ފޯޅަވަހީގެ ރަށްތައް މޮރިޝަސްއަށް ދޫކޮށްލުމާ ބެހޭ ޕްލޭނާ ގުޅޭ ގޮތުން އެމެރިކާއާ އެކު މަޝްވަރާ ކުރަމުން އަންނަ ކަމަށް އިނގިރޭސިވިލާތުގެ ބޮޑުވަޒީރު ވިދާޅުވެއްޖެ އެވެ.
ބޮޑުވަޒީރު ކެއިރު ސްޓާމާ މިހެން ވިދާޅުވެފައި މިވަނީ އެ އެއްބަސްވުމަށް އެމެރިކާ އިން ތާއީދު އަނބުރާ ގެންގޮސްފާނެ ކަމުގެ ބިރު ހީވެފައިވާ ދަނޑިވަޅެއްގަ އެވެ.
އެ އެއްބަސްވުމުގެ ދަށުން އިނގިރޭސިވިލާތުން މޮރިޝަސްއަށް އެ ރަށްތަކުގެ ސިޔާދަތު ބަދަލުކޮށް، އެންމެ ބޮޑު ރަށް، ޑިއޭގޯ ގާސިއާގައި އިނގިރޭސިވިލާތާއި އެމެރިކާ ގުޅިގެން ހިންގާ އަސްކަރީ މަރުކަޒެއް ކުއްޔަށް ހިފުން ހިމެނެ އެވެ. އެ އެއްބަސްވުމުގައި މިދިޔަ އަހަރު ސޮއި ކުރީ އެމެރިކާގެ ތާއީދާ އެކު އެވެ.
ވަޒީރުން ވިދާޅުވާ ގޮތުގައި، އެ އެއްބަސްވުމަކީ "ނުބައި މަސްލަހަތުތަކުން" ސަލާމަތްވުމަށް ބޭނުންތެރި އެއްބަސްވުމެކެވެ. ނަމަވެސް މިދިޔަ ހަފުތާގައި އެމެރިކާގެ ރައީސް ޑޮނަލްޑް ޓްރަމްޕް އެ އެއްބަސްވުން ސިފަ ކުރައްވާފައިވަނީ "ބޮޑު މޮޔަކަމެއް"ގެ ގޮތުގަ އެވެ.
އިނގިރޭސިވިލާތުގެ ކޮންޒަވޭޓިވް ޕާޓީން ތުހުމަތު ކުރާ ގޮތުގައި ސަރުކާރުގެ އެ ނިންމުމުގެ ސަބަބުން ގައުމީ ސަލާމަތަށް ބުރޫ އަރާނެ އެވެ. އެކަން އެ މަގުން ހިނގާނީ ޗައިނާ އާއި މޮރިޝަސްއާ ދެމެދު އޮންނަ ގާތް ގުޅުމުގެ ސަަބަބުންނެވެ.
ޗައިނާއަށް ވަޑައިގަންނަވާ މަގުމަތީގައި ނޫސްވެރިންނާ ވާހަކަ ދައްކަވަމުން ސްޓާމާ ވިދާޅުވީ އެ މައްސަލާގައި އެމެރިކާގެ ރައީސް ޑޮނަލްޑް ޓްރަމްޕާ އެކު އެތައް ފަހަރަކު މަޝްވަރާ ކުރައްވާފައިވާނެ ކަމަށެވެ. އޭނާ ވިދާޅުވީ އެ މައްސަލަ ވައިޓް ހައުސްގައި މިދިޔަ ހަފުތާގެ ފަހުކޮޅާއި ހަފުތާ ބަންދުގައި އަދި މި ހަފުތާގެ ކުރީކޮޅު ވެސް ފާހަގަ ކުރައްވާފައިވާނެ ކަމަށެވެ.
ބޮޑުވަޒީރު ވިދާޅުވީ އެ އެއްބަސްވުން މުރާޖައާ ކުރުމަށް ޓްރަމްޕްގެ ސަރުކާރަށް މިދިޔަ އަހަރު ތިން މަސްދުވަހުގެ މުއްދަތެއް ދީފައިވާ ކަމަށާއި އެ އެއްބަސްވުމަކީ އެމެރިކާގެ ޖާސޫސީ އިދާރާތަކުން ރިވިއު ކުރުމަށް ފަހު ނިންމި އެއްބަސްވުމެއް ކަމަށެވެ.
އެ އެއްބަސްވުމާ ދޭތެރޭ އެމެރިކާގެ ތާއީދު އޮތް ގޮތާ މެދު ސުވާލު އުފެދުނީ މިދިޔަ ހަފުތާގައި ޓްރަމްޕް ސޯޝަލް މީޑިއާގައި އެ އެއްބަސްވުމާ ދެކޮޅަށް ވާހަކަ ދެއްކެވުމުންނެވެ.
އޭގެ މަދު ގަޑިއިރުތަކެއް ފަހުން ޑައުނިން ސްޓްރީޓުން ބުނީ ޓްރަމްޕް ދެއްކެވި ވާހަކަތަކާ އެކު ވެސް އެމެރިކާ އިން އަދިވެސް އެ އެއްބަސްވުމަށް ތާއީދު ކުރާ ކަމަށް ގަބޫލު ކުރާ ކަމަށެވެ.
ސްޓާމާގެ އަރިސް މީހުން ގަބޫލުކުރާ ގޮތުގައި، ޓްރަމްޕް އެ މައްސަލަ ބޭނުންކުރައްވަނީ ގްރީންލޭންޑްގެ މައްސަލައަށް އިނގިރޭސިވިލާތަށް ޕްރެޝަރު ކުރުމަށެވެ.
ނަމަވެސް ޖެހިގެން އައި ދުވަހު ހެނދުނު އެމެރިކާގެ ޓްރެޝަރީ ސެކްރެޓަރީ ސްކޮޓް ބެސެންޓް ވެސް ވަނީ އެ އެއްބަސްވުމަށް ފާޑުވިދާޅުވެ، އެ ރަށްތަކުގެ ސިޔާދަތު މޮރިޝަސްއަށް ބަދަލުކޮށް އިނގިރޭސިވިލާތުން "އަހަރެމެން ނިކަމެތި"ކޮށްފައިވާ  ކަމަށް ތުހުމަތު ކުރައްވައިފަ އެވެ.
ފޯޅަވަހީގެ ރަށްތަކަކީ 1814 ވަނަ އަހަރުން ފެށިގެން އިނގިރޭސިވިލާތުގެ ބާރުގެ ދަށުގައި އޮތް ތަންތަނެވެ. އެ ތަނުގައި 1965ގައި އަސްކަރީ ބޭހެއް ގާއިމުކޮށްފަ އެވެ.
އދ.ގެ ކޯޓަކުން 2021 ވަނަ އަހަރު ވަނީ އެ ރަށްތަކުގެ ސިޔާދަތީ ބާރު އިނގިރޭސިވިލާތަށް ލިބިގެން ނުވާ ކަމަށް ކަނޑައަޅައިފަ އެވެ. އެ ނިންމުމާ ގުޅިގެން މޮރިޝަސްއާ އެކު އެއްބަސްވުމެއް ހެދުމަށް މަޝްވަރާ ކުރަން ޖެހުނެވެ.
އެއްބަސްވުމުގެ ދަށުން އިނގިރޭސިވިލާތުން ޑިއޭގޯ ގާސިއާ 99 އަހަރަށް ކުއްޔަށް، އަހަރަކު 101 މިލިއަން ޕައުންޑަށް ކުއްޔަށް ދިނުމަށް އެއްބަސްވި އެވެ.