ބޮލީވުޑްގެ މަޝްހޫރު ތަރި ސައިފް އަލީ ހާނަށް ވަޅިން ހަމަލާދީ ޒަހަމްކޮށްލައިފި އެވެ.
އިންޑިއާގެ ނޫސްތަކުން ރިޕޯޓުކޮށްފައިވާ ގޮތުގައި ސައިފަށް ހަމަލާދިނީ ރޭ މެންދަމު އޭނާ ދިރިއުޅޭ ގެއަށް ވައްކަން ކުރަން ވަތް ވަގެކެވެ.
ބޭންޑްރާގައި ހުންނަ ސައިފްގެ ގޭގެ 11 ވަނަ ފަންގިފިލާގައި ނިދާފައި އޮއްވާ ހޭލެވުނީ އަޑުތަކެއް އިވިގެން ކަމަށާއި ވައްކަން ކުރަން ވަތް މީހާ އާ ސައިފް ކުރިމަތިލުމުން އެމީހާ ވަޅިން ހަމަލާދިނީ ކަމަށް އިންޑިއާގެ ނޫސްތަކުގައި ރިޕޯޓުކޮށްފައިވެ އެވެ.
އެމީހާ ވަނީ ސައިފްގެ ހަށިގަނޑުގެ ހަ ތަނަކަށް ވަޅިން ހަމަލާދީފަ އެވެ. ރޭ 2:30 އެހާކަންހާ އިރު ހިނގި އެ ހާދިސާގައި ލިބުނު ޒަހަމްތަކަށް ފަރުވާދިނުމަށް ސައިފް ހޮސްޕިޓަލަށް ގެންގޮސްފައިވަނީ ދަންވަރު 3:30 ކަންހާއިރު އެވެ.
އޭނާ އަށް ފަރުވާދެމުންދާ ލިލާވަތީ ހޮސްޕިޓަލުން ނެރުނު ބަޔާނެއްގައި ބުނީ، ސައިފުގެ މައިބަދަ އަށް ވެސް ހަމަލާ ދީފައިވާ ކަމަށެވެ. އަދި އޭނާގެ ކަރާއި އަތުގައި ވެސް ފުން ޒަހަމްތަކެއް ހުރި ކަމަށް އެ ބަޔާނުގައި ބުނެފައިވެ އެވެ.
ސައިފްގެ ހާލު ރަނގަޅު ކަމަށް ހޮސްޕިޓަލުން ބުނެފައިވާއިރު ސައިފްގެ ޓީމުން ބުނީ އޭނާ އޮތީ ހޮސްޕިޓަލުގައި ކަމަށާއި ސައިފްގެ ހާލަތު، ޑޮކްޓަރުން ގާތުން ބަލަމުން އަންނަ ކަމަށެވެ.
އެ ހާދިސާ އާ ގުޅިގެން ފުލުހުން ބުނީ، ސައިފުގެ ގެއަށް ބޭރުން މީހަކު ވަންނަތަން ސީސީޓީވީ ފޫޓޭޖުން ނުފެންނަ ކަމަށާއި ހަމަލާއާ ގުޅިގެން އޭނާގެ ގޭގައި މަސައްކަތް ކުރަން އުޅޭ މީހުންނަށް ޝައްކު ކުރެވޭ ކަމަށެވެ. އަދި އެމީހުންނާ ސުވާލު ކުރަމުންދާ ކަމަށް ވެސް ފުލުހުންނާ ހަވާލާދީ އިންޑިއާގެ ނޫސްތަކުން ރިޕޯޓުކޮށްފައިވެ އެވެ.