އެމެރިކާގެ ރައީސް ޑޮނަލްޑް ޓްރަމްޕްގެ މައްޗަށް ނެރެފައިވާ ޖިންސީ ގޯނާއާ ގުޅޭ އަބުރު ގެއްލުމުގެ ބަދަލު ދެއްކުމުގެ ޙުކުމެއް އެމެރިކާގެ އިސްތިއުނާފީ ކޯޓަކުން ދަމަހައްޓައިފިއެވެ.
މެންހެޓަންގެ ސެކަންޑް ސަރކިޓް ޔޫއެސް ކޯޓް އޮފް އެޕީލްސްއިން ހޯމަ ދުވަހު ނިންމީ، ލިޔުންތެރިޔާ އީ. ޖީން ކެރޯލްގެ އަބުރަށް ގެއްލުން ދިނުމުގެ ސަބަބުން ޖޫރީން ކަނޑައެޅި 83.3 މިލިއަން ޑޮލަރުގެ ބަދަލު ބާޠިލުކުރުމަށް ޓްރަމްޕް ހުށަހެޅި މައްސަލަ ބަލައިނުގަތުމަށެވެ.
މި ޙުކުމް ދަމަހައްޓާފައިވަނީ، 2019 ވަނަ އަހަރު ޓްރަމްޕް ކެރޯލް ރޭޕްކުރި ކަމުގެ ތުހުމަތު ދޮގުކުރުމުގެ ސަބަބުން އޭނާގެ އަބުރަށް ގެއްލުން ދިނުމާ ގުޅިގެންނެވެ. ޓްރަމްޕް ދެކެމުންދިޔައީ، ކެރޯލް ހުށަހެޅި މި މައްސަލައިން ރައީސްގެ ހައިސިއްޔަތުން އޭނާއަށް އިމްތިޔާޒު ލިބެންޖެހޭނެ ކަމަށެވެ. ނަމަވެސް، އިސްތިއުނާފީ ކޯޓުން މި ދައުވާ ބަލައިނުގަތެވެ.
''މި މައްސަލައިގެ އާދަޔާ ޚިލާފު އަދި ނުރައްކާތެރި ޙަޤީޤަތްތަކަށް ބަލާއިރު، ދަށު ކޯޓުން ނިންމި އެއްވެސް ނިންމުމެއްގައި އޮޅުމެއް ނެތް ކަމަށާއި، ޖޫރީން ނިންމި ގެއްލުމުގެ ބަދަލުގެ މިންވަރަކީ އެކަށީގެންވާ މިންވަރެއް ކަމަށް އަހަރެމެން ދެކެމެވެ." ސެކަންޑް ސަރކިޓް ޔޫއެސް ކޯޓް އޮފް އެޕީލްސްއިން ނެރުނު ހުކުމުގައި ބުނެފައިވެއެވެ.
އެއީ ޖެނުއަރީ 2024 ގައި ޓްރަމްޕްގެ މައްޗަށް ކުރި ޙުކުމެއްގެ އިސްތިއުނާފް މައްސަލައެކެވެ. މި މައްސަލައިގެ ފެށުމަކީ، ކުރީގެ އެލް މަޖައްލާގެ ކޮލަމިސްޓް، 81 އަހަރުގެ ކެރޯލް 1996 ގެ ހިސާބުގައި ބަރގްޑޯފް ގުޑްމަން ޑިޕާޓްމަންޓް ސްޓޯރުގެ ހެދުން ބަދަލުކުރާ ކޮޓަރިއެއްގައި ޓްރަމްޕް އޭނާއަށް ހަމަލާދިން ކަމަށް ތުހުމަތުކުރުމެވެ. ޓްރަމްޕް ފުރަތަމަ މި ތުހުމަތު ދޮގުކުރީ ޖޫން 2019 ގައެވެ. އޭނާ ނޫސްވެރިއަކަށް ބުނެފައިވަނީ ކެރޯލްއަކީ "އޭނާގެ ޓައިޕެއް ނޫން" ކަމަށާއި، "ވަޓް ޑޫ ވީ ނީޑް މެން ފޯ؟" ނަމަކަށް ކިޔާ ފޮތެއް ވިއްކުމަށްޓަކައި އޭނާ މި ވާހަކަ އުފައްދާފައިވާ ކަމަށެވެ.
