ގައުމީ އެއާލައިން މޯލްޑިވިއަންގެ ފްލީޓަށް އިތުރުކުރާ އޭޓީއާރު މަރުކާގެ ފަސް ވަނަ ބޯޓު ރާއްޖެ އައުމަށް ދަތުރު ފަށައިފި އެވެ.
ވީ ކިހިނެއް؟ - މޯލްޑިވިއަނުން މިއަދު ފޭސްބުކްގައި ހިއްސާކުރި ޕޯސްޓެއްގައި ބުނީ އާ އޭޓީއާރު ފްރާންސްގެ ޓޫލޫޒްއިން ރާއްޖެއަށް ދަތުރު ފަށާފައިވާ ކަމަށެވެ. އެއީ އޭޓީއާރު 600-42 މަރުކާގެ ބޯޓެކެވެ.
އެ ދަތުރުގައި ގްރީސްގެ ހެރަކްލިއަން އާއި އިތުރު ދެ މަންޒިލަކަށް ޖައްސާނެ އެވެ. ނަމަވެސް ރާއްޖެއަށް އަންނާނެ ސީދާ ތާރީހެއް މޯލްޑިވިއަނުން ނުބުނެ އެވެ.
ތަފްސީލް - މޯލްޑިވިއަންގެ ފްލީޓުގައި މިހާރު ވެސް ހަތަރު އޭޓީއާރު ހިމެނެ އެވެ. އެއީ:
ޖެނުއަރީ 2023ގައި ގެނައި އޭޓީއާރު-72ގެ 2 ބޯޓު
އޭޕްރީލް 2023ގައި ގެނައި އޭޓީއާރު-42ގެ ބޯޓެއް
މެއި 2024ގައި ގެނައި އޭޓީއާރު-42ގެ ބޯޓެއް
އެނގުން މުހިންމު - އޭޓީއާރު ފްލީޓަކަށް ބަދަލުކުރަން މޯލްޑިވިއަނުން ނިންމީ، އެ އެއާލައިންގެ އުދުހުންތަކުގައި ބޭނުންކުރަމުން އަންނަ ޑޭޝް-8 މަރުކާގެ ބޯޓުތައް ގިނަ ދުވަސްވެ، މެއިންޓެއިން ކުރަން އުނދަގޫވުމުންނެވެ.
ޑޭޝް ބޯޓުތައް އުފެއްދުން ހުއްޓާލާފައި ވުމާ އެކު މަރާމާތަށް ބޭނުންވާ ސްޕެއާޕާޓްސް ހޯދުން ދަތިވެފައިވާ ކަމަށް މޯލްޑިވިއަން ހިންގާ އައިލެންޑް އޭވިއޭޝަންއިން މީގެ ކުރިން ވަނީ ބުނެފަ އެވެ.