ސިވިލް ސާވިސް ކޮމިޝަން (ސީއެސްސީ) ގެ ރައީސްކަމުގެ މަގާމުން މުހަންމަދު ފަހުމީ ހަސަން ރައްޔިތުންގެ މަޖިލީހުން ވަކިކުރީ ގާނޫނު އަސާސީއާ ހިލާފަށް ކަމަށް ސުޕްރީމް ކޯޓުން ކުރި ހުކުމާ ގުޅިގެން މިހާރުގެ އޮޑިޓަ ޖެނެރަލް ނިޔާޒް އިބްރާހީމްގެ ގާނޫނީ ހައިސިއްޔަތާ މެދު ސުވާލު އުފެއްދުމުގެ ފުރުސަތު ލިބޭ ކަމަށް ކުޅުދުއްފުށީ ދެކުނު ދާއިރާގެ މެމްބަރު މުހަންމަދު ނަޝީދު އިއްޔެ ވިދާޅުވެއްޖެ އެވެ. ފަހުމީއާ ގުޅޭ ގޮތުން ސުޕްރީމް ކޯޓުން ކުރި ހުކުމަށް އަލިއަޅުވާލައްވައި ނަޝީދު އޭނާގެ ބްލޮގްގައި ލިޔުއްވާފައި ވަނީ ކުރީގެ އޮޑިޓަ ޖެނެރަލް އިބްރާހިމް ނައީމް މަގާމުން ވަކިކުރި މައްސަލައަށް، ފަހުމީއާ ގުޅޭ ގޮތުން އައި ހުކުމުގެ އަސަރު "ފުރިހަމައަށް ކުރާނެ" ކަމަށެވެ. އަދި ދައުލަތުގެ ކްރެޑިޓް ކާޑެއް ބޭނުން ކުރައްވައިގެން ނައީމް އަމިއްލަ ހަރަދުތަކެއް ކުރެއްވި މައްސަލަ ބެލި ރައްޔިތުންގެ މަޖިލީހުގެ މާލިއްޔަތު ކޮމިޓީގެ ނިންމުން އަދި އެ ނިންމުމުގެ މައްޗަށް މަޖިލީހުގައި ނެގި ވޯޓު އޮތީ ސުވާލު މާކެއްގެ ތެރޭގައި ކަމަށް ވެސް ނަޝީދު ވިދާޅުވި އެވެ. "އަދި އެ ސުވާލު އެ ގޮތަށް އުފެދޭ ކަމަށްވާ ނަމަ، ނައީމް ވަކިކުރުމަށް ފަހު މަޖިލީހުން އޮޑިޓާ ޖެނެރަލްކަމުގެ މަގާމަށް އައްޔަންކުރި ނިޔާޒްގެ މަގާމުގެ ގާނޫނީ ހައިސިއްޔަތާ މެދު މިހާރު ސުވާލު އުފެއްދުމުގެ ފުރިހަމަ ފުރުސަތު ލިބިދޭކަން. އަދި އެއް އޮޑިޓަ ޖެނެރަލަކު މަގާމުން ވަކި ނުވަނީސް އެހެން އޮޑިޓަ ޖެނެރަލަކު އައްޔަން ނުކުރެވޭނެކަން،" ފަހުމީ މައްސަލާގައި ސުޕްރީމް ކޯޓުން ކުރި ހުކުމަށް ރިއާޔަތް ކުރައްވައި ނަޝީދު ފާހަގަކުރެއްވި ނުވަ ޕޮއިންޓުގެ ތެރެއިން އެއް ޕޮއިންޓުގައި ވިދާޅުވެފައިވެ އެވެ. ފަހުމީގެ މައްސަލަ ދިރާސާކުރި މިނިވަން މުއައްސަސާތަކާ ބެހޭ ކޮމިޓީގެ މުގައްރިރުގެ މަގާމު ވެސް ފުރުއްވާ ނަޝީދުގެ އެއް ކަންބޮޑުވުމަކީ، ފަހުމީއާ ގުޅޭ ގޮތުން މަޖިލީހަށް ހުށަހެޅި ޝަކުވާއަކީ ޖިނާއީ ކުށެއްގެ ތުހުމަތު ކަމަށް ސުޕްރީމް ކޯޓުގެ ހަ ފަނޑިޔާރުން ވިސްނުން ގެންގުޅުއްވާފައިވާތީ އެވެ. އެހެން ނަމަވެސް ނަޝީދު ވިދާޅުވީ ފަހުމީއާ ގުޅޭ ގޮތުން މަޖިލީހަށް ހުށަހަޅާފައި ވަނީ މަސައްކަތު މާހައުލެއްގައި ހުންނެވި އިސްވެރިއަކު އެ މާހައުލުގައި އުޅޭ އަންހެންކުއްޖެއްގެ ނުރުހުމުގައި އޭނާގެ ގައިގައި އަތްލުމާއި އަދި އެކަށީގެން ނުވާ ވާހަކައެއް ދެއްކެވުމުގެ ޝަކުވާ ކަމަށެވެ. އޭނާ ވިދާޅުވީ "މަސައްކަތު މާހައުލުގައި ޖިންސީ ފުރައްސާރަކުރުން" އެއީ ދުނިޔޭގެ ބައެއް ގައުމުތަކުގައި ވަކި މަފްހޫމެއްގެ ގޮތުގައި ބަލައިގަނެފައިވާ އަމަލެއް ކަމަށްވީ ނަމަވެސް، އަދި ވަކި ކުށެއްގެ ގޮތުގައި ބަލައިގަނެފައިވާ ކުށެއް ކަމުގައިވީ ނަމަވެސް، އެއީ ރާއްޖޭގެ ޖިނާއީ އަދުލުގެ ނިޒާމުގައި ޖިނާއީ ކުށެއްގެ ގޮތުގައި ދަންނަ އަމަލެއް ނޫން ކަމަށެވެ. "ދިވެހިރާއްޖޭގެ އެއްވެސް ގާނޫނެއްގައި މަސައްކަތު މާހައުލެއްގައި ހިނގާ ސެކްޝުއަލް ހެރެސްމަންޓުގެ އަމަލަކީ، ވަކި ޖިނާއީ ކުށެއް ކަމުގައި ކަނޑައަޅާފައި ނުވާކަން. އަދި މަސައްކަތު މާހައުލުގައި އަންހެން ކުއްޖަކާ ދެއްކުން އެކަށީގެންނުވާ ވާހަކައެއް އެ މާހައުލުގެ އިސްވެރިއަކަށް ހުރި ފިރިހެނަކު ދެއްކުމަކީ، ޖިނާއީ ކުށެއް ކަމުގައި ދިވެހިރާއްޖޭގެ އެއްވެސް ގާނޫނެއްގައި ކަނޑައަޅާފައި ނުވާކަން. އެހެން ކަމުން، އެ އަމަލަކީ ޖިނާއީ ކުށެއް ކަމުގައި ބަލައި، ޖިނާއީ އަދުލުގެ ނިޒާމުގެ ތެރެއިން އެއްވެސް ޖިނާއީ އިޖުރާއަތެއް އެ އަމަ؛ާ މެދު ހިންގޭނެ ގޮތެއް ނުވިސްނޭކަން. ފުލުހުންނަށް ތަހުގީގު ކުރުމުގެ ބާރު ލިބިދެނީ، ޖިނާއީ ކުށްކަމުގައިވާއިރު، އަދި ޕްރޮސިކިއުޓާ ޖެނެރަލް ދައުވާކުރާނަމަ، ދައުވާ ކުރާނީ ވެސް، ކޮންމެވެސް ޖިނާއީ ކުށެއްގެ ދައުވާ ކަމުގައިވާއިރު، "މަސައްކަތު މާހައުލުގައި ޖިންސީ ފުރައްސާރަކުރުން" މި އަމަލުގެ މައްޗަށް ޖިނާއީ ތަހުގީގެއްކޮށް، ޖިނާއީ ދައުވާއެއް އުފުލާނެ ގޮތެއް ރާއްޖޭގައި ނެތްކަން،" ނަޝީދު ލިޔުއްވާފައިވެ އެވެ. އޭނާ ވިދާޅުވީ އެފަދަ ހާލަތެއްގައި ހަމައެކަނި ކުރެވޭނެ ކަމަކީ، ސުލޫކީ މިންގަނޑާ ހިލާފު އެކަށީގެންވާ އަމަލެއް