ކުޅުދުއްފުށީގެ ވިޔަފާރިވެރިންގެ ކަރަންޓް ބިލް ބޮޑުވެ މައްސަލަތައް އުފެދުނީ އެރަށުގެ ވިޔަފާރިތަކުން ނަގަން ޖެހޭ ހަމަ ރޭޓުން ބިލުކުރަން ފެށުމުން ކަމަށް ފެނަކަ ކޯޕޮރޭޝަނުން ބުނެފި އެވެ.
ފެނަކަ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ފެނަކަ ކޯޕަރޭޝަންގެ މެނޭޖަރު އަހުމަދު ނަޖާހު 2009 ވަނަ އަހަރު އެނާޖީ މިނިސްޓްރީން ކަރަންޓުގެ އަގު ނެގުމަށް ރޭޓުތަކެއް ފާސްކޮށްފައިވީ ނަމަވެސް ކުޅުދުއްފުށީގެ ވިޔަފާރިތަކުން މިހާ ތަނަށް ކަރަންޓަށް އަގު ނަގަމުން އައިސްފައިވަނީ ފާސްކޮށްފައިވާ ރޭޓަށް ވުރެ އެތައް ގުނައެއް ކުޑަކޮށް ކަމަށެވެ.
"400 ޔުނިޓަށް ވުރެ މަތިވީމާ ސަބްސިޑީ ދިނުމަކަށް ނުވެސް އޮވޭ، ނަމަވެސް ކުޅުދުއްފުށީގައި އައީ 400 ޔުނިޓަށްވުރެ މަތިވުމުން ވެސް ސަބްސިޑީ ދެމުން،" ނަޖާހު ވިދާޅުވި އެވެ.
ނޫސްވެރިންގެ މިއަދުގެ ބައްދަލުވުމުގައި ފެނަަކަ ކޯޕަރޭޝަންގެ މެނޭޖިން ޑިރެކްޓަރު މުހައްމަދު ނިމާލް ވިދާޅުވީ ކަރަންޓުގެ އަގު ނެގުމުގައި ގެންގުޅެމުން އައި އުސޫލުގެ ސަބަބުންނާއި ބޮޑު އަގުގައި ޑީސަލް ގަތުން ފަދަ ކަންކަން ފެނަކައިން ކޮށްފައިވާތީ ކުންފުނި އިނދަޖެހިފައި ވަނިކޮށް މިހާރު ކުންފުނި ވަނީ ނަގައި ކޮޅަށްޖެހިފައި ކަމަށާއި އެކުންފުނިން ގަނެފައިވާ ތެލަށް އެއްވެސް ފަރާތަކަށް ދައްކަންޖެހޭ ފައިސާއެއްވެސް މިހާރު ނުދައްކާ ނޯންނާނެ ކަަމަށެވެ.
ނިމާލް ވިދާޅުވީ ފެނަކަ ކުންފުނި ފައިދާ ހުރި ގޮތުގައި މިހާރު ހިންގޭތީ ލިބޭ އާމްދަނީ ބޭނުންކޮށްގެން ކުރަމުން ގެންދަނީ ރަށްރަށުގައި ކަރަންޓުގެ ހިދުމަތް ދިނުމަށް ތަރައްގީ ކުރަންޖެހިފައިވާ ކަންކަން ކުރުން ކަމަށެވެ. އަދި ދާދިފަަހަކާއި ޖެހެންދެން މުވައްޒަފުންގެ މުސާރަ ވެސް ދެމުން ދިޔައީ ފިނޭންސް މިނިސްޓްރީގެ އެހީތެރިކަން ހޯދައިގެން ކަމަށާއި ނަމަވެސް މިހާރު މުސާރަ ދިނުން ފަދަ ކަންކަން ކުރުމުގެ ގާބިލުކަން ކުންފުންޏަށް ލިބިފައިވާ ކަމުގައިވެސް ވިދާޅުވި އެވެ.
ނިމާލް ވިދާޅުވީ ފެނަކަ ކޯޕޮރޭޝަނުން ހިދުމަތްދޭ ރަށްރަށުގައި ވިޔަފާރި މީޓަރުގެ ގޮތުގައި ރަޖިސްޓްރީކޮށްފައިވަނީ 5765 މީޓަރު ކަމަށާއި އެމީޓަރު ތަކަށް ސަރުކާރުން ސަބްސިޑީގެ ގޮތުގައި ދެމުން އައީ މަހަކު 11 މިލިއަން ރުފިޔާ ކަަމަށެވެ. ވިޔަފާރިތަކަށް ސަބްސިޑީ ނުދިނުމަށް ސަރުކާރުން ނިންމުމާއި ގުޅިގެން ދެން މިފައިސާ ނެގޭނީ ވިޔަފާރިތަކުން ކަމަށްވެސް ނިމާލް ވިދާޅުވި އެވެ.
ނިމާލް އިތުރަށް ވިދާޅުވީ ކަރަންޓުގެ ސަބްސިޑީ ދިނުމަކީ ފެނަކަ ކޯޕޮރޭޝަނުން ކުރާ ކަމަކަށް ނުވާތީ އެކުންފުނިން ތަންފީޒުކުރަމުން ގެންދާނީ ސަރުކާރުން އެކަމުގައި ނިންމާ ނިންމުންތައް ކަމަށެވެ.
"ފެނަކަ އަކީ ސަބްސިޑީ ހަމަޖައްސާ ތަނެއް ނޫން. މިއީ ސަރުކާރުން ހަމަޖައްސާ ގޮތަކަށް ކަންކަން ތަންފީޒުކުރާ އިދާރާއެއް،" ނިމާލް ވިދާޅުވި އެވެ.