ރައީސުލްޖުމްހޫރިއްޔާ ޑރ. މުޙައްމަދު ވަހީދާއި ޕީޕީއެމްގެ ރިޔާސީ ޕްރައިމަރީގައި ވާދަކުރައްވާ ނާކާމިޔާބުވެވަޑައިގެންނެވި އެޕާޓީގެ ކުރީގެ ނައިބު ރައީސް އުމަރު ނަސީރު މިރޭ ހިލާލީގޭގައި ބައްދަލުކުރައްވައިފިއެވެ.
އުމަރު އޭނާގެ ބޮޑީގާޑަކާއިއެކު ރައީސް ޑރ.ވަހީދު ދިރިއުޅުއްވާ ހިލާލީގެއަށް މިރޭ 10:45 އެހާއިރު ވަޑައިގެންނެވި މަންޒަރު ވީނިއުސްގެ ބައެއް ނޫސްވެރިންނަށް ވަނީ ފެނިފައެވެ.
އުމަރު ހިލާލީގޭގައި ދެ ގަޑިއިރެއްހާއިރު އިންނެވުމަށްފަހު 12:30 އެހާއިރު ހިލާލީގެއިން ނިކުމެވަޑައިގެން އެވަގުތު އެތަނުގައި ތިއްބެވި ބައެއް ނޫސްވެރިން ސުވާލު ދެންނެވުމުން އުމަރު ވިދާޅުވީ ހިލާލީގެއަށް ވަޑައިގެންނެވީ ރައީސް ޑރ.ވަހީދުގެ ދައުވަތަކަށް ފަރިއްކޮޅަކަށް ކަމަށެވެ.
އެހެން ވިދާޅުވުމަށްފަހު އިތުރު ތަފްސީލަކަށް ވަޑައިނުގެން އުމަރު ކާރުގައި ވަޑައިގެންނެވީއެވެ.
ކުރިއަށް އޮތް ރިޔާސީ އިންތިހާބުގައި ވާދަކުރައްވާނެ ކަމަށް އިއުލާނުކުރައްވާފައިވާ ރައީސް ޑރ. ވަހީދުއާ އުމަރު ނަސީރު މިރޭ ބައްދަލުކުރައްވާފައި މިވަނީ ޕީޕީއެމްގެ ލީޑާޝިޕާއި އޭނާއާއި މެދު ބޮޑެތި ކޯޅުންތަކެއް ހިގާ އުމަރުގެ ސުލޫކީ މައްސަލައެއް ޕީޕީއެމް އިން ބަލަން ފަށާފައިވަނިކޮށެވެ.