ޕާކިސްތާނުގެ ވެރިރަށް އިސްލާމްއާބާދުގައި އިއްޔެ 21 ގަޑިއިރަށް ކުރިއަށްދިޔަ މަޝްވަރާތަކަށް ފަހު، ހަނގުރާމަ ހުއްޓާލުމާ ގުޅޭ ގޮތުން އެމެރިކާ އާއި އީރާނަށް އެއްބަސްވުމަކަށް ނާދެވުމުން، ނާޒުކު ފައްތަރެއްގައި އޮތް ހަމަލާބަދަލުކުރުން މެދުކަނޑާލުމުގެ އެއްބަސްވުމަށް އަމަލުކުރެވިދާނެކަމާ މެދު ކަންބޮޑުވުން އިތުރުވެއްޖެ އެވެ.
ފާއިތުވި ދިހަ އަހަރަށް ވުރެ ގިނަ ދުވަހުގެ ތެރޭގައި ބޭއްވި ފުރަތަމަ މަތީ ފަންތީގެ ސީދާ މަޝްވަރާތަކުގައި ކުރިއެރުމެއް ނުލިބުމުގެ ޒިންމާ ދެ ފަރާތުން ވެސް އެޅުވީ އެއްބަސްވުމަކަށް ނާދެވުނު އަނެއް ފަރާތުގެ ބޮލުގަ އެވެ. އެމެރިކާގެ ނައިބު ރައީސް ޖޭޑީ ވެންސް ވިދާޅުވީ އީރާނުން މުހިންމު ހުށަހެޅުންތަކަކަށް އިންކާރުކޮށްފައިވާ ކަމަށެވެ.
"އަޅުގަނޑުމެންނަށް އެއްބަސްވުމަކަށް ނާދެވުނު... މިއީ އެމެރިކާއަށް ވުރެ ބޮޑަށް އީރާނަށް އޮތް ދެރަ ހަބަރެއް،" އިސްލާމްއާބާދުގައި ބޭއްވި ނޫސްވެރިންގެ ބައްދަލުވުމެއްގައި އޭނާ ވިދާޅުވި އެވެ.
ވެންސް ވިދާޅުވި ގޮތުގައި ވޮޝިންޓަނުގެ "ރެޑް ލައިން" ނުވަތަ ހުރަސްނުކުރެވޭނެ ރޮނގުތަކުގެ ތެރޭގައި، ނިއުކްލިއާ ހަތިޔާރު ނުވަތަ އެފަދަ ހަތިޔާރު އުފެއްދުމުގެ ގާބިލުކަން ހޯދުމަށް އީރާނުން މަސައްކަތް ނުކުރުން ހިމެނެ އެވެ.
"އެއީ މައިގަނޑު މަގްސަދަކީ. މި މަޝްވަރާތަކުން ހާސިލުކުރަން އަޅުގަނޑުމެން މަސައްކަތްކުރީ އެކަން،" އޭނާ ވިދާޅުވި އެވެ.
އީރާނުގެ އޮފިޝަލުން އެމެރިކާގެ ހުށަހެޅުންތައް ސިފަކުރެއްވީ އިންތިހާއަށް ބޮޑު ހުށަހެޅުންތަކެއްގެ ގޮތުގަ އެވެ. އެ ގައުމުގެ ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި، އީރާނުގެ ނިއުކްލިއާ ޕްރޮގްރާމާއި ހޮރްމޫޒް ކަނޑުއޮޅީގެ ކޮންޓްރޯލާ މެދު ދެ ފަރާތުގެ މެދުގައި ވަނީ ހިޔާލުތަފާތުވުންތައް އުފެދިފަ އެވެ. އީރާނުގެ ހާރިޖީ ވުޒާރާގެ ތަރުޖަމާނަކު ވިދާޅުވީ މަޝްވަރާތައް ކުރިއަށްދިޔައީ އިތުބާރު ނެތް މާހައުލެއްގައި ކަމަށާއި، ހަމައެކަނި އެއް ބައްދަލުވުމުން އެއްބަސްވުމަކަށް އާދެވޭނެ ކަމަށް އުންމީދުކޮށްގެން ނުވާނެ ކަމަށެވެ.
މި މަޝްވަރާތައް ބާއްވާފައިވަނީ މި ހަފުތާގެ ކުރީކޮޅު އެއްބަސްވި ދެ ހަފުތާގެ ހަމަލާބަދަލުކުރުން މެދުކަނޑާލުމުގެ މުއްދަތުގެ ތެރޭގަ އެވެ. ނަމަވެސް މަސްރަހު އަދިވެސް އޮތީ ވަރަށް ބޮޑަށް ނުތަނަވަސްކޮށެވެ. އީރާނުން އަދިވެސް އެދެމުންދަނީ ދަތިކުރުމުގެ ފިޔަވަޅުތައް އުވާލުމަށާއި ހަނގުރާމައިގެ ބަދަލު ދިނުމަށާއި ލުބުނާން ހިމެނޭ ގޮތަށް ސަރަހައްދީ ފެންވަރުގައި ހަމަލާބަދަލުކުރުން ހުއްޓާލުމުގެ ފުޅާ އެއްބަސްވުމަކަށެވެ.
ޕާކިސްތާނުގެ ހާރިޖީ ވަޒީރު އިސްހާގު ދާރު ވަނީ ހަމަލާބަދަލުކުރުން ހުއްޓާލުމުގެ އެއްބަސްވުން ދެމެހެއްޓުމަށް ދެ ފަރާތަށް ބާރުއަޅުއްވައި އެކަން ދެމެހެއްޓުމަކީ ކޮންމެހެން ކުރަންޖެހޭ ކަމެއް ކަމަށް ވިދާޅުވެފަ އެވެ.
މަޝްވަރާތައް މެދުކެނޑުމަކަށް އައިސްފައިވީ ނަމަވެސް، ބައެއް ތެޔޮ ޓޭންކަރުތައް މިހާރު ވަނީ ހޮރްމޫޒް ކަނޑުއޮޅިން ދަތުރުކުރަން ފަށާފަ އެވެ. ނަމަވެސް ގިނަ އުޅަނދުތަކެއް އަދިވެސް ދަތުރުނުކުރެވި ތާށިވެފައި އޮތުމަކީ ދުނިޔޭގެ ހަކަތައިގެ ސަޕްލައިއަށް ބުރޫއަރަމުންދާކަން ހާމަކޮށްދޭ ކަމެކެވެ.