ކަމަށް ބަލައި، ޑިސިޕްލިނަރީ ނުވަތަ ތައުދީބީ ފިޔަވަޅެއް އެޅުން ކަމަށެވެ. ނަޝީދު ވިދާޅުވީ ފަހުމީ މައްސަލާގައި މިނިވަން މުއައްސަސާ ކޮމިޓީން ޑިއު ޕްރޮސެސް ނުވަތަ ފުރިހަމަ ކުރަންޖެހޭ އިޖުރާއަތްތައް ފުރިހަމަ ނުކުރާ ކަމަށް ބުނެފައިވާއިރު، ސިވިލް ސާވިސް ކޮމިޝަނަކީ އެހެން އެއްވެސް ފަރާތެއްގެ ދައުރެއް ނެތި، އެ ކޮމިޝަނަށް މެމްބަރުން އައްޔަންކުރުމާއި ޖަވާބުދާރީ ކުރުވުމާއި ވަކިކުރުމުގެ ބާރު އެ ކޮމިޝަންގެ ގާނޫނުގެ ދަށުން ހަމައެކަނި ރައްޔިތުންގެ މަޖިލީހަށް ލިބިދީފައިވާ ތަނެއް ކަމަށެވެ. އަދި އެ ކޮމިޝަންގެ މެމްބަރަކު މަގާމިުން ވަކިކުރެވޭނެ ތިން ހާލަތެއް ގާނޫނު އަސާސީގައި ބަޔާންކޮށްފައިވާ ކަމަށް ވެސް ނަޝީދު ވިދާޅުވި އެވެ. އެއް ކުށަކަށް ދެ އަދަބު ނުލިބުމުގެ އުސޫލު، ފަހުމީގެ ހުކުމުގައި މާނަކޮށްދީފައިވާ ގޮތުން ވެސް މުހިންމު ގާނޫނީ ސުވާލެއް އުފެދިފައިވާ ކަމަށް އޭނާ ވިދާޅުވި އެވެ. އަދި ސުލޫކީ ގަވާއިދާ ހިލާފު އަމަލުތަކުގައި މިހާތަނަށް ފުލުހުންނާއި ސިފައިންނާއި ސިވިލް ސާވިސްގެ މުވައްޒަފުންގެ އިތުރުން އެހެން މުއައްސަސާތަކުގެ މުވައްޒަފުން ވަޒީފާއިން ވަކިކޮށްފައިވާ ގޮތާ މެދު ވެސް މިހާރު ސުވާލު އުފެދިފައިވާ ކަމަށް ނަޝީދު ވިދާޅުވި އެވެ. އެހެންވެ ފަހުމީގެ ހުކުމް އައިސްފައި އޮތް ގޮތުން، އެ ހުރިހާ އެންމެންގެ ވަޒީފާ އަލުން ރުޖޫއަކޮށް ދިނުމަށް އެދުމުގެ ފުރުސަތު ހުޅުވިއްޖެ ކަމަށް ވެސް އޭނާ ވިދާޅުވި އެވެ. ނަޝީދު ވިދާޅުވީ އެއް ކުށަކަށް ދެ ފަހަރަށް އަދަބު ނުދިނުމުގެ އުސޫލު ކަމުގައި މިހާތަނަށް ވިސްނިފައި އޮތީ، ޖިނާއީ އެއް ދައުވާ ސާބިތުނުވެ ނިމުމުން ޖިނާއީ އަނެއް ދައުވާ ހަމަ އެ ކުށާ ގުޅިގެން ނުކުރެވުން ކަމަށެވެ. އެކަމަކު ސުޕްރީމް ކޯޓުގެ ހުކުމުގެ ސަބަބުން، މީހެއްގެ މައްޗަށް ތައުދީބީ ފިޔަވަޅާއި މަދަނީ ފިޔަވަޅާއި އިދާރީ ފިޔަވަޅު އެޅުމުގައި މީހަކު ވަޒީފާއިން ވަކިކުރުމުގެ ފުރުސަތު މުޅިން ނެތިއްޖެ ކަމަށެވެ. އަދި ސުޕްރީމް ކޯޓުގެ ހުކުމާއެކު އެ ފިޔަވަޅުތައް އެޅުމަކީ އަދަބެއް