އެމްޑީޕީގެ ގައުމީ މަޖިލީހުގެ މެންބަރު، ހުޅުމާލެ އުތުރު ދާއިރާގެ ރައީސް އަދި ކުރިއަށް އޮތް ލޯކަލް ކައުންސިލް އިންތިޚާބުގައި ހުޅުމާލޭ އުތުރު ދާއިރާއަށް އެމްޑީޕީގެ ޓިކެޓްގައި ވާދަކުރާ ފާތިމަތު ޒަހިއްޔާ (ޒާޔާ) އަނެއްކާވެސް ފުލުހަށް ހާޒިރުކުރަން ޗިޓު ފޮނުވައިފިއެވެ. އެ ޗިޓުގައި ބުނެފައި ވަނީ، ޒާޔާ ފުލުހަށް ހާޒިރުކުރަނީ މިދިޔަ އަހަރުގެ އޮކްޓޫބަރު ހަތަރު ވަނަ ދުވަހު، ޒާޔާ ފާތިމަތުގެ ނަމުގައި ހިންގާ އެކައުންޓަކުން ފުލުހުންނަށް އިންޒާރު ދީފައިވާ މައްސަލައެއްގައި ކަމަށެވެ. އެއީ، އެ މައްސަލައިގެ ތުހުމަތުގައި ސުވާލުކޮށް ބަޔާން ނެގުމަށް ކަމަށް ޗިޓުގައި ވަނީ ބުނެފައެވެ. ޗިޓުގައި ޒާޔާ ހާޒިރުވުމަށް އަންގާފައި ވަނީ، މާދަމާ 14:00އަށް ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގަށެވެ. https://x.com/abdulla_shahid/status/2016149712970412456 މި މައްސަލައާ ގުޅިގެން އެމްޑީޕީގެ ރައީސް އަބްދުﷲ ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ، ޒާޔާ ފުލުހަށް ހާޒިރުވާން އަންގާފައި ވަނީ 'ސާބިތުނުހިފޭ' ތުހުމަތުތަކެއް ކުރުމަށްފަހުގައި ކަމަށެވެ. އޭގެއިތުރަށް، 'ސިޔާސީ ނުފޫޒުން' ޒާޔާ ފުލުހަށް ހާޒިރުކުރުމަށް ޗިޓު ފޮނުވީ، ކުރިއަށް އޮތް ލޯކަލް ކައުންސިލް އިންތިޚާބުގައި ވާދަކުރާ އެމްޑީޕީ ކެންޑިޑޭޓުންނަށް ބިރުދައްކައި، ނުފޫޒު ފޯރުވުމަށް ކަމަށް ޝާހިދު ތުހުމަތުކުރެއްވިއެވެ. އެ އިންތިޚާބުގައި ސަރުކާރު ބަލިވާނެ ކަމަށް ޝާހިދު ވަނީ ވިދާޅުވެފައެވެ. ފާހަގަކޮށްލެވޭ ގޮތުގައި ޒާޔާއަކީ، ސޯޝަލް މީޑިއާގައި ކުރި ޕޯސްޓާ ގުޅޭ މައްސަލައިގައި، ޒާޔާގެ ފޯނު މިދިޔަ އަހަރުގެ އޮކްޓޫބަރު ހަތެއްގައި ހިފެހެއްޓިއެވެ. އެއަށްފަހު ފޯނު ދޫކޮށްލީ އެ މަހު 12ގައެވެ. އޭރު ފޯނު ހިފަހައްޓާފައި ވަނިކޮށް، ސޯޝަލް މީޑިއާގައި ޒާޔާގެ ޒާތީ ވީޑިއޯތަކެއް ލީކުވި މައްސަލައެއް ވެސް ފެންމަތިވިއެވެ. އެ މައްސަލަ ކަމާ ބެހޭ އިދާރާތަކަށް ވަނީ ހުށަހަޅާފައެވެ. https://sun.mv/212651 މީގެ އިތުރުން، އޮކްޓޫބަރު މަހުގެ ތިންވަނަ ދުވަހު، އިދިކޮޅު އެމްޑީޕީން ބޭއްވި "ލޫޓުވައިފި" މުޒާހަރާއާ ގުޅުވައި ވެސް ޒާޔާ ފުލުހަށް ހާޒިރުކުރިއެވެ. އޭރު ހާޒިރުކުރީ، ގާނޫނާ ޚިލާފަށް މާލޭގެ އެކި ސަރަހައްދުގެ މަގުތަކަށް އެއްވެ އަޑުގަދަކޮށް މުޒާހަރާކޮށް، އާންމު ދަތުރުފަތުރަށް ހުރަސް އެޅުމާއި، ވިޔަފާރިތަކަށް ދަތިވާނެހެން ހަރަކާތްތެރިވެ، ފުލުހުންގެ ދައުރު އަދާކުރުމަށް ހުރަސް އެޅުމުގެ ތުހުމަތުގައެވެ. އަދި، ފުލުހުންގެ އަމުރަށް ނުކިޔަމަންތެރިވެ ވާޖިބަށް ހުރަސް އެޅިކަމަށް ތުހުމަތު ވެސް އޭރު ކުރިއެވެ.