ދުނިޔޭގެ ސިއްޙަތު ޖަމްޢިއްޔާ، ޑަބްލިޔުއެޗްއޯއިން ވަކިވާން އެމެރިކާގެ ރައީސް ޑޮނަލްޑް ޓްރަމްޕް ނިންމަވައި އެކަން އަންގަވާފައިވިޔަސް، އެ ޖަމްޢިއްޔާއިން ރަސްމީކޮށް ވަކިކުރާނީ، އެއް އަހަރުގެ ނޯޓިސްގެ މުއްދަތު ހަމަވެ، 22 ޖެނުއަރީ 2026ގައި ކަމަށް އދ.އިން ބުނެފިއެވެ.
މިދިޔަ ހޯމަ ދުވަހު އެމެރިކާގެ 47 ވަނަ ރައީސްގެ ގޮތުގައި މަޤާމުގެ ހުވައި ކުރެއްވުމަށްފަހު، ނިންމެވި ވަރުގަދަ ނިންމުންތަކުގެ ތެރޭގައި، ޑަބްލިޔުއެޗްއޯއިން ވަކިވުން ހިމެނެއެވެ. ޓްރަމްޕް ތަކުރާރުކޮށް ތުހުމަތުކުރައްވާފައިވާ ގޮތުގައި، ކޮވިޑް-19 ފަދަ ދުނިޔެއަށް ދިމާވާ ސިއްޙީ ކާރިސާތަކުގައި ޢަމަލުކޮށްފައިވާ ގޮތް ގޯހެވެ. އަދި އެމެރިކާއިން ޑްބްލިޔުއެޗްއޯއަށް ދޭ މާލީ އެހީތެރިކަމާ ގާތަށްވެސް، އެ ޖަމްޢިއްޔާއިން އެމެރިކާގެ ސިއްޙީ ނިޒާމަށް އެހީ ފޯރުކޮށްނުދޭކަމަށް ވެސް ޓްރަމްޕް ވަނީ ވިދާޅުވެފައެވެ.
އެމެރިކާއަކީ ޑަބްލިޔުއެޗްއޯއަށް އެންމެ ގިނައިން މާލީ އެހީ ފޯރުކޮށްދޭ އެއް ޤައުމެވެ. މިގޮތުން، 2024 އަދި 2025 އަށް ދެ އަހަރު ދުވަހުގެ 6.8 ބިލިއަން އެމެރިކާ ޑޮލަރުގެ 18 ޕަސެންޓު ޙިއްސާކުރީ އެމެރިކާއިންނެވެ.
އެމެރިކާގެ ޤާނޫނު ހަދާ މަޖިލީހުން 1948ވަނަ އަހަރު ފާސްކޮށްފައިވާ ޤަރާރުގެ ދަށުން، ޑަބްލިޔުއެޗްއޯއިން ވަކިވުމުގެ ކުރިން އެއް އަހަރު ދުވަހުގެ ނޯޓިސް ދިނުމުގެ އިތުރަށް، އެ ޖަމްޢިއްޔާއަށް ދައްކަންޖެހޭ ހުރިހާ ފައިސާ ދައްކައި ޚަލާސް ކުރަންޖެހޭނެއެވެ. ނަމަވެސް، ޑަބްލިޔުއެޗްއޯއިން ވަކިވާން ނިންމުމާ ހަމައަށް، އެ ޖަމްޢިއްޔާއަށް އެމެރިކާއިން ދައްކަން އޮތް ފައިސާގެ އަދަދެއް ސާފެއް ނޫނެވެ.
"ޑަބްލިޔުއެޗްއޯއިން ވަކިވުމާ ބެހޭ ގޮތުން އެމެރިކާއިން ފޮނުވި ސިޓީ މިހާރު ލިބިއްޖެ. އެއީ 22 ޖެނުއަރީ 2025ގެ ތާރީޚުގައި ފޮނުވާފައިވާ ސިޓީއެއް. އެ ސިޓީއަށް ޢަމަލުކުރަން ފަށާނީ، އެ ދުވަހުން ފެށިގެން އެއް އަހަރުގެ މުއްދަތު ހަމަވާ، 22 ޖެނުއަރީ 2026އިން ފެށިގެން،" އދ.ގެ ތަރުޖަމާނުގެ ނައިބު ފަރުޙާން ޙައްޤް ވިދާޅުވިއެވެ.
ޑަބްލިޔުއެޗްއޯއިން ވަކިވާން ނިންމުމުން، އެއިޑްސް ފަދަ ބޮޑެތި ބަލިތަކާއި ބަލިމަޑުކަން ފެތުރުމާ ދެކޮޅަށް އެ ޖަމްޢިއްޔާއިން ދުނިޔޭގެ އެކި ކަންކޮޅުތަކުގައި ކުރަމުންދާ މަސައްކަތްތަކަށް ވަރަށް ބޮޑަށް ހުރަސްއެޅޭނެކަމަށް ސިއްޙީ މާހިރުން ދަނީ ބުނަމުންނެވެ.
ޑަބްލިޔުއެޗްއޯގައި މަސައްކަތްކުރާ އެމެރިކާ ރައްޔިތުން އަނބުރާ ގެނައުމާއި، އެ ޖަމްޢިއްޔާއިން އެމެރިކާ ހިންގާ ބައެއް ޕްރޮގްރާމްތައް ހިންގުން އެހެން ފަރާތްތަކާ ޙަވާލުކުރުމަށް ހަމަޖެހިފައިވާ ކަމަށް ބައެއް ރިޕޯޓުތައް ބުނެއެވެ.
ޓްރަމްޕްގެ ފުރަތަމަ ވެރިކަމުގައި ވެސް ޑަބްލިޔުއެޗްއޯއިން ވަކިވާން ނިންމެވިއެވެ. ނަމަވެސް، އެ ނިންމެވުން ތަންފީޒުކުރެވުމުގެ ކުރިން، ރިޔާސީ އިންތިޚާބުން ނާކާމިޔާބުވެވަޑައިގެންނެވުމުން، ރައީސް ޖޯ ބައިޑެން ވެރިކަމަށް ވަޑައިގެންނެވި ފުރަތަމަ ދުވަހު ޓްރަމްޕް އެ ނިންމެވުން ބާތިލުކުރެއްވިއެވެ.