މެދުއިރުމަތީގައި ހިނގަމުންދާ ހަމަނުޖެހުންތަކުގެ ސަބަބުން، ގަލްފުގެ ގައުމުތަކުން ތެޔޮ އުފެއްދުން ކުރިއަށް އޮތް މަދު ދުވަސްކޮޅެއްގެ ތެރޭގައި މުޅިން ހުއްޓާލަން ޖެހިދާނެ ކަމަށް ގަތަރުގެ ހަކަތައާ ބެހޭ ވަޒީރު ސައުދު އަލް ކާބީ އިންޒާރު ދެއްވުމާ ގުޅިގެން، ދުނިޔޭގެ ބާޒާރުގައި ތެލުގެ އަގު މިއަދު އަނެއްކާވެސް ވަރަށް ބޮޑަށް އުފުލިއްޖެ އެވެ.
ދުނިޔޭގައި ބޭނުންކުރާ ތެލުގެ ގާތްގަނޑަކަށް %20 ސަޕްލައިކުރާ ހޯރްމޫޒް ކަނޑުއޮޅިން ތެޔޮ އުފުލުމަށް ބުރޫއަރާފާނެ ކަމުގެ ބިރު ބޮޑުވުމާ އެކު، ބްރެންޓް ކްރޫޑް ތެލުގެ އަގު މިއަދު %4.4 މައްޗަށް ގޮސް، ފީފާއެއްގެ އަގު މިހާރު ވަނީ 89.17 ޑޮލަރަށް އަރާފަ އެވެ.
ކާބީ ވިދާޅުވި ގޮތުގައި، މި ހަމަނުޖެހުންތައް މިގޮތަށް ކުރިއަށްދާ ނަމަ، މުޅި ދުނިޔޭގެ އިގްތިސާދަށް އޭގެ ނޭދެވޭ އަސަރު ފޯރާނެއެވެ.
ފިނޭންޝަލް ޓައިމްސްއަށް ދެއްވި އިންޓަވިއުއެއްގައި އޭނާ ވިދާޅުވީ، ހަނގުރާމަ ކުރިއަށް އޮތް ހަފުތާތަކުގައި ދެމިއޮވެއްޖެ ނަމަ، ދުނިޔޭގެ ޖީޑީޕީ ކުރިއެރުމަށް ހުރަސް އެޅި، ހަކަތައިގެ އަގުތައް އިންތިހާއަށް އުފުލިގެންދާނެ ކަމަށެވެ. އަދި ބައެއް ބާވަތްތަކުގެ މުދާ ލިބުމުގައި ދަތިތަކާ ކުރިމަތިވެ، ކާރުހާނާތަކުގެ ސަޕްލައި ޗެއިނަށް ބޮޑެތި ލޮޅުންތަކެއް އަރާނެ ކަމަށް ވެސް އޭނާ ފާހަގަކުރެއްވި އެވެ.
އެމެރިކާ، އިޒްރޭލް އަދި އީރާނާ ދެމެދު ހިނގަމުންދާ ހަނގުރާމައިގެ ސަބަބުން ހޯރްމޫޒް ކަނޑުއޮޅީގެ ދަތުރުފަތުރުތައް މިހާރު ވަނީ ގާތްގަނޑަކަށް ހުއްޓިފަ އެވެ. ކާބީ އިންޒާރު ދެއްވި ގޮތުގައި، ދަތުރުފަތުރު އަލުން ފެށޭނެ މަގެއް ނުފެނިއްޖެ ނަމަ، ކުރިއަށް އޮތް ދެތިން ހަފުތާއެއްގެ ތެރޭގައި ތެޔޮ ފީފާއެއްގެ އަގު 150 ޑޮލަރަށް އުފުލުމަކީ އެކަށީގެންވާ ކަމެކެވެ.
ގަތަރުގެ ދައުލަތުގެ ހަކަތަ ކުންފުނި، ގަތަރު އެނާޖީގެ ވަސީލަތްތަކަށް ދެވުނު ހަމަލާތަކާ ގުޅިގެން، އެ ކުންފުނިން މިހާރު ވަނީ ގުދުރަތީ ގޭސް (އެލްއެންޖީ) އުފެއްދުން ހުއްޓާލައި، ކޮންޓްރޯލުން ބޭރުގައިވާ ކަމެއް ދިމާވުމުން އެއްބަސްވުމާ އެއްގޮތަށް ތަކެތި ފޯރުކޮށްނުދެވޭނެކަން ވަނީ އިއުލާނުކޮށްފަ އެވެ.
ކާބީ ވިދާޅުވީ، ހަމަނުޖެހުންތައް މިހާރުން މިހާރަށް ނިމުމަކަށް އައި ކަމުގައިވިޔަސް، އުފެއްދުންތެރިކަން ކުރިން ހުރި އާންމު ހާލަތަކަށް ގެނައުމަށް ހަފުތާތަކެއް ނުވަތަ މަސްތަކެއް ނަގާފާނެ ކަމަށެވެ.