ޢިޓަލީ އާއި ސަޢޫދީ ޢަރަބިއްޔާ އިން ހަކަތައިގެ އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގެ ދަށުން ޔޫރަޕަށް ސަޢޫދީ އިން އުފައްދާ ހައިޑްރޮޖަން ފޯރުކޮށްދިނުމުގެ ފުރުސަތު ހުޅުވިގެންދާނެކަމަށް ޢިޓަލީގެ ހަކަތަ އާއި ތިމާވެށީގެ ވަޒީރު ޖިލްބަރޓޯ ޕިކެޓޯ ފްރެޓިން ވިދާޅުވިއެވެ.
5 އަހަރުގެ މުއްދަތަށް ސޮއިކުރެވުނު މި އެއްބަސްވުމުގައި ސޮއިކުރެވުނީ ރިޔާދުގައި ބޭއްވި ބައްދަލުވުމެއްގައެވެ. އެ ބައްދަލުވުމުގައި ޢިޓަލީގެ ވަޒީރު ޕިކެޓޯ އާއި ސަޢޫދީ އަރަބިއްޔާގެ ހަކަތައިގެ ވަޒީރު އަމީރު އަބްދުލްއަޒީޒް ބިން ސަލްމާން އަލް-ސަޢޫދު ބައިވެރިވެ ވަޑައިގެންނެވިއެވެ.
މި އެއްބަސްވުމުގެ ދަށުން އިއާދަކުރަނިވި ހަކަތަ، މީތޭން ބޭރުވުން މަދުކުރުމާއި، ކަރަންޓުގެ ވިއުގަ ގުޅުވާލުމާއި، އަދި ކާބަން ހިފެހެއްޓުމުގެ ނިޒާމުތަކާ ގުޅޭ ގޮތުން މަސައްކަތްކުރެވޭނެއެވެ.
ޢިޓަލީގެ ހަކަތައާއިބެހޭ ވަޒީރު ވިދާޅުވި ގޮތުގައި، އުތުރު ކަނޑުގެ ސަރަޙައްދާ އަޅާބަލާއިރު ސަޢޫދީ އަރަބިއްޔާ އިން އުފައްދާ ހައިޑްރޮޖަން އަދި އެމޯނިއާ ޔޫރަޕަށް ގެނައުމަށް ޢިޓަލީ އަކީ މާ ކައިރި، ވާދަވެރި އަދި ޑިމާންޑް ބޮޑު ޕޮއިންޓަކަށް ވެގެންދާނެއެވެ.
އިޓަލީ އާއި ސަޢޫދީ އަރަބިއްޔާ އާ ދެމެދު ވެވުނު މި އެއްބަސްވުމަކީ ޔޫރަޕުގެ ހަކަތައިގެ ސަލާމަތްތެރިކަން ކަށަވަރުކުރުމަށް އެޅުނު މުހިންމު ފިޔަވަޅެއްކަމަށް ރިޕޯޓްތައް ބުނެއެވެ.
ޔޫކްރެއިންގެ ހަނގުރާމައާ ގުޅިގެން ރަޝިޔާގެ ގޭހަށް ބަރޯސާވުން ކުޑަކުރުމަށް ޔޫރަޕުގެ ޤައުމުތަކުން މަސައްކަތްކުރަމުންދާއިރު، ސަޢޫދީ އަރަބިއްޔާ ފަދަ ހަކަތައިގެ ބާރުވެރި ޤައުމަކާއެކު ގުޅުން ބަދަހިކުރުމަކީ އިޓަލީގެ އިޤްތިޞާދީ ކުރިމަގަށް އެޅޭ ފިޔަވަޅެކެވެ. މީގެ އިތުރުން މި އެއްބަސްވުމަކީ ތިމާވެށްޓާ ރައްޓެހި ހަކަތައަށް ޔޫރަޕުން ދޭ އިސްކަން އިތުރަށް ހާމަކޮށްދޭ ކަމެކެވެ.