ރައްޔިތުން ބަލައިގަންނަ ފެންވަރުގެ ސިއްހީ ނިޒާމަކަށް ރާއްޖޭގެ ސިއްހީ ނިިޒާމް ހެދުމަށް މަސައްކަތް ކުރަން ޖެހޭކަމަށް ހެލްތު މިނިސްޓަރު އަބުދުﷲ ނާޒިމް ވިދާޅުވެއްޖެއެވެ.
މިނިސްޓަރ މިގޮތަށް ވިދާޅުވީ ސިއްހީ ހިދުމަތްތަކުގެ ފެންވަރު ބެލުމުގެ މަގްސަދުގައި އާއި މޯލްޑިވްސް ހެލްތް ކެއަރ ސްޓޭންޑަޑްއަށް ވާސިލުވުމަށް ކުރަން ޖެހެނީ ކޮންކަމެއްތޯ ބެލުމުގައި ހަރަކާތްތެރިވާ އެސެސަރސް ތަމްރީނު ކުރުމުގެ ދެ ދުވަހުގެ ވޯކްޝޮޕް ފެއްޓެވުމުގެ ރަސްމިއްޔާތުގައި ވާހަކަދައްކަވަމުންނެވެ.
މިނިސްޓަރ ވިދާޅުވީ ގިނަ ބަލިތަކެއް ރާއްޖެއިން ނައްތާލެވިފައިވާ ކަމަށާއި ވިހެއުމުގައި ތެރޭގައި މަރުވާ މީހުންގެ އަދަދުވެސް އެތައް ގުނައަކަށް މަދުކުރެވިފައިވާ ކަމަށެވެ. އަދިި ރާއްޖޭގެ ހުރިހާ ރަށެއްގެ ރައްޔިތުންނަށް ރަނގަލު ސިއްހީ ހިދުމަތެއް ދެއްވުމަށް މަދުވެގެން އެންމެ ޑޮކްޓަރަކާއި، އަދި އޭގެ އިތުރުން ބޭސްފިހާރައެއް ގާއިމްކޮށްފައިވާކަމަށްވެސް މިނިސްޓަރ ވިދާޅުވިއެވެ.
އަދި ހުރިހާ ރައްޔިތުންނަށް އެއް ހަމައެއްގައި ސިއްހީ ހިދުމަތް ދިނުމަށް ހުސްނުވާ އާސަންދަގެ ހިދުމަތް ލޯންޗުކޮށްފައިވާ ކަމަށާއި، އެ ސްކީމްގެ ދަށުން ރައްޔިތުން އެ ހިދުމަތްވެސް ބޭނުންކުރަމުން އަންނަކަމަށް މިނިސްޓަރ ވިދާޅުވިއެވެ.
މިނިސްޓަރ ނާޒިމް ވިދާޅުވީ މި ވޯކްޝަޕަކީ ރާއްޖޭގެ ރައްޔިތުންނަށް ރަނގަޅު ސިއްހީ ހިދުމަތެއް ދިނުމަށް ސަރުކާރުން ކުރައްވަމުންގެންދަވާ މަސައްކަތުގެ ތެރެއިން އެޅުނު އިތުރު ބޮޅެއް ކަމަށެވެ. އަދި މި ވޯކްޝޮޕް ނިމުމުން މިނިސްޓްރީގެ އެކްސްޓާނަލް ކުއަލިޓީ އެޝުއަރެންް ނިޒާމާއި ސިއްހީ ހިދުމަށްދޭ ތަންތަނުގެ އިންޓާނަލް ކޮލެޓީ އެޝިއުރަންސްގެ ނިޒާމު ގާއިމު ކުރެވިގެންދާނެ ކަމަށްވެސް މިނިސްޓަރ ވިދާޅުވިއެވެ.
 
މިއަދު ހެނދުނު ފެށިގެން މާދަމާގެ ނިޔަލަށް ހޮޓެލް ޖެންގައި ކުރިއަށްދާ މި ވޯކްޝޮޕަށް މާލޭގެ އިތުރުން، އަތޮޅު ތެރޭގެ ސިއްހީ ތަންތަނުގައި މަސައްކަތްކުރާ މުވައްޒަފުން ވަނީ ބައިވެރިވެފައެވެ.
ދުނިޔޭގެ ސިއްހަތު ޖަމިއްޔާ ޑަބްލިވްއެޗްއޯ އާއި ހެލްތް މިނިސްޓްރީ ގުޅިގެން ހިންގާ މި ވޯކްޝޮޕަށްފަހު، ހެލްތް މިނިސްޓްރީގައި އެކްސްޓާނަލް ކުއަލިޓީ އެޝުއަރެންސް ނިޒާމެއް ގާއިމްވެގެންދާނެކަމަށް މިނިސްޓްރީން ބުނެއެވެ. އަދި އޭގެ އިތުރަށް ސިއްހީ ހިދުމަތް ދޭ ތަންތަނުގައި އިންޓަރނަލް ކޮލިޓީ އެޝުއަރެންސް ނިޒާމެއް ގާއިމްކުރެވޭނެކަމަށްވެސް މިނިސްޓްރީން ބުނެއެވެ.
ހެލްތް މިނިސްޓްރީން ބުނީ މި ވޯކްޝޮޕްގެ އެންމެ ބޮޑު ބޭނުމަކީ މި ސްޓޭންޑާޑްތަކާއެކު، މިހާރު ދެވޭ ސިއްހީ ހިދުމަތްތަކުގެ ފެންވަރު ބަލައި އެ ހިދުމަތްތައް ކަނޑައެޅޭ ފެންވަރަކަށް ގެނައުމަށް ކުރަން ޖެހޭ ކަންކަން ކުރުން ކަމަށެވެ.