ހޯމް މިނިސްޓަރު އަލީ އިހުސާންގެ އަނބިކަނބަލުންނާއި ދަރިފުޅުގެ ވީޑިއޯއެއް، ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީނާއި އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު ނެންގެވި ކަމަށް ތުހުމަތުކުރި މައްސަލަ ސާބިތުވާވަރަށް ހެކި ހުރި ނަމަވެސް ދައުވާކުރުމުގެ ވިސްނުމެއް ނެތް ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެއެވެ. ކުރު ސީސީޓީވީ ފުޓޭޖަކާ އެކު، މިނިސްޓަރު މިދިޔަ މަހުގެ 27ވަނަ ދުވަހުގެ ރޭ ދަންވަރު ކުރެއްވި ޕޯސްޓުގައި ވަނީ، އޭގެ ކުރީ ދުވަހުގެ ހަވީރު އިބްރާހިމް ވަހީދާއި އަކްރަމް, އޭނާގެ އަނބިކަނބަލުންނާއި 10 އަހަރުގެ ދަރިފުޅު މަގުމަތިން ދަނިކޮށް ވީޑިއޯކޮށްފައިވާ ކަމަށް ވިދާޅުވެފައެވެ. https://sun.mv/218449 ރައީސް އޮފީހުގައި މިއަދު ހޯމް މިނިސްޓްރީގެ ފަރާތުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު އިހުސާން ވިދާޅުވީ ހަގީގަތުގައި އެކަން މައްސަލައަކަށްވީ އޭނާގެ 10 އަހަރުގެ ދަރިފުޅުގެ ވީޑިއޯއެއް ނެގުމުން ކަމަށެވެ. އަދި އެއީ އަލީ އިހުސާންގެ ދަރިފުޅު ވެގެން ނަގައިގެން އުޅޭ ފޮޓޮއެއް ވީޑިއޯއެއް ނޫން ކަމަށާއި، އެއީ ހޯމް މިނިސްޓަރަކަށް އޭނާ ހުންނަވާތީ، އޭނާއަށް ދޭ ސެކިއުރިޓީއާ ގުޅިގެން، އަދި އެ ސެކިއުރިޓީ އާއިލާއަށް ފޯރުކޮށްދެމުންދާތީ، އެކަމާ ކަންބޮޑުވެގެން ބަޔަކު ފާޅުކުރި ޚިޔާލެއް ކަމަށް އިހުސާން ވިދާޅުވިއެވެ. ދިވެހި ދައުލަތުގެ ރަސްމީ ފަރާތަކަށް، ދިވެހި ފުލުހުންގެ ފަރާތުން ސެކިއުރިޓީ އެސެސްމަންޓު ހަދައި، އެ ޚިދުމަތުން ފޯރުކޮށްދެމުންދާ ސެކިއުރިޓީ ޚިދުމަތަކާ ގުޅިގެން ސުވާލު އުފެދޭނަމަ އެ ޚިދުމަތާ ސުވާލުކުރުމަކީ އެންމެ ރަނގަޅު ގޮތް ކަމަށް އިހުސާން ވިދާޅުވިއެވެ. އޭގެ ބަދަލުގައި ސުވާލުއުފެދިގެން ފިލާ ތިބެ، ވީޑިއޯ ނަގައި ހެދުމަކީ ޒިންމާދާރުކަން ކުޑަ އަމަލެއް ކަމަށް އިހުސާން ވިދާޅުވިއެވެ. މިއަދުގެ ނޫސްވެރިންގެ ބައްދަލުވުމުގައި މިނިސްޓަރު އިހުސާން -- ފޮޓޯ/ ރައީސް އޮފީސް ހަމައެއާއެކު އެ ވީޑިއޯ ކޮށްފައިވަނީ އޭނާ ދިރިއުޅޭ ގޭގެ ކުރިމަތީގައި އެ ގޭގައި ހުރި ކެމެރާއެއްގެ ދަށުގައި ކަމަށާއި، ކެމެރާ ހުރިކަން ވެސް އެބޭފުޅުންނަށް އެނގިވަޑައިނުގަންނަވަނީ ކަމަށް، މަޖާޒީ ގޮތަކަށް އިހުސާން ވިދާޅުވިއެވެ. ރޯދަމަހެއްގެ ހަވީރު އަޅުކަމެއްގެ ގޮތުގައި ކުރަން ޖެހޭ ކަންކަން ކުރުމުގެ ބަދަލުގައި މިތިބީ ކުރާ ޣައިރު ޒިންމާދާރު ކަންކަން. ވަކިން ޚާއްސަކޮށް ކުޑަކުދިންގެ ކަރާމާތަށް އަރައިގަންނަ ގޮތަށް ކަންކަން ކުރާނަމަ އެމީހުންގެ ވާހަކަ އަޅުގަނޑުމެން ދައްކާނަން. ވަކިން ޚާއްސަކޮށް އަޅުގަނޑު ދައްކާނަން. ކުރިއަށް އޮތްތާ ވެސް ދައްކާނަން، ހޯމް މިނިސްޓަރު އަލީ އިހުސާން