މާލޭގައި 100 އަހަރު ވެފައިވާ ތާރީޚީ މިސްކިތެއް ކަމަށްވާ ބަންޑާރަ މިސްކިތް ހުރި ތަނުގައި ޒަމާނީ ފެންވަރަށް ތަރައްގީކުރާ ބޮޑު މިސްކިތެއް އަޅަން ނިންމުމުން، އެކަން ހުއްޓާލައި، ތާރީޚު ހިމާޔަތްކުރަން އެދި ގިނަ ބަޔަކު ގޮވާލަން ފަށައިފިއެވެ. އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ހާމަކުރެއްވި ގޮތުގައި ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އަޅަން ބޭނުންވާ އެހީތެރިކަން، ދީލަތި ފަރާތަކުން ވަނީ ހަމަޖައްސައިދީފައެވެ. އެހެންކަމުން އެ ތަނުގައި މިސްކިތް އެޅުމުގެ މަސައްކަތް ފަށާނީ، ރޯދައިގެ ފަހުން ކަމަށާއި އެ މިސްކިތާއެކު، މާލޭގެ ހުރިހާ ބޮޑެތި މިސްކިތްތައް އާވާނެ ކަމަށް ޝަހީމް ވިދާޅުވިއެވެ. އެ ނިންމުން ހާމަކުރުމާއެކު ސޯޝަލް މީޑިއާގައި ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ. ޚާއްސަކޮށް ތާރީޚު ދިރާސާކުރައްވައި އަދި ތާރީޚީ ކަންކަން ހިމާޔަތްކުރަން ވަކާލާތުކުރައްވާ ގިނަ ބަޔަކު ވަނީ އެހާ ދުވަސްވީ މިސްކިތެއް ނެތިދާނެ ގޮތަށް އާ މިސްކިތެއް އަޅާތީ ކަންބޮޑުވުން ފާޅުކޮށްފައެވެ. https://x.com/yumna_maumoon/status/2029905563795288516 އެ މައްސަލައިގައި ކުރީގެ ހެރިޓޭޖް މިނިސްޓަރު ޔުމްނާ މައުމޫން ވިދާޅުވީ، ބަންޑާރަ މިސްކިތް ތަޅާލުމަކީ އެއްގޮތަކަށް ވެސް ކޮށްގެންވާނެ ކަމެއް ނޫން ކަމަށެވެ. އަދި އެއީ 98 އަހަރަށް ވުރެ ގިނަ ދުވަސް ވެފައިވާ މާލޭގެ މުހިންމު ދީނީ، ތާރީޚީ، ސަގާފީ ބިނާއެއް ކަމަށް ޔުމްނާ ވިދާޅުވިއެވެ. ރާއްޖޭގެ މިފަދަ ތާރީޚީ ބިނާތަކާއި ސަގާފީ ތަރިކަ ރައްކާކުރުމަށް، ސަގާފީ ތަރިކަ ގާނޫނެއް ހަދައި، ތަސްދީގުކުރެވިފައިވާނެކަން ވެސް އޭނާ ފާހަގަކުރެއްވިއެވެ. އެކަމާ ގުޅިގެން ކުރީގެ ޖަސްޓިސް މިނިސްޓަރު މުހައްމަދު މުއިއްޒު އަދުނާން ސޯޝަލް މީޑިއާގައި ހިއްސާކުރި ޕޯސްޓެއްގައި ވިދާޅުވީ ގާތްގަނޑަކަށް 100 އަހަރުވެފައިވާ އެ މިސްކިތަކީ މިހާރު މާލޭގައި ހުރި ތާރީޚީ ބިނާއެކޭ ބުނެވިދާނެ ހައެއްކަ ބިނާގެ ތެރޭގައި ހިމެނޭނެ މިސްކިތެއް ކަމަށެވެ. އަދި 1957ގެ ފަހުން ރާއްޖޭގެ ތާރީޚީ، ސަގާފީ ބިނާތައް ނައްތާލުމުގެ ނިޒާމީ ސިލްސިލާއެއް ހިންގަމުން ގެންދާހެން ހީވާކަމަށް އޭނާ ވިދާޅުވިއެވެ. ތާރީޚާއި ސަގާފަތާއި އާދަކާދަތައް ދަމަހައްޓާ ދިރުވުމަށް ބޮޑެތި އިދާރާތައް ހުރޭ. މިއީ [ކޮންމެހެން] ބޭނުންވާ ކަމެއް؟ ބަޔަކަށް މުސާރަ ލިބޭނަމަ ރަނގަޅުތާ. ފައިދާއެއް އެބަކުރޭތާ، މުހައްމަދު މުއިއްޒު އަދުނާން ރައްޔިތުންގެ ޚާއްސަ މަޖިލީހުގެ މެންބަރުކަން ވެސް ކުރެއްވި މުއިއްޒު އަދުނާން ވިދާޅުވި ގޮތުގައި މާލޭ ހުކުރު މިސްކިތަކީ ވެސް މިހާރު މާބޮޑަށް ބާވެ، މުސްކުޅިވެ، އާކުރަންޖެހިފައިވާ ތަނެކެވެ. އަދި މާލޭ އީދު މިސްކިތް ވެސް އަންނަ ރޯދަމަހަށް އާކޮށްލަން ފެންނަ ކަމަށް އޭނާ ވިދާޅުވިއެވެ. https://x.com/NaajihDidi/status/2029854455622160830 އޭގެ އިތުރުން ދިވެހި ތާރީޚު ދިރާސާކުރައްވާ ބޭފުޅެއް ކަމަށްވާ ނާޖިހު ދީދީ ވެސް ވިދާޅުވީ އެއީ އެއްގޮތަކަށް ވެސް ކޮށްގެންވާނެ ކަމެއް ނޫން ކަމަށެވެ. އަދި ދިވެހިރާއްޖޭގެ ޚާއްސަ ތާރީޚީ ކަމަކާ ގުޅުން ހުރި އަދި މިހާރު 98 އަހަރުވެފައިވާ މިފަދަ ތަނެއް ނައްތާލުމަކީ ތާރީޚަށް ދެވޭނެ އިއާދަނުކުރެވޭ ފަދަ ބޮޑު ގެއްލުމެއް ކަމަށް ވިދާޅުވެ އޭނާ ވަނީ ކަންބޮޑުވުން ފާޅުކުރައްވައިފައެވެ. އަދި އެއީ ދިވެހިރާއްޖޭގެ ސަގާފީ ތަރިކަ ރައްކާތެރިކުރުމަށް ހަދާފައިވާ ގާނޫނާ ވެސް ޚިލާފުކަމެއް ކަމަށް އޭނާ ވިދާޅުވިއެވެ. އެހެންކަމުން އެކަން ނުކުރުމަށް އިސްލާމިކް މިނިސްޓްރީއަށާއި، ތަރިކައާ ބެހޭ ވުޒާރާއަށް އޭނާ ވަނީ ގޮވާލައިފައެވެ. ޝަމްއޫން ޖަލީލު (ލޫކަސް ޖަލީލު) ވިދާޅުވީ މާލޭ ބަންޑާރަ މިސްކިތް ތަޅާލުން ހުއްޓުވަން ޖެހޭ ކަމަށެވެ. އަދި އެއީ މިހާރު މާލޭގައި ހުރި މަދު އާސާރު ތަރިކައިން ތަނެއް ކަމަށް ވެސް އޭނާ ވިދާޅުވިއެވެ. "ރާއްޖެއަށް އަތްގަދަކުރަން ޝީއިން ނާދޭ. އެމީހުންނަކީ ބުމްބާ މީހުން. އިންޑިއާގެ ބޮންބޭގެ މުސްލިމު ވިޔަފާރިވެރިން. ވޯރާއިން ނުވަތަ ބޯރާއިންނަކީ މިބައިމީހުން. ކޮލޮމްބޯގެ ޕެޓާގައި ވިޔަފާރި ހިންގަން އެތިބޭ އިސްލާމުންނަކީ ވެސް މިމީހުން. އެއީ ޝިޔައީ ދާއޫދީ ބައެއް. މަޒްހަބީ ބައެކޭ ކިޔުމަށްވުރެ ނަސްލެއް،" ލޫކަސް ވިދާޅުވިއެވެ. އޭނާ ވިދާޅުވީ ވޯރާއިންނަށް މާލޭގައި އެޅި މިސްކިތަކީ ރާއްޖެއަށް އަތްގަދަކުރަން ޝީއީން އެޅި ތަނެއް ކަމަށް ބުނުމަކީ ތާރީޚީ މިސްކިތާ މެދު ނަފްރަތު އުފެއްދުމެވެ. ރާއްޖެއަށް ވޯރާއިން އައުމަކީ ދީނީ ގޮތުން ހިނގި ކަމެއް ނޫން ކަމަށާއި، އެއީ އެ ދުވަސްވަރު ސިޔާސީ އަދި ވިޔަފާރީގެ ކަމެއް ކަމަށާއި، ވެރިކަމާ ބޮޑުންގެ މެދުގައި ހިނގި ކަމެއް ކަމަށް އޭނާ ވިދާޅުވިއެވެ. https://sun.mv/218785 މީގެ އިތުރުން ވެސް ގިނަ ބަޔަކު އެކަމާ މެދު ކަންބޮޑުވުން ފާޅުކޮށް، އެކަން ނުކުރުމަށް ސޯޝަލް މީޑިއާގައި ދަނީ ގޮވާލަމުންނެވެ. ބަންޑާރަ މިސްކިތުގެ އިތުރުން މަޖީދީމަގުގައި ހުންނަ ޒިކުރާ މިސްކިތް ހުރި ތަނުގައި ޒަމާނީ ބޮޑު މިސްކިތެއް އަޅާނެކަން މިނިސްޓަރު މިއަދު ވަނީ ހާމަކުރައްވާފައެވެ. އެ މިސްކިތް އަޅަން ބޭނުންވާ ދީލަތި އެހީވެސް ހަމަޖެހިފައިވާއިރު، ރޯދައިގެ 27 ވަނަ ވިލޭރޭގައި އެ މިސްކިތުގެ ބިންގާ އަޅައިދިނުމަށް އެދިފައިވާ ކަމަށް މިނިސްޓަރު ވިދާޅުވިއެވެ.