ކަމުގައި ބަލައިގެންފި ކަމަށް އޭނާ ވިދާޅުވި އެވެ. "ތައުދީބީ ފިޔަވަޅާއި މަދަނީ ފިޔަވަޅާއި އިދާރީ ފިޔަވަޅަކީ، ޖިނާއީ ކުށުގެ ދައުވާ ކުރުމާއި ޖިނާއީ އަދަބު ދިނުމާއި ތަފާތުކުރަންޖެހޭ ފިޔަވަޅުތަކެއް ކަމާއި އަދި އެ ތަފާތު ދަމަހައްޓަންޖެހޭ ފިޔަވަޅުތަކެއްކަން. މި ނޫން ގޮތަކަށް މިކަން މާނަ ކުރެވެން ފަށައިފިނަމަ، ފުލުހުންގެ ހިދުމަތުންނާއި ސިފައިންގެ ހިދުމަތުންނާއި ސިވިލް ސާވިސްގެ ހިދުމަތުން ނުވަތަ އެ ނޫން ވެސް އޮތޯރިޓީއަކުން ނުވަތަ މުއައްސަސާއަކުން ތައުދީބީ ފިޔަވަޅެއްގެ ގޮތުގައި މީހަކު ވަކިކުރުމަކީ، މުސްތަހިއްލު ކަމަކަށް ވެދާނެކަން. އަދި ވަޒީފާ އަދާކުރުމުގައި ކިތަންމެ ބޮޑު އަމަލެއް ހިންގި ނަމަވެސް އޭނާއާ މެދު ޖިނާއީ ކުށެއް ސާބިތުވެ ނުނިމެނީސް އެއްވެސް ފިޔަވަޅެއް ނޭޅޭނަމަ، ދެން ނުކުންނާނެ މައްސަލަތައް ހިތަށް ވެސް ނުގެނެވޭނެކަން،" ނަޝީދު ވިދާޅުވި އެވެ. އޭނާ ވިދާޅުވީ ސުޕްރީމް ކޯޓުގެ އަމާޒަކީ ވަކި މީހަކާ މެދު މަޖިލީހުން އަމަލުކުރި ގޮތް ގާނޫނު އަސާސީއާ ހިލާފު ކަމަށް ކަނޑައަޅައި ދިނުން ކަމުގައިވީ ނަމަވެސް ކޯޓުން ދައްކާފައިވާ ވާހަކަތަކުގެ ސަބަބުން މައްސަލަތައް ނުކުންނަ ކަމަށެވެ. އޭގެ ތެރޭގައި ސުޕްރީމް ކޯޓުން ކަނޑައެޅި ގާނޫނީ އުސޫލުތަކާއި ގާނޫނީ ފިގުހުގެ މިންގަނޑުތަކުގެ ސަބަބުން، ތައުދީބީ، އިދާރީ އަދި މަދަނީ ފިޔަވަޅު އެޅުމުގައި، މަސައްކަތުގެ މާހައުލުން މީހުން ވަކިރުމަށް އައީ "އަސާސީ އިންގިލާ ބަދަލެއް" ކަމަށް ނަޝީދު ވިދާޅުވި އެވެ. އޭނާ ދެކެވަޑައިގަންނަވާ ގޮތުގައި 2008 ގައި އަމަލުކުރަން ފެށި ގާނޫނު އަސާސީއަށް ފަހު، މިހާތަނަށް ވަކިކޮށްފައިވާ ގިނަ މީހުންނަށް މަގާމު އިޔާދަކޮށްދޭން ޖެހުމަކީ ވެސް ސުޕްރީމް ކޯޓުގެ ހުކުމުގެ ސަބަބުން ވަރަށް ގާތް ކަމެއް ކަމަށެވެ. ނަޝީދު ވިދާޅުވީ ފަހުމީގެ މައްސަލާގައި ސުޕްރީމް ކޯޓުން އައި ހުކުމާ ގުޅިގެން އިލްމީ ނަޒަރަކުން މުރާޖައާއެއް ކުރެއްވި ނަމަވެސް އެއީ މައްސަލައިގެ އެންމެ ފަހުގެ ނިންމުން ކަމަށް ގަބޫލުކުރައްވާ ކަމަށެވެ.