އޮކްޓޯބަރު 2022 ގައި ޓްރޫތް ސޯޝަލްގައި ކުރި ޕޯސްޓެއްގައި ޓްރަމްޕް އޭނާގެ ވާހަކަތައް އަނެއްކާވެސް ތަކުރާރުކުރިއެވެ. މިކަމުގެ ސަބަބުން ލިޔުންތެރިޔާ އީ. ޖީން ކެރޯލް ކުރި ދައުވާގައި މޭ 2023 ގައި 5 މިލިއަން ޑޮލަރުގެ ޙުކުމެއް ޓްރަމްޕްގެ މައްޗަށް ނެރުނެވެ. ނަމަވެސް، އެ ޙުކުމުގައި ޖޫރީން ނިންމީ ޓްރަމްޕް ކެރޯލް ރޭޕްކުރި ކަމަށް ނުފެންނަ ކަމަށެވެ. ސެކަންޑް ސަރކިޓް ކޯޓުން 13 ޖޫންގައި ވަނީ، މި 5 މިލިއަން ޑޮލަރުގެ ޖޫރީ ޙުކުމް ވެސް ދަމަހައްޓާފައެވެ.
އެންމެ ފަހުގެ 83.3 މިލިއަން ޑޮލަރުގެ ބަދަލުގެ ތެރޭގައި ހިމެނެނީ 18.3 މިލިއަން ޑޮލަރު ނަފްސާނީ އަދި އަބުރަށް ލިބުނު ގެއްލުމުގެ ބަދަލުގެ ގޮތުގައާއި، 65 މިލިއަން ޑޮލަރު އަދަބީ ބަދަލުގެ ގޮތުގައެވެ.
އޭނާގެ އެންމެ ފަހުގެ އިސްތިއުނާފުގައި ޓްރަމްޕް ވަނީ، ޖުލައި 2024 ގައި ޔޫއެސް ސުޕްރީމް ކޯޓުން އޭނާއަށް ދިން ފުޅާ ޖިނާއީ އިމްތިޔާޒުގެ ސަބަބުން، ކެރޯލްގެ މަދަނީ މައްސަލައިން އޭނާއަށް ރައްކާތެރިކަން ލިބެންޖެހޭ ކަމަށް ބުނެފައެވެ. މީގެ އިތުރުން ޓްރަމްޕް ބުނެފައިވަނީ، 2019 ގައި ކެރޯލްއާ ބެހޭ ގޮތުން އޭނާ ވާހަކަދެއްކީ ރައީސްގެ ހައިސިއްޔަތުން ކަމަށާއި، އޭނާއަށް އިމްތިޔާޒު ނުދިނުމުން އެމެރިކާގެ ސަރުކާރުގެ ވެރިކަން ހިންގާ ބާރުގެ މިނިވަންކަމަށް އަސަރުކުރާނެ ކަމަށެވެ.
ދެ ޝަރީޢަތް ވެސް ބެލި ޔޫއެސް ޑިސްޓްރިކްޓް ޖަޖް ލުއިސް ކަޕްލާން އެހެން ކުށްތަކެއް ވެސް ކޮށްފައިވާ ކަމަށް ޓްރަމްޕް ވަނީ ތުހުމަތުކޮށްފައެވެ. އޭގެ ތެރޭގައި ހިމެނެނީ ކެރޯލްއާ ބެހޭ ގޮތުން ވާހަކަދެއްކުމުގައި "އަހަރެން ހަމައެކަނި ބޭނުންވީ އަހަރެންނާއި، އަހަރެންގެ އާއިލާއާއި، އަދި ޙަޤީޤަތުގައި ރައީސްކަން ދިފާޢުކުރަން" މިހެންބުނެ އޭނާ ދިން ހެކިބަސް ބާޠިލުކުރި ކަމެވެ.
ވައިޓް ހައުސްއިން އަދި މި މައްސަލައިގައި ޓްރަމްޕްގެ ޒާތީ ވަކީލުން ވެސް މި ކަމާ ގުޅޭ ގޮތުން ކޮމެންޓަކަށް އެދުމުން ވަގުތުން ޖަވާބެއް ދީފައެއް ނުވެއެވެ.
މި ޤާނޫނީ ހަގުރާމަތަކަށްފަހު، ޖޫން މަހު ކެރޯލް ވަނީ "ނޮޓް މައި ޓައިޕް: ވަން ވުމަން ވާސަސް އަ ޕްރެޒިޑެންޓް" ނަމަކަށް ކިޔާ އިތުރު ފޮތެއް ނެރެފައެވެ. މިއީ ޓްރަމްޕާ ދެކޮޅަށް އޭނާ ކުރި ޤާނޫނީ މަސައްކަތްތަކާ ބެހޭ ފޮތެކެވެ.
Thiladhun © 2019 – 2025| Made with in #Thiladhunmathi
Thiladhun © 2019 – 2025
Made with ❤️ in #Thiladhunmathi