އިންޑޮނޭޝިއާއިން އައިފޯން 16 ވިއްކުން މަނާކުރުމަށް ނެރެފައިވާ އަމުރު ނިމުމަކަށް ގެނައުމަށް މަސައްކަތް ކުރަމުންދާކަމަށް މީޑިއާ ރިޕޯޓްތައް ބުނެފިއެވެ. އިންޑޮނޭޝިއާގެ އިންވެސްޓްމަންޓް މިނިސްޓަރު ރޯސަން ރޯސްލާނީ ބްލޫމްބާގް ނިއުސްއަށް ދެއްވި މަޢުލޫމާތެއްގައި ވިދާޅުވެފައިވަނީ، އެޕަލް އިންކް އާއެކު އިންވެސްޓްމަންޓް ޕްލޭނަކާ ގުޅޭ އެއްބަސްވުމަކާ ކައިރިވެފައިވާ ކަމަށެވެ. މި އެއްބަސްވުމުގެ ސަބަބުން އިންޑޮނޭޝިއާގައި އައިފޯން 16 ވިއްކުން މަނާކުރުމަށް ނެރެފައިވާ އަމުރު ނިމުމަކަށް އަންނާނެ ކަމަށް އެރިޕޯޓްގައި ބުނެފައިވެއެވެ. ސުވިޓްޒަލޭންޑްގެ ދާވޯސްގައި ބްލޫމްބާގް ޓެލެވިޜަނަށް ދެއްވި އިންޓަވިއުއެއްގައި ރޯސްލާނީ ވިދާޅުވީ، "އުއްމީދު ކުރެވެނީ ހަފްތާއެއް ނުވަތަ ދެ ހަފްތާގެ ތެރޭގައި މި މައްސަލަ ހައްލުވާނެ ކަމަށް" ކަމަށެވެ. މި މައްސަލައާ ގުޅޭގޮތުން އެޕަލްއިން އަދި މިހާތަނަށް އެއްވެސް އެއްޗެއް ބުނެފައެއް ނުވެއެވެ. އަދި އިންޑޮނޭޝިއާ ސަރުކާރުގެ ފަރާތުންވެސް މިކަމާ ގުޅޭ އިތުރު މަޢުލޫމާތެއް ލިބިފައެއް ނުވެއެވެ. ފާއިތުވި އަހަރު، އިންޑޮނޭޝިއާއިން ވަނީ އައިފޯން 16 ވިއްކުން މަނާކޮށްފައެވެ. މިގޮތަށް މަނާކުރީ، އެ ގައުމުގައި ވިއްކޭ ސްމާޓްފޯނުތަކުގެ މަދުވެގެން 40 އިންސައްތަ އެތެރޭގައި އުފައްދާފައިވާ ބައިތަކުން އެކުލެވިފައި ހުންނަންޖެހޭ ކަމަށް ކަނޑައަޅާފައިވާ ޝަރުތު އެޕަލްއިން ފުރިހަމަ ނުކުރުމުގެ ސަބަބުންނެވެ. ދުއިސައްތަ އަށްޑިހަ މިލިއަނެއްހާ މީހުން ދިރިއުޅޭ އިންޑޮނޭޝިއާގައި އެޕަލްގެ އުފެއްދުންތެރިކަމުގެ ވަސީލަތްތަކެއް ނެތް ނަމަވެސް، 2018 ވަނަ އަހަރުން ފެށިގެން އެޕްލިކޭޝަން ޑިވެލޮޕަރުންގެ އެކަޑަމީތަކެއް ގާއިމުކޮށްފައިވެއެވެ. އިންޑޮނޭޝިއާއިން އައިފޯން 16 ވިއްކުން މަނާކުރުމަކީ އެ ގައުމުގެ ޓެކްނޮލޮޖީ ދާއިރާ ކުރިއެރުވުމަށް އަޅާފައިވާ ފިޔަވަޅެކެވެ. މި ގަވާއިދުގެ މަޤްޞަދަކީ ބޭރުގެ ކުންފުނިތަކުން އިންޑޮނޭޝިއާގައި އިންވެސްޓްކޮށް، އުފެއްދުންތެރިކަމުގެ ދާއިރާ ތަރައްޤީކުރުމަށް ބާރުއެޅުމެވެ.