ރ. އުނގޫފާރުގައި ދިރިއުޅޭ އެ އަތޮޅު ކަނދޮޅުދޫ ރައްޔިތުންގެ ތެރެއިން މިހާތަނަށް ދުވާފަރަށް ބަދަލުނުވެ ތިބީ 577 މީހުން ކަމަށް އެމްއެންޑީއެފުން ބުނެފި އެވެ.
ސުނާމީ ކާރިސާގައި ކަނދޮޅުދޫން ހާލުގައި ޖެހުނު މީހުންނަށް އެހީތެރިވެދިނުމުގެ ގޮތުން ސަރުކާރުން ރ. ދުވާފަރުގައި އިމާރާތްކުރި ގެތަކަށް މީހުން ބަދަލު ކުރުމުގެ މަސައްކަތް އެމްއެންޑީއެފުން މިހާރު ވެސް ކުރިއަށް ގެންދާ ކަމަށް އެތަނުން ބުންޏެވެ. އެގޮތުން އުނގޫފާރުގައި އުޅޭ ކަނދޮޅުދޫގެ 2،040 މީހުންގެ ތެރެއިން މިހާތަނަށް 1،463 މީހުންނާއި މުދާ ދުވާފަރަށް ބަދަލުކޮށްފައިވާ ކަމަށް އެމްއެންޑީއެފުން ބުންޏެވެ.
އެމްއެންޑީއެފުން ބުނީ މިހާތަނަށް 2،658 މީހުންނާއި މުދާ އެ ރަށަށް ބަދަލުކޮށްފައިވާ ކަމަށެވެ. ސުނާމީގައި ރަށް ހަލާކުވުމުން ކަނދޮޅުދޫގެ ރައްޔިތުން ދިރިއުޅެމުން ދަނީ ރ. އަތޮޅުގެ އަލިފުއްޓާއި މީދު އާއި ހުޅުދުއްފާރާއި މަޑުއްވަރި އަދި އުނގޫފާރުގަ އެވެ. އޭގެ ތެރެއިން އެންމެ ގިނަ މީހުން ދިރިއުޅެމުންދާ އުނގޫފާރު ފިޔަވައި އެހެން ހުރިހާ ރަށެއްގައި ތިބި ކަނދޮޅުދޫ މީހުން ވަނީ ދުވާފަރަށް ބަދަލުކޮށްފަ އެވެ.
ގާތްގަނޑަކަށް 47 ހެކްޓަރު ބިން އޮންނަ ދުވާފަރުގައި ތަފާތު ހަ ޑިޒައިނަކަށް ހަދާފައި ހުރި 600 ގެ އާއި ޕްރީ ސްކޫލަކާއި ޕްރައިމަރީ ސްކޫލާއި ސެކަންޑަރީ ސްކޫލާއި ސިއްހީ މަރުކަޒަކާއި އޮފީސްތައް ހިންގާނެ އިމާރާތަކާއި ނަރުދަމާ އަދި ކަރަންޓްގެ ނިޒާމަށް 30 މިލިއަން ޑޮލަރަށް ވުރެ ބޮޑު ހޭދައެއް އިންޓަނޭޝަނަލް ފެޑެރޭޝަން އޮފް ރެޑް ކްރޮސް އެންޑް ރެޑް ކްރެސެންޓް ސޮސައިޓީން ކޮށްފައިވެ އެވެ.