ކުރީގެ ރައީސް އަބްދުﷲ ޔާމީންގެ ކެންޑިޑެސީ ބަލައިނުގަތް މައްސަލާގައި ޔާމީންގެ ފަރާތްޕުޅުން ސުޕްރީމް ކޯޓަށް ހުށަހަޅުއްވާފައިވާ މައްސަލައިގެ ފުރަތަމަ އަޑުއެހުން ފަށައިފިއެވެ.
ސުޕްރީމް ކޯޓުން އެ މައްސަލައިގެ އަޑުއެހުން ތާވަލުކުރީ މިއަދު މެންދުރުފަހު 3:00 އަށެވެ. އެހެންނަމަވެސް ސްޕްރީމް ކޯޓު ހިމެނޭ ސަރަޙައްދުން ކަރަންޓު ކެނޑުމުގެ ސަބަބުން އަޑުއެހުން 3:45 ލަސްކުރިއެވެ.
އެ ސަަރަހައްދުގައި ސަބްސްޓޭޝަނަކަށް މައްސަލައެއް ޖެހިގެން ކަރަންޓު ކެނޑުނު ނަމަވެސް މިހާރު އެ މައްސަލަ ހައްލުކޮށް ސުޕްރީމް ކޯޓަށް ކަރަންޓު ދީފައިވާ ކަމަށް ސްޓެލްކޯއިން މައުލޫމާތުދެއެވެ.
ކަރަންޓު މައްސަލަ ހައްލުވެ މައްސަލައިގެ އަޑުއެހުން ފަށާފައިވާއިރު މައްސަލައިގެ ޝަރީއަތް ފަށަފައިވަނީ 7 ފަނޑިޔާރުންގެ ބެންޗަކުންނެވެ. މި ބެންޗުގެ ރިޔާސަތުގައި އިންނެވީ އުއްތަމަ ފަނޑިޔާރު އަލްއުސްތާޛު އަޙްމަދު މުޢުތަޞިމް ޢަދުނާނެވެ.