ދެކުނު އިރުމަތީ އޭޝިއާގައި ރާއްޖޭގެ ފަތުރުވެރިކަން އިޝްތިހާރުކުރުމަށް ރޯޑްޝޯއެއް ބޭއްވުމަށް ނިންމައިފިއެވެ.
'އައި އެމް މޯލްޑިވްސް ރޯޑްޝޯ' ގެ ނަމުގައި ބާއްވާ މި ރޯޑްޝޯއަކީ ނޭޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން އޮފް މޯލްޑިވްސް، އެންއެޗްޖީއޭއެމްއިން ވިޒިޓް މޯލްޑިވްސް އާއި މަޓާޓޯއާ ގުޅިގެން ބާއްވާ ރޯޑްޝޯއެކެވެ. މި ރޯޑްޝޯ ބޭއްވުމަށް ހަމަޖެހިފައިވަނީ މިމަހުގެ 13 ވަނަ ދުވަހު ހޮންކޮންގްގައި އަދި މިމަހުގެ 15 ވަނަ ދުވަހު މެލޭޝިއާގެ ކުއާލަލަމްޕޫރުގައެވެ.
މި ހަރަކާތުގައި ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ 20 ކުންފުންޏަކުން 50 އަށްވުރެ ގިނަ ބައިވެރިން ބައިވެރިވާނެއެވެ. މީގެތެރޭގައި ގެސްޓްހައުސްތަކާއި، ރިސޯޓްތަކާއި، ހޮޓާތަކުގެ އިތުރުން ޓްރެވަލް އެޖެންސީތައް ހިމެނެއެވެ. އަދި މި ދެ ސިޓީން 120 އަށްވުރެ ގިނަ ޓްރެވަލް ޓްރޭޑް ޕްރޮފެޝަނަލުން މި ރޯޑްޝޯގައި ބައިވެރިވުމަށްވެސް ވަނީ ހަމަޖެހިފައެވެ.
އެންއެޗްޖީއޭއެމްގެ ރައީސް އަބްދުﷲ ނަޝީދު ވިދާޅުވީ، މިއީ ރާއްޖޭގެ ރަށްރަށުގެ ފަތުރުވެރިކަން ބައިނަލްއަގުވާމީ މާކެޓްތަކުގައި އިޝްތިހާރުކުރުމަށް އެޅޭ މުހިންމު ފިޔަވަޅެއް ކަމަށެވެ. ވިޒިޓް މޯލްޑިވްސްގެ ސީއީއޯ އަދި އެމްޑީ އިބްރާހިމް ޝިއުރީ ވެސް ވަނީ ހޮންކޮންގް އަދި މެލޭޝިއާއަކީ ރާއްޖެއަށް މުހިންމު މާކެޓްތަކެއްކަން ފާހަގަކުރައްވާފައެވެ.
މީގެ އިތުރުން، މި ރޯޑްޝޯއަކީ މިއަހަރު ބައިނަލްއަގުވާމީ މާކެޓްތަކުގައި ރާއްޖެ އިޝްތިހާރުކުރުމަށް އެންއެޗްޖީއޭއެމްއިން ރާވާފައިވާ ގިނަ ހަރަކާތްތަކުގެ ފެށުމެއް ކަމަށާއި، މީގެ މައިގަނޑު މަގްސަދަކީ އޭޝިއާގެ މާކެޓްތަކުގައި ރާއްޖެއަކީ އެންމެ މަގުބޫލު މަންޒިލްގެ ގޮތުގައި ދެމެހެއްޓުން ކަމަށްވެސް ރައީސް ވިދާޅުވިއެވެ.
އެންއެޗްޖީއޭއެމްގެ ނައިބު ރައީސް އަހުމަދު ވަހީދު ވިދާޅުވީ، ސައުތު އީސްޓް އޭޝިއާއަކީ ރާއްޖެއަށް ބޮޑު ފުރުސަތުތަކެއް އޮތް ސަރަހައްދެއް ކަމަށާއި، މި ރޯޑްޝޯގެ ސަބަބުން އެ ސަރަހައްދުގައި ރާއްޖޭގެ މަގުބޫލުކަން އިތުރުވެ، ދެމެހެއްޓެނިވި ކުރިއެރުމަކަށް މަގުފަހިވާނެ ކަމަށެވެ.
ތަފާސްހިސާބުތަކަށް ބަލާއިރު، 2025 ވަނަ އަހަރު ޗައިނާއިން (ހޮންކޮންގް ހިމެނޭހެން) 706,033 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. މިއީ 2024 ވަނަ އަހަރާ އަޅާބަލާއިރު 12.1 އިންސައްތައިގެ ކުރިއެރުމެކެވެ. މީގެ އިތުރުން މެލޭޝިއާ މާކެޓުން 25.2 އިންސައްތައިގެ ބޮޑު ކުރިއެރުމެއް ފެނިފައިވާއިރު، ދެކުނު އިރުމަތީ އޭޝިއާ ސަރަހައްދުން 72,128 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ.