ސަރުކާރު ކުންފުނިތަކުން ބޯޑު ކޮމެޓީތައް އެކުލަވާލާނެ ގޮތުގެ ގައިޑްލައިނެއް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން އެކުލަވާލައިފި އެވެ.
ވީ ކިހިނެއް؟ - ޕީސީބީން ސަރުކާރު ހިއްސާވާ ކުންފުނިތަކަށް ފޮނުވި ސާކިއުލާއެއްގައި ބުނީ، މި ގައިޑްލައިން އެކުލަވާލީ ޕްރައިވަޓައިޒޭޝަން ގާނޫނުގެ ދަށުން ސަރުކާރު ކުންފުނިތަކާއި ވިޔަފާރި އުސޫލުން ހިންގާ ސަރުކާރު ތަންތަނުގެ ހިންގުން ހަރުދަނާކުރުމަށް ކަމަށެވެ.
ތަފްސީލް - މި ގައިޑްލައިންގެ މަގުސަދަކީ، އެ ސާކިއުލާގައި ބުނެފައިވާ ގޮތުގައި:
ބޯޑުގެ ކޮމެޓީތައް ހަރުދަނާކުރުން
ޕީސީބީން ހުއްދަދިނުމުގައި ބަލާ ކަންކަން ނަމޫނާ ޗާޓަރެއްގައި ހިމަނައި ހުއްދަ ދިނުމުގެ ކަންތައް އަވަސްކުރުން
ކުންފުނިތަކުގެ ބޯޑު ކޮމެޓީތަކުގެ ޗާޓަރުތައް އެކުލަވާލުމުގެ މަސައްކަތް އިތުރަށް ފަސޭހަކޮށްދިނުން
ޕީސީބީން ބުނީ، 'ކޯޑް އޮޕް ކޯޕަރޭޓު ގަވަނަންސް ފޯ ސްޓޭޓް އޯންޑް އެންޓަޕްރައިޒަސް'އަށް އަމަލުކުރަން ޖެހޭ ހުރިހާ ކުންފުނިތަކުން ވެސް ގައިޑްލައިނާ އެއްގޮތަށް ކުންފުނީގެ ކޮމެޓީތައް އެކުލަވާލަން ޖެހޭނެ ކަމަށެވެ. އަދި ސަރުކާރު ހިއްސާވާ އެ ނޫން ކުންފުނިތަކުން ވެސް މި ގައިޑްލައިނަށް އަމަލު ކުރުމަށް އެ އިދާރާ އިން ވަނީ ސާކިއުލާގައި އިލްތިމާސްކޮށްފަ އެވެ.