅުތައް އުވާލީ 2020 ވަނަ އަހަރެވެ. އޭގެ ފަހުން އެ ދަދަދު 36 ޖެޓުގެ އަދަދަށް ބަދަލު ކުރި އެވެ. ނަމަވެސް އެ މަޝްވަރާތައް ވެސް ހުއްޓުމަކަށް އައީ ފައިސާ ދެއްކުމުގައި ދިމާވި މައްސަލަތަކެއްގެ ސަބަބުންނެވެ.
ނަމަވެސް އެ މަޝްވަރާތައް މިހާރު ވަނީ އަލުން ފެށިފަ އެވެ. މި މަހުގެ 24 ވަނަ ދުވަހު އެމެރިކާ އިން ވަނީ އީރާނަށް އަޅާފައިވާ ދަތިކުރުމުގެ ފިޔަވަޅުތައް ރަސްމީކޮށް ނަގައިފަ އެވެ. އަދި އީރާނުގެ ތެޔޮ އެއްވެސް ބައިވެރިއަކާ ނުލައި ވިއްކުމުގެ ހުއްދަ ޗައިނާއަށް ދީފަ އެވެ.
އީރާން-އިޒްރޭލް ހަނގުރާމަ ފެށި އިރު އީރާނު އެއާފޯސްގައި 150 ވަރަކަށް މުސްކުޅި ފައިޓާ ޖެޓް ހުއްޓެވެ. އޭގެ ތެރޭގައި ގިނައީ 1979 ވަނަ އަހަރުގެ އިސްލާމީ އިންގިލާބުގެ ކުރިން ހޯދާފައިވާ އެމެރިކާގެ މޮޑެލްތަކުގެ ފައިޓާ ޖެޓެވެ. އޭގެ ތެރޭގައި އެފް-4 ފެންޓަމް 2، އެފް-5އީ، އެފް ޓައިގާ 2 އަދި އެފް-14އޭ ޓޮމްކެޓް ހިމެނެ އެވެ. އީރާނުން 18 ސޮވިއެޓް މިގް-29 މަރުކާގެ މަތިންދާބޯޓުތައް އޮޕަރޭޓް ކުރި ނަމަވެސް، ގިނަ ބޯޓުތަކަކީ އެކަށީގެންވާ މިންވަރަށް ބެލެހެއްޓިފައި ނެތް އެއްޗެހިތަކެއްގެ ސަބަބުން މުޅިން އޮޕަރޭޓް ނުކުރެވޭ އުޅަނދުތަކެކެވެ.
އިޒްރޭލާ އެކު ހިނގި ހަމަނުޖެހުންތަކާއި އެއަށް ފަހު އެމެރިކާއިން ދިން ވައިގެ ހަމަލާތަކުގައި އީރާނުގެ ކުރީގެ މަތިންދާބޯޓުތަކުގެ ފްލީޓްގެ %30 ހަލާކުވެފައިވާ ކަމަށް އީރާނުގެ ތަސްނީމް ނިއުސް އެޖެންސީން ބުނެ އެވެ.
މި މަހުގެ 23 ވަނަ ދުވަހު އީރާނުގެ ހާރިޖީ ވަޒީރު އައްބާސް އަރަގްޗީ ވަނީ މޮސްކޯއަށް ވަޑައިގެން ރަޝިޔާގެ ލީޑަރު ވްލަޑިމިއާ ޕޫޓިންއާ ވަނީ ބައްދަލުކުރައްވައިފަ އެވެ. އަރަގްޗީ ވިދާޅުވީ އީރާނާއި ރަޝިޔާއާ ދެމެދު މަޝްވަރާކުރީ ދެ ގައުމުގެ "ހިއްސާވާ ކަންބޮޑުވުންތަކާއި އެއް ވާދަވެރިން"ގެ ކަންބޮޑުވުންތަކާ ގުޅިގެން ކަމަށެވެ.
ރޮއިޓާސް އިން ރިޕޯޓްކުރި ގޮތުގައި، އީރާނުގެ އެންމެ މަތީ ލީޑަރު އަލީ ހާމަނާއީ، ފޮރިން މިނިސްޓަރު ރަޝިޔާއަށް ފޮނުވީ ޕުޓިންގެ ތާއީދަށް އެދިވަޑައިގެން ހާމަނާއިގެ ސިޓީއެއް ހިތްޕަވައިގެންނެވެ.