އެމެރިކާގެ ރައީސް ޑޮނަލްޑް ޓްރަމްޕް، ސްޕެއިނާ އެކު އޮންނަ ވިޔަފާރީގެ ގުޅުންތައް ކަނޑާލާނެ ކަމަށް ވިދާޅުވެ ދެއްވި އިންޒާރަށް، ސްޕެއިނުގެ ބޮޑުވަޒީރު ޕެޑްރޯ ސަންޗޭޒް އިއްޔެ ވަރުގަދަ ރައްދެއް ދެއްވައިފި އެވެ.
ސަންޗޭޒް ވިދާޅުވީ އޭނާގެ ސަރުކާރުން ހަނގުރާމައަށް ނޫނެކޭ ބުނާނެ ކަމަށެވެ.
ސްޕެއިނުގެ ބޮޑުވަޒީރު ޕެޑްރޯ ސަންޗޭޒް ވަނީ، އެމެރިކާގެ ރައީސް ޑޮނަލްޑް ޓްރަމްޕް ދެއްވި އިންޒާރުތަކާ ދެކޮޅު ހައްދަވައި އަސްކަރީ ކުރިމަތިލުންތަކާ ދެކޮޅަށް އޭނާގެ ސަރުކާރުން ގެންގުޅޭ ސިޔާސަތު ދިފާއުކުރައްވާފަ އެވެ. އަދި ބައިނަލްއަގްވާމީ ގާނޫނުތަކާ ހިލާފުވުމުގެ ނުރައްކަލާ މެދު އޭނާ އިންޒާރު ދެއްވި އެވެ.
ޓީވީ މެދުވެރިކުރައްވައި ދެއްވި ބަޔާނެއްގައި ސަންޗޭޒް ވިދާޅުވީ، އީރާނަށް ހަމަލާދިނުމަށްޓަކައި އެމެރިކާގެ ސިފައިން ސްޕެއިނުގެ މޮރޯން އަދި ރޯޓާ ބޭސް ބޭނުންކުރުމުގެ ހުއްދަ ދިނުމަށް ސްޕެއިނުން ދެކޮޅު ހެދުމުން، އެމެރިކާއިން ވިޔަފާރީގެ ދަތިކުރުމުގެ ފިޔަވަޅު އަޅާނެކަމުގެ އިންޒާރު ދިން ނަމަވެސް، ހަނގުރާމައާ ދެކޮޅަށް ސްޕެއިނުން ގެންގުޅޭ ސިޔާސަތު ބަދަލުނުވާނެ ކަމަށެވެ.
"މިއީ އަޅުގަނޑުމެން [އީރާނުގެ] އާޔަތުއްލޯގެ ފަޅީގައި ތިބިތޯ ކުރެވޭ ސުވާލެއް ނޫން. އެކަކު ވެސް އެ ބޭފުޅުންނަށް ތާއީދެއް ނުކުރޭ،" ސަންޗޭޒް ވިދާޅުވި އެވެ.
"ސުވާލަކީ އަޅުގަނޑުމެން ތާއީދުކުރަނީ ސުލްހަ އާއި ބައިނަލްއަގްވާމީ ގާނޫނުތަކަށްތޯ ކުރެވޭ ސުވާލު. އެއްވެސް ގާނޫނާ ހިލާފު އަމަލަކަށް، އޭގެ ރައްދުގައި އަނެއްކާވެސް ގާނޫނާ ހިލާފު އަމަލެއް ހިންގައިގެން ނުވާނެ."
ޓްރަމްޕް މީގެ ކުރިން ވަނީ ސްޕެއިނަކީ ނޭޓޯގެ "ވަރަށް ގޯސް ބައިވެރިއެއް" ކަމަށް ސިފަކުރައްވައި ފާޑުވިދާޅުވެފަ އެވެ. އަދި "ސްޕެއިނާ އެކު އޮންނަ ހުރިހާ ވިޔަފާރިއެއް ކަނޑާލާނެ ކަމަށާއި، އެ ގާއުމާ އެއްވެސް ގުޅުމެއް ބާއްވަން ބޭނުންނުވާ" ކަމަށް ވިދާޅުވެ އިންޒާރު ދެއްވާފަ އެވެ.
ޔޫރަޕްގެ އިސް ލީޑަރުން ވަނީ ވަގުތުން ސްޕެއިނަށް ތާއީދުކުރައްވާފަ އެވެ.
ފަރަންސޭސި ރައީސް އެމަނުއެލް މެކްރޯން ސަންޗޭޒްއާ އެކު ސާބިތުވެ ހުންނެވިކަން ހާމަކުރެއްވިއިރު، ޔޫރަޕިއަން ކައުންސިލްގެ ރައީސް އެންޓޯނިއޯ ކޮސްޓާ ވިދާޅުވީ ޔޫރަޕްގެ އިއްތިހާދު އޮތީ ސާބިތުކަމާ އެކު ސްޕެއިނާ އެކުގައި ކަމަށެވެ.
ޖަރުމަނުގެ ޗާންސެލަރު ފްރީޑްރިކް މާޒް ވެސް ވަނީ ވިޔަފާރީގެ މުއާމަލާތްތަކުގައި ސްޕެއިން އެކަނި ބާކީ ނުކުރެވޭނެ ކަމުގެ އިންޒާރު ދެއްވާފަ އެވެ. އަދި ޔޫރަޕްގެ އިއްތިހާދުން އެމެރިކާއާ އެކު ޓެރިފްތަކާ ބެހޭ ގޮތުން މަޝްވަރާކުރަނީ މުޅި އިއްތިހާދު ގުޅިގެންކަން އޭނާ ފާހަގަކުރެއްވި އެވެ.
އީރާނުގެ ހަނގުރާމައާ ގުޅުންހުރި އެއްވެސް އަސްކަރީ ހަރަކާތެއްގައި ބައިވެރިވުމަށް ސްޕެއިނުން މިހާތަނަށް ވަނީ ދެކޮޅު ހަދާފަ އެވެ. ސަންޗޭޒް ވިދާޅުވި ގޮތުގައި، މިއީ ޔޫކްރެއިން އަދި ގާޒާގެ ހަނގުރާމަތަކާ މެދު ވެސް އޭނާގެ ސަރުކާރުން ގެންގުޅޭ ދެގޮތެއް ނުވާ ސިޔާސަތެކެވެ.