އެހެންކަމުން ތަހުގީގަކަށް ގޮސްފިނަމަ ވަރަށް ރަނގަޅަށް ސާބިތުވާވަރަށް އެ ގޭގެ ދެ ކެމެރާއެއްގެ ފުޓޭޖް އެބަހުރި ކަމަށް އިހުސާން ވިދާޅުވިއެވެ. އިހުސާން ވިދާޅުވީ އެ މީހަކު ރަސްމީ ހައިސިއްޔަތުން ކުރާ މަސައްކަތަކާ ގުޅިގެން ފުރައްސާރަ ކުރާނަމަ، އެ ވާހަކަ ދައްކާނީ ވެސް ރަސްމީ އެކައުންޓުތަކުން ކަމަށެވެ. އެހެންނަމަވެސް އެކަމުގައި ބަދަލު ހޯދަން ކޯޓަށް ދާން ނުވަތަ ޖިނާއީ މައްސަލައެއްގެ ގޮތުގައި ތަހުގީގުކޮށްދޭން ވެސް އެދިފައި ނުވާނެ ކަމަށް އިހުސާން ވިދާޅުވިއެވެ. އަދި އެދެންޖެހޭ ހާލަތަށް ގޮސްފިނަމަ އެކަންވެސް ކުރައްވާނެ ކަމަށް އިހުސާން ވިދާޅުވިއެވެ. ބޮޑެތި ފިރިހެނުން، 10 އަހަރު ނުވާ ކުޑަކުދިންނާއި އަދި ދައުލަތުގެ އެކިއެކި މަގާމުތަކުގައި ތިބޭ މީހުންގެ އާއިލާތަކާ ފުރައްސާރަކޮށް، ރަސްމީ ހައިސިއްޔަތުން ކުރާ މަސައްކަތުގެ ތެރެއަށް އާއިލާ ވައްދާކަމަށްވާނަމަ ރަސްމީ ހައިސިއްޔަތުން އެ ވާހަކަތައް ދައްކަވާނެ ކަމަށް އިހުސާން ވިދާޅުވިއެވެ. މިދެ ބޭފުޅުންނަކީ ކުރީގެ ދައުލަތުގެ ވެރިން. ބޮޑެތި ކުންފުނިތަކުގެ އެމްޑީކަން ކުރައްވާފައި ތިއްބެވީ. ދައުލަތުގެ މިނިސްޓްރީތަކުގެ ސްޓޭޓް މިނިސްޓަރުކަން ކުރައްވާފައި. މިއަށްވުރެ ޒިންމާދާރުވާންޖެހޭނެ. ދެން ތިމާ މީހާއަށް ކުށެއްކުރެވުނީމަ އައިސް މައާފަށް އެދެންވީ ނޫންތޯ؟ ނުވަތަ އެކަން ރަނގަޅުކޮށްލީމާ އެކަން ނިމުނީނޫންތޯ؟ ރަސްމީ އެއްޗަކުން ކުރިޔަސް ނުކުރިޔަސް ކަން ވާނީ ކަމަށް ނޫންތޯ؟ އަބުރުގެ ދައުވާ ވެސް ކުރަންވީ. އަޅުގަނޑު މިހުރީ ޖަވާބުދާރީވާން ތައްޔާރަށް. އަޅުގަނޑަށް ކެރޭނެ ޖަވާބުދާރީވާން، ހޯމް މިނިސްޓަރު އަލީ އިހުސާން މިނިސްޓަރުގެ ރަސްމީ އެކައުންޓުން ހާމަކުރެއްވި ވީޑިއޯއިން ފެންނަ ގޮތުގައި، އިބްރާހިމް ވަހީދު ވީޑިއޯއެއް ނަންގަވާއިރު، އަކްރަމް ކައިރީގައި ހުންނަވައެވެ. އަދި، އިތުރު މީހަކު އެ ދެމީހުން ކައިރީ ސައިކަލެއްގައި މަޑުކޮށްލައިގެން އިންނަ މަންޒަރު ވީޑިއޯއިން ފެނެއެވެ. އަދި ކާކުކަން ނޭނގޭ އެކައުންޓަކުން އެ ދެ މީހުން ނެގި ވީޑިއޯ ޕޯސްޓުކޮށްފައިވާ ކަމަށް މިނިސްޓަރު ވަނީ ވިދާޅުވެފައެވެ. https://sun.mv/218460 ވީޑިއޯއިން ފެންނަނީ، މާލޭގެ މަގެއް މަތިން އަންހެނަކާއި ކުޑަ ދެ ކުދިން ދާ މަންޒަރެވެ. އެއް ކުއްޖަކު ބައިސްކަލެއްގައި ދިޔައިރު، ކައިރީގައި ފިރިހެނަކު ހުންނަ މަންޒަރު ފެނެއެވެ. އެ ވީޑިއޯގައި ތުހުމަތުކޮށްފައިވާ ގޮތުގައި، އެ މީހަކީ، ބޮޑީގާޑެކެވެ. އެ މައްސަލައިގައި އެމްޑީޕީގެ ކުރީގެ ޗެއާޕާސަން ފައްޔާޒު އިސްލާއީމް ވަނީ އެފަދައިން އާއްމުންގެ ވީޑިއޯއެއް އާއްމު ނުކުރެވޭނެ ކަމަށާއި، އެކަށީގެންވާ ސަބަބެއް އޮތްނަމަ އެމީހުންނާ މެދު ގާނޫނީ ފިޔަވަޅު އަޅަން ގޮވާލައިފައެވެ.