މާލޭ ހެންވޭރުކޮޅު ބުރެވިމަގުގައި ހުރި އުސް އިމާރާތެއްގެ ފަސްވަނަ ފަންގިފިލާގެ ކުޑަދޮރުން ކުޑަކުއްޖަކު ކިރިޔާ ނުވެއްޓޭ މަންޒަރު ފެންނަ ވީޑިއޯ ސޯޝަލް މީޑިއާއިން ނެގުމަށް ފުލުހުން މިރޭ އިލްތިމާސްކޮށްފި އެވެ.
ތަފްސީލް -  ފުލުހުން މީޑިއާއަށް މައުލޫމާތު ދޭ ވަޓްސްއެޕް ގްރޫޕުގައި ބުނީ ވީޑިއޯ ދައުރު ނުކޮށް، ވީޑިއޯ ޕޯސްޓްކުރި ބަޔަކު ވީޑިއޯ ރިމޫވް ކުރުމަށް އެދޭ ކަމަށެވެ.
ބުނީ ކީކޭ؟ - "މިފަދަ ވީޑިއޯތައް ދައުރު ކުރުމަކީ އެ ކުއްޖާއާއި ކުއްޖާގެ އާއިލާ، އާންމުންގެ ފާޑުކިޔުމާއި ނަފްސާނީ ގޮތުން އަނިޔާއަށް ހުށަހެޅިގެން ދާނެ ކަމެކެވެ. އާއިލާގެ އިތުރުން، މިކަމުގެ ސަބަބުން މި ވީޑިއޯ ފެންނަ ކޮންމެ މީހަކަށް ވެސް ނަފްސާނީގޮތުން އަސަރު ކުރުމަކީ އެކަށީގެންވާ ކަމެކެވެ. މީގެ އިތުރުން، މިފަދަ މަންޒަރުތަކުގެ ސަބަބުން، ކުޑަކުދިން ނުވަތަ ވަލްނެރަބްލް މީހުން، ޓްރިގަރ ވެ، އެމީހުން ނުރައްކަލަކަށް ހުށަހެޅިދާނެކަމަށް އަޅުގަނޑުމެން ދެކެމެވެ،" ފުލުހުން މީޑިއާތަކަށް ފޮނުވި މެސެޖުގައިވެ އެވެ.
އެއްވެސް ފަރާތަކުން މި ވީޑިއޯ ޝެއާކޮށްފައިވާ ނަމަ އެ ނަގައި އެހެން މީހުންނަށް ވެސް އެކަން ނުކުރުމަށް ބާރުއެޅުމަށް ފުލުހުން އިލްތިމާސްކޮށްފައިވެ އެވެ.
މި ހާދިސާއާ ގުޅިގެން އެއްވެސް މީހެއްގެ ކަންބޮޑުވުމެއް ނުވަތަ މައުލޫމާތެއްވާ ނަމަ، 3322111 އަށް ގުޅައި ހިއްސާކުރަން ވެސް ފުލުހުން އެދުނެވެ.