ފާދިއްޕޮޅު ނައިފަރުގައި ބޭނުން ކުރަމުން އައި އެންމެ ބޮޑު އިންޖީނު ހަލާކުވެ، ރަށުން ކަރަންޓް ކެނޑިފައިވާތީ، އެ މައްސަލަ ހައްލު ކުރުމުގެ މަސައްކަތް ފެނަކަ ކޯޕަރޭޝަނުން ފަށައިފިއެވެ.
 ފެނަކަ ކޯޕަރޭޝަނުން ބުނީ، މި މައްސަލަ ވީހާވެސް އަވަހަކަށް ހައްލު ކުރުމަށް ހަލާކުވެފައިވާ އިންޖީނަށް ބޭނުންވާ ސްޕެއަރތައް ހޯދުމުގެ މަސައްކަތް ފަށާފައިވާ ކަމަށާއި، މިރޭގެ ވަގުތެއްގައި މިކަމަށް ހައްލެއް ލިބޭނޭ ކަމަށް އުންމީދު ކުރާ ކަމަށެވެ.
 އެމް.ބީ.ސީ ނިއުސްއަށް މައުލޫމާތު ދެއްވަމުން ނައިފަރުގައި ހުންނެވި ފެނަކަ ކޯޕަރޭޝަންގެ އޮފިޝަލް އަބްދުލް ރައޫފް ވިދާޅުވީ،  ނައިފަރުން ކަރަންޓް ކެނޑިފައިވަނީ ރޭ އަށެއް ޖެހިއިރު ކަމަށާއި، ނައިފަރުގައި ހުރި އެންމެ ބޮޑު އިންޖީނުގެ ރޭޑިއޭޓަރަށް މައްސަލަތަކެއް ކުރިމަތިވެފައިވާ ކަމަށެވެ. ރައޫފް ވިދާޅުވީ، ހަތް ސަތޭކަ ކިލޯ ވޯޓުގެ އިންޖީނުގެ ރޭޑިއޭޓަރުގެ ފޭން ހަބް ހަލާކުވުމާ ގުޅިގެން އިންޖީނުން ތެޔޮ ލީކުވަމުންދާ ކަމަށާއި، އެ ސްޕެއަރތައް ހޯދުމުގެ މަސައްކަތް ފަށާފައިވާ ކަމަށެވެ. މިގޮތުން ފޭންހަބް މާލެއިން ލިބިފައިވާ ކަމަށާއި، ފޭން މާލޭގައި ނެތުމުން ކުޅުދުއްފުށްޓަށް އޯޑަރުދީގެން އެ ތަކެތި ގެނައުމުގެ މަސައްކަތް ކުރަމުންދާ ކަމަށް ރައޫފް ވިދާޅުވިއެވެ.
 މި ސްޕެއަރތައް މާލެ ގެނެސް ނައިފަރަށް ގެންދިޔުމަށްފަހު، މިރޭގެ ވަގުތެއްގައި ނައިފަރަށް ކަރަންޓް ދެވޭނެ ކަމަށް ފެނަކަ ކޯޕަރޭޝަނުން ބުނެއެވެ.
 
ފެނަކައިން ބުނީ، ފަސް ހާހަށްވުރެ ބޮޑު އާބާދީއެއް ދިރިއުޅޭ ނައިފަރަށް މިވަގުތު ކަރަންޓް ލިބެމުންދާނީ، ސަރުކާރުގެ އޮފީސްތަކުގެ ތެރެއިން ސްކޫލާއި، ހޮސްޕިޓަލްފަދަ މުހިންމު ތަންތަނަށް ކަމަށާއި، ރަށުގެ އެހެން ސަރަހައްދުތަކަށް ދަންފަޅި ބަހައިގެން ކަރަންޓް ފޯރުކޮށްދެމުންދަނީ ތިން ސަތޭކަ ކިލޯ ވޯޓުގެ އިންޖީނަކުން ކަމަށެވެ.