ސޫރަތުއްނޫރުގެ 40 ވަނަ އާޔަތުގައި ﷲ މިސާލެއް ދެއްވަ އެވެ. މި މިސާލު ވެސް އަމާޒުކުރައްވާފައިވަނީ ކާފަރުންނަށެވެ. އިލްމުވެރިން ވިދާޅުވާ ގޮތުގައި މި މިސާލު އަމާޒުވާ މީހުންގެ ތެރޭގައި މަދީނާގައި އުޅުނު މުނާފިގުން ވެސް ހިމެނެ އެވެ. މި މިސާލުގެ މާނައިގައި ވެއެވެ: "ނުވަތަ ފުން ކަނޑެއްގައިވާ އަނދިރިތަކެއް ފަދަ އެވެ. އެ ކަނޑުގައި ފެތުރިފައިވަނީ، މަތިމައްޗަށް ހުންނަ ރާޅުތަކެވެ. އޭގެ މަތިން ވިލާތައްވެ އެވެ. މަތިމައްޗަށް ހުރި އަނދިރިތަކެވެ. އެމީހާގެ އަތް ނެރުނަސް، އެ ފެންނާން ވެސް ގާތްނުވެ އެވެ. ފަހެ، އެމީހަކަށް ﷲ އަލިކަމެއް ލައްވާފައިނުވާ މީހާ ދަންނާށެވެ! ފަހެ، އެމީހާޔަށް އެއްވެސް އަލިކަމެއް ނުވެ އެވެ."
މި މިސާލުގައި ﷲ ބަޔާންކުރައްވާ ކަނޑު އަޑީގެ އަނދިރިކަން އިންސާނާއަށް ދެނެގަނެވުނުތާ އަދި މިވީ 100 އަހަރެވެ. އެއީ ކީރިތި ޤުރްއާން ބާވައިލެއްވިތާ 1300 އަހަރު ފަހެވެ. މިއަދު އިންސާނުން އާންމުކޮށް ފީނާ އުޅެނީ ކަނޑުގެ އަޑިއަށް 30 މީޓަރަށެވެ. ކަނޑުގެ 200 މީޓަރު އަޑިން ނޫ ކުލަ އެއްކޮށް ނެތިދެ އެވެ. އެހިސާބުން އެއްވެސް ކުލައެއް ކަނޑު އަޑިން ނުފެނެ އެވެ. ކަނޑުގެ 1،000 މީޓަރު އަޑީގައި ވަނީ ކަނު އަނދިރިކަމެވެ. މީގެ މާނަޔަކީ ކަނޑުގެ އަޑިއަށް ދާވަރަކަށް އަނދިރިކަން ބޮޑުވުމެވެ. މި ގޮތަށް ކަނޑުގައިވާ އަނދިރިކަން ހުރީ ފަށަލަތަކަށްކަމަށް ސައެންސްގެ ހޯދުންތައް ބުނެ އެވެ. މި ހޯދުންތަކުން އެނގުނު ގޮތުގައި ރާޅަކީ ކަނޑުގެ މަތީގައި އެކަނި ހުންނަ އެއްޗެއް ނޫނެވެ. އެކަމަކު ކަނޑުގެ އެންމެ އަޑިއަށް ދާދެން ރާޅު ހުރެ އެވެ. ރާޅުގެ ކޮންމެ ފަށަލައެއްގެ މަތީގައި ވިލާތަކެއް ވެއެވެ.
ﷲ މިދެއްވާ މިސާލުން ސިފަކުރެވެނީ ވަރަށް ސާފު ތަސްވީރެކެވެ. އެއީ މި ދުނިޔޭގައި ﷲ ލެއްވި އެންމެ ވަރުގަދަ އަނދިރިކަން ހުރި ގޮތެވެ. އެވަރުގަދަ އަނދިރިކަމުގެ ކުރިމަތީގައި އިންސާނާ، ކީއްކުރަން އެހެން ދިރޭ އެއްޗަކަށް ވެސް، ފެންނާނެ އެއްޗެއް ނުވެއެވެ. މިއީ ހިތާމަޔާއި ބިރުވެރިކަމުގެ މަންޒަރެކެވެ. މިއީ މާޔޫސްކަމާއި ނާއުންމީދުގެ ތަސްވީރެކެވެ. މިފަދަ ހާލަތެއްގައި އިންސާނަކަށް ކުރެވޭނެ ކަމެއް އަދި ހެދޭނެ ގޮތެއް ނޯންނާނެ އެވެ.
