ޖުމްހޫރީ ޕާޓީގެ ލީޑަރު ގާސިމް އިބްރާހިމް ގާނޫންތަކާއި ޚިލާފަށް ހައްޔަރުކުރި މައްސަލައާއި ހައްޔަރުކުރުމަށްފަހު ހަމަޖެހިފައިވާ އުސޫލްތަކާއި ޚިލާފަށް އެމަނިކުފާނާއިމެދު އަމަލުކުރަމުންދާތީ އެކަން އެމްނެސްޓީ އިންޓަރނޭޝަނަލްގެ ސަމާލުކަމަށް ގެނެސްފިއެވެ.
އިންސާނީ ހައްގުތައް ހިމާޔަތްކުރަން މަސައްކަތްކުރާ ބައިނަލްއަގުވާމީ ޖަމާއަތެއްކަމަށްވާ އެމްނެސްޓީގެ ސަމާލުކަމަށް ގެނެސްފައިވަނީ ޖުމްހޫރީ ޕާޓީގެ ލީޑަރު އަމީން އިބްރާހިމާއި، ޖުމްހޫރީ ޕާޓީގެ ކައުންސިލް މެންބަރު ސޮބާހު ރަޝީދެވެ.
އެމްނެސްޓީ އިންޓަރނޭޝަނަލްގެ ސަމާލުކަމަށް މި މައްސަލަ ގެންނެވުމަށްފަހު ވީނިއުސްއަށް މި ބައްދަލްވުމާއި ގުޅޭގޮތުން މައުލޫމާތު ދެއްވަމުން އަމީން ވިދާޅުވީ ގާސިމް އިބްރާހިމް ހައްޔަރުކުރުމާއި، އެމަނިކުފާނުގެ ބަންދާއި ގުޅިފައިވާ ކަންތައްތައް އެ ޖަމާއަތުގެ ބޭފުޅުންނާއި ހިއްސާކޮށްފައިވާނެކަމަށެވެ.
އަދި ރައްޔިތުންގެ މަޖިލީހުގެ މެންބަރެއްގެ ހައިސިއްޔަތުން ގާސިމް އިބްރާހިމަށް ލިބިވަޑައިގަންނަވާ ހައްގުތަކާއި، ދިވެހި ރައްޔިތެއްގެ ހައިސިއްޔަތުންވެސް ލިބޭ ހައްގުތަކަށް ދައުލަތުގެ މުއައްސަސާތަކުން އިހްމާލުވަމުންދާތީ އެކަން އެޖަމާއަތުގެ ސަމާލުކަމަށް ގެނެސްފައިވާނެކަމަށެވެ.