ޕީޕީއެމްގެ ރިޔާސީ ކެންޑިޑޭޓް އަދި މުލަކު ދާއިރާގެ މެމްބަރު އަބްދުﷲ ޔާމީން މާލެ ވަޑައިގެންނެވުމުން، އެ ޕާޓީގައި ދެމިހުންނެވުމާ މެދު ގޮތެއް ނިންމަވާނެ ކަމަށް ތިމަރަފުށީ ދާއިރާގެ މެމްބަރު އަހުމަދު ޝަރީފް މިއަދު ވިދާޅުވެއްޖެ އެވެ. ޝަރީފް ޕީޕީއެމުން ވަކިވެވަޑައިގަތުމަށް ނިންމަވާފައިވާ ކަމަށް ފެތުރޭ އަޑުތަކާ ގުޅިގެން "ހަވީރު"ން ސުވާލުކުރުމުން އޭނާ ވިދާޅުވީ އެއީ މުޅިން ހަގީގަތެއް ނޫން ކަމަށެވެ. އެހެން ނަމަވެސް އިތުރަށް ވިސްނަން ޖެހޭ ކަންކަން ޕާޓީގައި އެބަހުރި ކަމަށް އޭނާ ވިދާޅުވި އެވެ. އޭގެ ތަފްސީލެއް ނުދެއްވައި ވިދާޅުވީ މިވަގުތު އެކަން ހިއްސާކުރައްވަން ބޭނުންނުވާ ކަމަށެވެ. "ޔާމީން ވަޑައިގެންނެވީމަ އަޅުގަނޑު ގޮތެއް ނިންމާނީ،" ޝަރީފް ވިދާޅުވި އެވެ. މިވަގުތު ބޭސްފަރުވާއަކަށް ސިންގަޕޫރުގައި ހުންނެވި ޔާމީން މިރޭ މާލެ ވަޑައިގަންނަވާނެ ކަމަށްވެ އެވެ. "ހަވީރަ"ށް އެނގިފައިވާ ގޮތުގައި ޝަރީފް ޕީޕީއެމުން ވަކިވެވަޑައިގަންނަވާނެ ކަމަށް ފެތުރޭ އަޑުތަކާ ގުޅިގެން ޕީޕީއެމްގެ ރައީސް މައުމޫންއަބްދުލް ގައްޔޫމާއި އެ ޕާޓީގެ އިސް ބައެއް މެމްބަރުން ވަނީ އޭނާއާ ބައްދަލުކުރައްވައިފަ އެވެ. ތިމަރަފުށީ އެއާޕޯޓް މަސައްކަތް މަޑުޖެހިފައިވާ މައްސަލާގައި ޝަރީފްގެ ހިތްހަމަނުޖެހުންތަކެއް ހުރި ކަމަށް މިދިޔަ ހަފުތާގައި މީޑިއާގައި އޭނާ ވަނީ ވިދާޅުވެފަ އެވެ. އަދި އެކަން ކުރިމަތިވީ ޕީޕީއެމްގެ މެމްބަރުންނާ ހެދި ކަމަށް ބައެއް މީޑިއާތަކުގައި ހަބަރު ފަތުރާފައިވެ އެވެ، އެކަމަށް ރައްދުދެމުން ޕީޕީއެމުން ބުނީ ތިމަރަފުށީ އެއާޕޯޓުގެ މަސައްކަތް މަޑުޖެހިފައި ވަނީ ޕީޕީއެމްގެ ބަޔަކު ހުރަސްއަޅާތީ ނޫން ކަމަށެވެ. އަދި އެއްވެސް ރަށެއްގެ ތަރައްގީގެ ކަމަކަށް ޕީޕީއެމުން ހުރަސްނާޅާނެ ކަމަށް ވެސް އެ ޕާޓީން ވަނީ ބުނެފަ އެވެ.