މި މިސާލުން އަންގައިދެނީ ﷲއަށް އީމާންނުވެ އުޅޭ މީހާގެ ހާލަތެވެ. އޭނާ އުޅެމުން އެދަނީ ޣާފިލުކަމުގެ ދުނިޔެއެއްގައި ކަމެވެ. ކާފިރުކަމުގައި ހުއްޓަސް، އޭނާ ނަމާއި މަޝްހޫރުކަމާއި މޮޅު ހޯދުމަށްޓަކައި ދުނިޔޭގައި އެތައް ކަމެއް ކުރެ އެވެ. މީހުން އޭނާގެ ވާހަކަ އިންތިހާއަށް ދައްކަ އެވެ. ނޫސްތަކާއި ރޭޑިއޯތަކާއި ޓެލެވިޒަންތަކާއި މީސްމީޑިއާގެ ފަލަ ސުރުހީތަކަށް އެފަދަ މީހުން އަރަ އެވެ. އަދި އެމީހުން ހޯދާ ކާމިޔާބީތަކުގެ ވާހަކަ އެންމެން ދައްކަ އެވެ. އެކަމަކު ކާފިރުކަމުގައި ހުންނަ މީހާ އެހުންނަނީ ހަގީގީ އަލިކަމުން މަހުރޫމްވެފައި އެކަންޏެއް ނޫނެވެ. އެކަމަކު އޭނާ އެހުރީ އަނދިރިކަމުގެ އިންތިހާ ދަރަޖައިގެ އަނދިރިކަމުގަ އެވެ.
މިއިން އަންގައިދެނީ ތެދުމަގުން އެއްކިބާވެފައިވާ މީހާގެ ކިބައިގައި އެއްވެސް އަލިކަމެއް ނުވާކަމެވެ. އަލިކަން ގުޅިފައިވަނީ ތެދުމަގާ އެވެ. ތެދުމަގުން މަހުރޫމްވުމުން އެމީހާ އެހުރީ އަނދިރިކަމުގަ އެވެ. މި އާޔަތް ނިންމަވަމުން ﷲ ބަޔާންކުރައްވަނީ ﷲ އަލިކަން ނުދެއްވާ މީހަކަށް ފެންނާނެ އެއްވެސް ގޮތެއް ނޯންނާނެ ކަމަށެވެ. މާނަޔަކީ ރޫހީ ގޮތުން އެމީހާ ކަނު މީހަކަށް ވުމެވެ.
އަދުގެ ހާލަތަށް ނަޒަރު ހިންގާއިރު ފެންނަނީ ހިތާމައިގެ ތަސްވީރެކެވެ. ﷲއަށް އީމާންނުވާ މީހުންގެ ފަލްސަފާގައި އާޚިރަތެއް ނުވެ އެވެ. ހިސާބު ބެއްލެވުމަކީ އެމީހުން ދަންނަ ކަމެއް ނޫނެވެ. އެމީހުން ދެކޭގޮތުގައި އެމީހުން މަރުވުމަށް ފަހު ދާނީ ސުވަރުގެޔަށެވެ. އެހެންވެ މި ދުނިޔޭގައި އެމީހުންނަށް ފެންނަ ގޮތަކަށް އެމީހުން އުޅުނީމާ ނިމުނީ އެވެ. ހައްގު ގޮތާއި ރަނގަޅު ގޮތާއި ހެޔޮ ގޮތަކީ އެމީހުން އަމިއްލައަށް ކަނޑައަޅާ އެއްޗެކެވެ. އެހެންވެ އަންހެނުން އަންހެނުންނާ ކައިވެނިކޮށް ފިރިހެނުން ފިރިހެނުންނާ ކައިވެނިކުރެ އެވެ. އެއީ އެމީހުންނަށް ރަނގަޅު ހައްގު ކަންކަމެވެ.
ޒިނޭކުރުމަކީ އެމީހުން ދަންނަ ކަމެއް ނޫނެވެ. އަންހެނަކާ ފިރިހެނަކު ރުހިގަބޫލުވެގެން ކުރާ ކޮންމެ ކަމަކީ ރަނގަޅު ކަމެކެވެ. އެގޮތަށް އެމީހުން ކުރާ ކަމަކުން ދަރިއަކު ލިބިއްޖެ ނަމަ އެދަރިއަކު ވެސް ވަނީ ހަލާލު ރަނގަޅު ދަރިއަކަށެވެ. އެމީހުންނަށް ބަނގުރަލަކީ ވެސް ތޯހިރު އަދި މީރު ބުއިމެކެވެ. ވިޔަފާރި ބޭންކުތަކުން ނަގާ ރިބާއަކީ ވެސް ހުއްދަ ރަނގަޅު ކަންކަމެވެ. އެގޮތުގައި އެމީހުން ހޭދަކުރާ ހަޔާތަކީ ހަގީގަތުގައި އަނދިރިކަމުގެ ކަނު ހަޔާތެއްކަން ﷲ ޖައްސަވައި މި މިސާލުން ކަށަވަރުވެ އެވެ.