ރާއްޖެއަށް ދިމާވެފައިވާ މަސްތުވާތަކެތީގެ ވަބާ ފުހެލުމަށް ރާއްޖެއަށް ކުއްތާ އާއި، އެނޫންވެސް ވަސީލަތްތައް ރާއްޖެ ގެނައުމުގެ ވިސްނުން އެބައޮތް ކަމަށް ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
ދިޓީވީގެ "ހަބަރު ތެރެއިން ޕްރޮގްރާމްގައި މިނިސްޓަރު ވިދާޅުވީ ރާއްޖެއަށް މިވަގުތު ދިމާވެފައިވާ އެންމެބޮޑު މައްސަލައަކީ މަސްތުވާތަކެތީގެ ވަބާ ކަމަށާއި، އެމަނިކުފާނު ހޯމް މިނިސްޓަރު ކަމުގެ މަގާމާއި ހަވާލުވުމުގެ މައިގަނޑު މަގުސަދަކީ ވެސް ރާއްޖެއިން މަސްތުވާތަކެތީގެ ވަބާ ފުހެލަން މަސައްކަތް ކުރުމަށް ކަމަށެވެ.
"ހަގީގަތުގައި އަޅުގަނޑު މި މަގާމާއި ހަވާލުވީ ވެސް ރާއްޖެއިން މަސްތުވާތަކެތި ނައްތާލަން މަސައްކަތް ކުރަން. އެކަން ކުރެވިއްޖެނަމަ ރާއްޖޭގެ މުޖުތަމައު އަމާންކަމާއި، ސުލްހަވެރި ވެގެންދާނެކަން ޔަގީން،" އުމަރު ވިދާޅުވި އެވެ.
އުމަރު ވިދާޅުވީ މަސްތުވާތަކެތި އެތެރެކުރުން ކޮންޓްރޯލް ކުރުމަށް ދުނިޔޭގެ އެހެން ގައުމުތަކުގައި ބޭނުންކުރާ ވަސީލަތްތައް ރާއްޖޭގައިވެސް ބޭނުން ކުރަން ވިސްނަވާ ކަމަށާއި، އެގޮތުން ރާއްޖޭގެ ހުރިހާ ބަނދަރެއްގައި ކުއްތާ ގެންގުޅުމުގެ ވިސްނުން ގެންގުޅުއްވާ ކަމަށާއި، އެކަން ކުރަން އިސްލާމިކު މިނިސްޓްރީ އާއި ފުލުހުންނާއި، ކަމާބެހޭ އެހެން މުއައްސަސާތަކާއެކު މަޝްވަރާ ފައްޓަވާފައިވާ ކަމަށެވެ. އަދި ވިދާޅުވީ މަސްތުވާތަކެތި ރާއްޖެއިން ނައްތާލަން ކުރަންޖެހޭ ހުރިހާ ކަމެއް ކުރަން އެމަނިކުފާނު ތައްޔާރުވެ ހުންނެވި ކަމަށެވެ.
"ރާއްޖޭގެ ކޮންމެ ޕޯޓެއްގެގައި ކުއްތާ ބައިތިއްބަން އެބަ ވިސްނަން، އެކަން ކުރަން މަޝްވަރާކުރަމުން މިދަނީ. މަސްތުވާތަކެތި ރާއްޖެއިން ފުހެލުމަށް ކުރަންޖެހޭ ހުރިހާކަމެއް ކުރަން އަޅުގަނޑު މިހުރީ ތައްޔާރަށް،" އުމަރު ވިދާޅުވި އެވެ.
ފަހަކަށް އައިސް ރާއްޖޭގައި މަސްތުވާތަކެތީގެ ވަބާ އިތުރުވެފައިވާކަން ފާހަގަކުރައްވަމުން އުމަރު ވިދާޅުވީ މަސްތުވާތަކެތީގެ ދޮރުތައް ބަންދުކުރަން ރާވަންޖެހޭ ޕްލޭންތަކާއި، އެނޫންވެސް މަސައްކަތްތައް ކުރުމަށް ލީގަލް ޓިމަކާއި މަޝްވަރާކުރަމުންދާ ކަމަށާއި، އެންމެ ފުރަތަމަ ކަމަކަށް މަސްތުވާތަކެތި އެތެރެ ކުރުން ހުއްޓުވުމުގެ މަސައްކަތް ކަމާބެހޭ މުއައްސާސާ ތަކުން ކުރަމުން އަންނަ ކަމަށެވެ. އަދި ވިދާޅުވީ ރާއްޖޭގައި އެތަކެތީގެ ވިޔާފަރި ކުރަން އުޅޭފަރާތްތަކާއި، އެތަކެތި ބޭނުންކުރާ ފަރާތްތައް ހޯދައި ގާނޫނީ ގޮތުން ދެވެންހުރި އަދަބު ވެސް ދެއްވާނެ ކަމަށެވެ.
"މަސްތުވާތަކެތީގެ ދޮރުތައް ބަންދުކުރުމަށް ރާވަންޖެހޭ އެކިއެކި ޕްލޭންތައް ރާވައި މިކަންކަން ހުއްޓުވުމުގައި ލީގަލް ޓީމެއް ނަގައިގެން މަޝްވަރާކުރަމުން މިދަނީ. އެފަރާތްތަކަށް އަދަބު ދިނުމުގައި ގާނޫނީ ގޮތުން ދެވެންހުރި ހުރިހާ އަދަބެއް ދޭން ތައްޔާރަށް މިހުރީ،" އުމަރު ވިދާޅުވި އެވެ.