އެމެރިކާއާއި އިސްރާއީލުން އީރާނާ ދެކޮޅަށް ފަށާފައިވާ ހަނގުރާމައާ ގުޅިގެން، ރަޝިޔާގެ ތެލާއި ގޭހަށް އޮތް ޑިމާންޑު ވަރަށް ބޮޑަށް އިތުރުވެފައިވާކަމަށް ބޭރުގެ ރިޕޯޓްތައް ބުނެފިއެވެ. މިކަން ހާމަކޮށްފައި ވަނީ، ރަޝިޔާގެ ތެޔޮ ގަތުމަށް އިންޑިއާއަށް އެމެރިކާގެ ޓްރެޝަރީން 30 ދުވަހުގެ ޚާއްޞަ ހުއްދައެއް ދިންތާ އެއް ދުވަސް ފަހުންނެވެ. ހަތްވަނަ ދުވަހަކަށް ދެމިގެންގޮސްފައިވާ މި ހަނގުރާމައިގެ ސަބަބުން، ދުނިޔޭގެ ތެލާއި ގޭހުގެ 20 އިންސައްތަ ސަޕްލައިކުރާ މުހިންމު މަގު ކަމަށްވާ ހޮރްމޫޒު ކަނޑުއޮޅި ވަނީ ގާތްގަނޑަކަށް ބަންދުވެފައެވެ. މީގެ ސަބަބުން ދުނިޔޭގެ ބާޒާރުގައި ހަކަތަ ލިބުމުގެ ދަތިކަން ވަނީ ވަރަށް ބޮޑަށް ކުރިމަތިވެފައެވެ. ކްރެމްލިންގެ ތަރުޖަމާނު ޑިމިޓްރީ ޕެސްކޯފް ބޭރުގެ ނޫސްވެރިންނަށް މަޢުލޫމާތު ދެއްވަމުން ވިދާޅުވީ، އީރާނުގެ ހަނގުރާމައާ ގުޅިގެން ރަޝިޔާގެ ހަކަތައިގެ ވަސީލަތްތަކަށް އޮތް ޑިމާންޑު ވަރަށް ބޮޑަށް އިތުރުވަމުންދާ މަންޒަރު ފެންނަމުންދާ ކަމަށެވެ. އަދި ރަޝިޔާއަކީ ހޮޅި މެދުވެރިކޮށާއި ދިޔާކޮށް ފޯރުކޮށްދޭ ގޭހާއި ތެލުގެ އިތުބާރުހުރި ސަޕްލައިއަރެއްގެ ގޮތުގައި ދެމިއޮންނާނެ ކަމަށާއި، ވެފައިވާ އެއްބަސްވުންތަކާ އެއްގޮތަށް މެދުކެނޑުމެއްނެތި ސަޕްލައި ފޯރުކޮށްދިނުމުގެ ޤާބިލުކަން އެ ޤައުމުގައި އެބަހުރި ކަމަށް އޭނާ ވިދާޅުވިއެވެ. ނަމަވެސް އިންޑިއާއަށް ފޯރުކޮށްދޭނެ ތެލުގެ މިންވަރާ ގުޅޭގޮތުން ތަފްސީލެއް ދެއްވާފައެއް ނުވެއެވެ. މި ދަނޑިވަޅުގައި، އިންޓަނޭޝަނަލް އެނާޖީ އޭޖެންސީ (އައިއީއޭ) ގެ އެގްޒެކެޓިވް ޑިރެކްޓަރު ފާތިޙް ބިރޯލް ވަނީ ރަޝިޔާގެ ހަކަތައަށް އަލުން ބަރޯސާވުމަކީ އިޤުތިޞާދީ އަދި ސިޔާސީ ގޮތުން ހެދޭނެ ގޯހެއްކަމަށް ވިދާޅުވެ އިންޒާރުދެއްވާފައެވެ. ޔޫރަޕުން މީގެ ކުރިން ހެދި އެންމެ ބޮޑު އެއް ތާރީޚީ ގޯހަކީ ހަކަތަ ހޯދުމުގައި އެންމެ ޤައުމަކަށް ބަރޯސާވުންކަން އޭނާ ފާހަގަކުރެއްވިއެވެ. މީގެ އިތުރުން، ޤަތަރުގެ ހަކަތައާ ބެހޭ ވަޒީރު ސަޢުދު އަލް ކަޢުބީ ވަނީ، ހަނގުރާމަ ދިގުލައިގެންގޮސް ތެޔޮ ފީފާއެއްގެ އަގު 150 ޑޮލަރަށް އަރައިފިނަމަ، ކުރިއަށް އޮތް ހަފުތާތަކުގެ ތެރޭގައި ގަލްފުގެ ހުރިހާ ޤައުމަކުންވެސް ތެޔޮ އެކްސްޕޯޓުކުރުން ހުއްޓާލަން ޖެހިދާނެކަމުގެ ބިރު އޮތްކަމަށް ވިދާޅުވެފައެވެ. އީރާނުން ގަލްފުގެ ޤައުމުތަކަށް ދެމުންދާ ޙަމަލާތަކާ ގުޅިގެން ޤަތަރުން މިހާރުވެސް ވަނީ އެލްއެންޖީ އުފެއްދުން މެދުކަނޑާލާފައެވެ. ތަޖުރިބާކާރުން ވިދާޅުވި ގޮތުގައި ހަނގުރާމަ މިހާރުން މިހާރަށް ހުއްޓާލި ނަމަވެސް، އާންމު ޙާލަތަށް ރުޖޫޢަވުމަށް މަސްތަކެއް ނަގާނެއެވެ.