ކައިވެނި ނުކުރެވިގެން ހުންނަން ޖެހުނަސް، ކައިވެނިން އުފާވެރިކަން ނުލިބޭނަމަވެސް އަދި ފަސޭހައިން ކައިވެނި ރޫޅޭނަމަވެސް ވިސްނައިލުން އެންމެ މުހިންމު އެއްކަންތަކަށް ގިނަ ބައަކު މިއަދު ދަނީ ވަރަށް ބޮޑަށް އިހްމާލްވަމުންނެވެ.  
މި ބުނި 3 ޙާލަތުގައިވެސް ފުރަތަމަ ކަމަކަށް ވިސްނައިލުން މުހިންމު އެއް ކަމަކީ ތިމާއަށް އެއްވެސް މީހަކަށް ދެރައެއް ދެވިފައިވޭތޯއެވެ. އެއްވެސް މީހެއްގެ ހިތުގައި ޖެއްސުވިފައިވޭތޯއެވެ. މިބުނަނީ އެއްވެސް މީހަކާއި ލޯބީގެ ގޮތުން ގުޅި އޭނާގެ ހިތަށް އަނިޔާކުރެވިފައިވާ ކަމާއިމެދު ވިސްނައިލުމަށެވެ. ކައިވެނިކުރުމަށްފަހު ބައިވެރިޔާއަށް އަނިޔާވެރިވެ ބާކީކޮށްލެވިފައިވާ ކަމާއިމެދު ވިސްނައިލުމަށެވެ. މިހުންނަނީ އާދައިގެ ކަންކަމެއް ނޫނެވެ. އަނެކާއަށް ދެވޭނެ އެންމެ ބޮޑު އަނިޔާއެވެ.  
ބައެއް މީހުންނަށް ވިސްނެނީ ތިމާއަށް އެންމެ ފައިދާހުރި ނުވަތަ އެންމެ ބޮޑު އުފަލެއް ލިބޭނެ ގޮތަށް ކަންކަން ކުރުމުން ނިމުނީ ކަމަށެވެ. އެއީ ވަރަށް ނުބައި ވިސްނުމެކެވެ. ތިމާއަށް ފައިދާ ހުރި ގޮތަކަށް އެނބުރެން ބޭނުންވިނަމަވެސް އެކަންކުރަންޖެހޭނީ އަނެކާއަށް އެކަމުން އަނިޔާއެއް ނުލިބޭނެ ގޮތަށެވެ. އަނެކާއަށް އަނިޔާއަކަށް ނުވާނެ ގޮތަކަށެވެ.  
ލޯބިވާކަމަށް ބުނެ މީހެއްގެ ހިތް އަތުލަންވާނީ އޭނާ އާއި ކައިވެނިކުރާނެ ނަމައެވެ. އެކަމަށް އިޚްލާޞްތެރިކަމާއިއެކު ނިޔަތްގަނެގެންނެވެ. އަދި މީހަކާއި ކައިވެނިކުރަންވާނީ ޢުމުރަށް އެކުގައި ދިރިއުޅުމަށް އިޚްލާޞްތެރިކަމާއިއެކު ނިޔަތް ގަނެގެންނެވެ. ކުޅޭކުޅޭ ކަމެއްގެ ގޮތަކު ނޫނެވެ.  
ނޫންނަމަ އެކަން އެނބުރި އެމީހަކާއި ދިމާއަށް އަންނާނެއެވެ. ދިރިއުޅުމަށް ގެއްލުންދޭނެއެވެ. ހުރަސްތައް ކުރިމަތިކުރުވާނެއެވެ. އަތްމަތިދަތިކަމާއި ހިތްދަތިކަން ކުރިމަތިކުރުވާނެއެވެ. ވީމާ ފަށަމުން މިބުނި ފަދަ ޙާލަތެއް ތިމާއަށް ކުރިމަތިވެފައިވާނަމަ ތިމާއަށް އަނިޔާވެރިވެވުނު މީހާގެ ކިބައިން މާފަށް އެދި ހިތްޙަލާލުހޯދާށެވެ. އަދި ތައުބާވެ އިތުރަށް އެފަދަ ކަންކަން ނުކުޜާށެވެ!
 
- މަޢުލޫމާތު: މުފްތީ މެންކުގެ ދަރުސަކުން