ހާމިދަކީ ހޯދާ މީހެއް ކަމެއް އެނގިފައެއް ނެތް: ޝާހިދު

ކުޑަކަމުދާ ތަކެތި ނުދީގެން ދައުވާ އުފުލާފައިވާ އެމްޑީޕީގެ ހެންވޭރު ދެކުނު ދާއިރާގެ މެންބަރު ހާމިދު އަބްދުލް ޣަފޫރު ހައްޔަރުކޮށްގެން ކޯޓަށް ހާޒިރުކޮށްދިނުމަށް ފުލުހުންގެ މައްޗަށް އަމުރެއް ނެރެފައިވީނަމަވެސް ކޯޓް އަމުރެއްގެ ދަށުން ފުލުހުން ހާމިދު ހޯދަމުންދާކަން އެނގިވަޑައިގެންފައި ނުވާ ކަމަށް ރައްޔިތުންގެ މަޖިލީހުގެ ރައީސް އަބްދުﷲ ޝަހިދު ވިދާޅުވެއްޖެއެވެ.
ޝާހިދު މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ބަހުސް ކުރައްވަމުން ގަލޮޅު ދެކުނު ދާއިރާގެ މެންބަރު އަހުމަދު މަހްލޫފް ޝާހިދުއަށް ފާޑު ވިދާޅުވެ ދެއްކެވި ވާހަކަފުޅަށް ރައްދުދެއްވަމުންނެވެ.
މަހްލޫފް ވިދާޅުވީ ކުޑަކަމުދާ ތަކެތި ނުދީގެން ދައުވާ އުފުލާފައިވާ ހާމިދު ކޯޓަށް ފިއްލަވައިވަޑައިގެން މަޖިލީހުގައި އުޅުއްވަނީ މަޖިލީހުގެ ރައީސް އަބްދުﷲ ޝާހިދުގެ ހިމާޔަތުގައި ކަމަށާއި ހާމިދު ފުލުހުންނާއި ހަވާލު ކުރަން މަޖިލީހުގެ ރައީސަށް ގޮވާލާ ކަމަށެވެ.
"ހާމިދު މަޖިލީހުގައި އެ އުޅުއްވަނީ ފިއްލަވައިގެން. ނޫސްތަކުގައި އެހުރީ ފޮޓޯ ޖަހާފައި. އެހެންކަމުން ހާމިދު ފުލުހުންނާއި ހަވާލު ކުރުމަކީ މަޖިލީހުގެ ރައީސް ކުރައްވަން ޖެހިވަޑައިގަންނަވާނެ ކަމެއް" މަހްލޫފް ވިދާޅުވި އެވެ.
މަޖިލީހުގެ މިއަދުގެ ޖަލްސާއަށް މަހްލޫފް ވަދެވަޑައިގަންނަވަނިކޮށް މަހްލޫފްގެ ގައިގައި ތަޅައިގަންނާނެ ކަމަށް ވިދާޅުވެ ހާމިދު އިންޒާރުދެއްވާފައިވާ ކަމަށާއި އެހެންކަމުން ކޯޓަށް ފިއްލަވައިގެން އުޅޭ މެންބަރަކު ފުލުހުންނާ ހަވާލުކުރުން މުހިއްމު ކަމަށްވެސް މަހުލޫފް ވިދާޅުވިއެވެ.
ނޮވެމްބަރު 11 އަށް ރައީސުލްޖުމްހޫރިއްޔާގެ މަގާމަށް ބޭފުޅަކު އިންތިހާބު ނުކުރެވިއްޖެނަމަ ރައްޔިތުންގެ މަޖިލީހުގެ ރައީސްގެ ހައިސިއްޔަތުން ޝާހިދުއަށް ވެރިކަން ހަވާލުކުރުމަށް އެމްޑީޕީން ހުށަހަޅަފައިވާ އިސްލާހަށް ރިއާޔަތްކޮށް މަހްލޫފު ވިދާޅުވީ ހާމިދުމެންފަދަ ކުށްވެރިން ފޮރުވަން މަސައްކަތް ކުރާ މީހަކަށް ވެރިކަން ހަވާލު ނުކުރެވޭނެ ކަމަށާއި، އެފަދަ ހުށަހެޅުމަކަށް ތާއީދުނުކުރައްވާނެ ކަމަށެވެ.
"ތަޅާލާނަމޭ ކިޔާފައި އިންޒާރު ދޭއިރު ކެރެންޏާ އާދޭ ތަޅަން. އަހަރުންނަށްވެސް ތެޅޭނެ. ޝާހިދުގެ ޒިންމާއެއް އެއީ އޭނަ ނެރެ ފުލުހުންނާއި ހަވާލު ކުރުން .މިވަރުގެ މީހަކަށް ކިހިނެތް ވެރިކަން ހަވާލު ކުރެވޭނީ" މަހްލޫފް ވިދާޅުވިއެވެ.
މަހްލޫފަށް ރައްދުދެއްވާ މަޖިލީހުގެ ރައީސް އަބްދުﷲ ޝާހިދު ވިދާޅުވީ ހާމިދު ހައްޔަރު ކުރުމަށް ކޯޓުން އަމުރު ނެރުނު ކަމުގެ ލިޔުމެއް މަޖިލީހަށް ލިބިފައިނުވާ ކަމަށާއި އަދި އޭނާ އަކީ ހޯދާ ނުފެނިފައިވާ މީހެއް ކަމަށް މަޖިލީހުގެ އިދާރާއަށް އެއްވެސް މުއައްސަސާއަކުން އަންގާފައިވެސް ނުވާ ކަމަށެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