10: 22
މިނިސްޓަރ އޮފް ވޯޓާ އެނާޖީ އެންޑް އެންވަޔަރްމަންޓް އަހްމަދު އަބްދުﷲ ހދ. ކުޅުދުއްފުއްޓަށް އަރާވަޑައިގަތުމުން، އޭނާގެ ގަޔަށް ވެލި އުކައި މާރާމާރީ ހިންގުމަށް ފަހު، އެ ރަށުން ބާލައިފި އެވެ.
މީގެ ފަސް ވަރަކަށް މިނެޓްކުރިން ހިނގި މި ހާދިސާގައި މިނިސްޓަރު އަހްމަދުގެ ގަޔަށް އެ ރަށު ބަޔަކު އަތްލައި މާރާމާރީ ހިންގި ކަމަށް އެ ރަށުން މައުލޫމާތު ލިބުނެވެ. ރައްޔިތުންގެ މަޖިލީހުގެ ހދ.ގެ މެންބަރު ކަން ވެސް ކުރައްވަމުން ގެންދަވާ އަހްމަދު އަބްދުﷲ ކުޅުދުއްފުއްޓަށް ވަޑައިގަތީ މިއަދު ހަވީރުގެ ވަގުތެއްގަ އެވެ.
އެއަށް ފަހު ރަށުގެ ޒުވާނުންކޮޅެއް އެދިގެން އަހްމަދު އަބްދުﷲ މި ރޭ ނުވައެއް ޖެހި އިރު އަތޮޅުގޭގައި ޒުވާނުންނާ ބައްދަލުކުރެއްވި އެވެ. އެ ބައްދަލުވުމުގެ ތެރޭގައި ދެކެވުނު ވާހަކަތަކުގެ ތެރޭގައި އެއް ބަޔަކު ތެދުވެ އަހްމަދު އަބްދުﷲ އަތޮޅު މެންބަރު ކަމުގައި ބަހައްޓަން ބޭނުންނުވާ ކަމަށާއި މިހާރުން ފެށިގެން ރަށުން ރަށުން ބާލަންވީ ކަމަށް ބުނެ އަޑުގަދަކުރުމާ އެކު ހަމަނުޖެހުން އުފެދުނީ އެވެ.
އެ ބައްދަލުވުން ނުނިމެނީސް މިނިސްޓަރު އަހްމަދު އަބްދުﷲ އަތޮޅު ގެއިން ނެރިގެން އޭނާގެ ގައިކޮޅަށް ވެލިއުކައި ބުރަކަށީގައި ތަޅާ އަނިޔާކުރަމުން ކަހަލަ ގޮތަކަށް ގެންދިޔައީ ރަށުގެ ބަނދަރު މައްޗަށެވެ. އޭރު އޭނާގެ ހިމާޔަތުގައި އަތޮޅުވެރިޔާގެ އިސް އެހީތެރިޔާ އަބްދުއްރަހީމް އަހްމަދާއި ކުޅުދުއްފުށީ ކުޑަކަތީބު މުހައްމަދު ގާސިމް ވެސް ހުންނެވި އެވެ. ނަމަވެސް އެ ދެ ބޭފުޅުންނަށް މިނިސްޓަރުގެ ހިމާޔަތުގައި ކަމެއް ކުރެވޭ ވަރެއް ނުވި އެވެ.
މި ހާދިސާގައި ރަށުގެ އާންމުންގެ ބަޔަކު މިނިސްޓަރު އަހްމަދު އަބްދުﷲ ފަހަމުން ރަށުގެ ފާލަމާ ހަމައަށް ދިޔަ ތަނާ އެ ތަނަށް ފުލުހުންގެ ދެ މީހަކު އައެވެ. އަދި އެކަން ހުއްޓުވަން ފުލުހުން ފާލަން މައްޗަށް އެރުމުން އެއްވެފައި ތިބި މީހުން ފުލުހުންގެ ދެ މީހުން ފާލަން މައްޗަށް ވައްޓާލީ އެވެ. އެއަށް ފަހު މިނިސްޓަރު އަހްމަދު އަބްދުﷲ އޭނާ ވަޑައިގެން އަތޮޅު ލޯންޗަށް އަރާވަޑައިގެން ރަށުން ފުރާވަޑައިގެންފި އެވެ.
މިނިސްޓަރު އަހްމަދު އަބްދުﷲ ރަށުން ބޭލުމަށް ނުކުތް މީހުން އަޑުގަދަކުރާ ބޭނުންކޮށްގެން، އަހްމަދުގެ އިސްތިއުފާ އަށާއި ރައީސް މައުމޫންގެ އިސްތިއުފާ އަށް ގޮވަމުން ދިޔަ އެވެ.