ހޯމްލޭންޑް މިނިސްޓަރު އަލީ އިހުސާންގެ އާއިލާގެ ވީޑިއޯއެއް މަގުމަތިން ނަގައި ސޯޝަލް މީޑިއާގައި އާއްމު ކުރި ކަމަށް ކުރި ތުހުމަތުތައް ސާބިތުކޮށްދެވޭ ވަރަށް ހެކި އެބަހުރި ކަމަށާއި އެ މައްސަލާގައި އަބުރުގެ ދައުވާކުރިޔަސް ޖަވާބުދާރީވާން ތައްޔާރު ކަމަށް މިނިސްޓަރު އިހުސާން މިއަދު ވިދާޅުވެއްޖެ އެވެ.
ވީ ކިހިނެއް؟ - ކާކުކަން ނޭނގޭ ގޮތަށް ހިންގާ 'ހަސަން ކުރުސީ'ގެ އެކައުންޓުން މިދިޔަ ހުުކުރު ދުވަހު ވަނީ، އިހުސާންގެ އަނބިކަނބަލުން ދެ ކުޑަކުއްޖަކާ އެކު މަގު ހުރަސް ކުރާ ތަން ފެންނަ ވީޑިއޯއެއް އާއްމުކޮށް، ދަރިފުޅު ގޮވައިގެން ޕާކަށް ދިއުމުގައި ވެސް ބޮޑީގާޑުން ބޭނުންކުރާތީ އެއީ އާއްމުންގެ ޓެކްސް ފައިސާ ނަހަމަ ގޮތުގައި ބޭނުންކުރުން ކަމަށް ސިފަކޮށް ފާޑުކިޔާފަ އެވެ.
އެ މީހުންގެ ފުރަގަހުން، ދުރުން ނަގާފައިވާ އެ ވީޑިއޯ ރެކޯޑްކުރީ، ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން އާއި އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު ކަމަށް އިހުސާން ވަނީ ތުުހުމަތުކުރައްވާފަ އެވެ. އެ ތުހުމަތާ އެކު، އަކްރަމް އާއި ވަހީދު މަގުމަތީގައި ތިބެގެން ވީޑިއޯއެއް ނަގާ ތަން ފެންނަ ސީސީޓީވީ ފުޓޭޖެއް 'އެކްސް'ގައި އިހުސާން އާއްމުކުރެއްވި އެވެ. އެކަމަކު އަކްރަމް އާއި އިބްރާހިމް ވަހީދު ވީޑިއޯ ކުރީ ސީދާ ކޮން ތަނެއް ކަމެއް އެ ފުޓޭޖަކުން ނޭނގެ އެވެ. 
މިކަމާ ގުޅިގެން އިބްރާހިމް ވަހީދު އާއި އަކްރަމް ވިދާޅުވެފައިވަނީ، އެ ތަނުގައި ތިބެގެން އިހުސާން އެ ވިދާޅުވާ ފަދަ ވީޑިއޯއެއް ނުކުރާ ކަމަށާއި އެއީ ހަގީގަތެއް ނެތް "ބުހުތާނު ދޮގެއް" ކަމަށެވެ. ނުކުރާ ކަމެއް ބޮލުގައި އެޅުވުމުގެ އިތުރުން، އެކަން ފުލުހަށް ހުށަހަޅައިގެން ބެލުމުގެ ބަދަލުގައި މަގާމުގެ ނުފޫޒު ނަހަމަގޮތުގައި ހިފައި، ސޯޝަލް މީޑިއާގައި ސީސީޓީވީ ފުޓޭޖެއް އާއްމުކުރުމުން، އަބުރުގެ ދައުވާ ކުރުމުގެ އިތުރުން، އެ މައްސަލަ ފުލުހަށް ވެސް ހުށަހަޅާނެ ކަމަށް އެ ދެ ބޭފުޅުން އެ ދުވަހު ވިދާޅުވި އެވެ.
ބުނީ ކީކޭ؟ - ހޯމްލޭންޑް މިނިސްޓްރީން މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އެކަމާ ގުޅޭ ގޮތުން ނޫސްވެރިޔަކު ސުވާލުކުރުމުން އިހުސާން ވިދާޅުވީ، އެ ވީޑިއޯކުރީ އިހުސާންގެ ގޭގެ ކައިރީގައި ތިބެގެން ކަމަށާއި ގޭގެ ދެ ކެމެރާއަކަށް ވަރަށް ސާފުކޮށް އެ މަންޒަރު އަރާފައިވާ ކަމަށެވެ.
އިހުސާން ވިދާޅުވީ:
ރަސްމީ އެކައުންޓުން އެ ވާހަކަ ހިއްސާކުރީ، ރަސްމީ ހައިސިއްޔަތަކުން ދޭ ހިމާޔަތަކާ ގުޅޭ ގޮތުން ސުވާލު އުފައްދާފައިވާތީ
ކުޑަކުދިންގެ ކަރާމާތަށް ގެއްލުންވާ ކަންކަން ކުރާ ނަމަ އެ ވާހަކަ ކުރިއަށް އޮތް ތަނުގައި ވެސް ދައްކާނަން
އެ މައްސަލަ ޖިނާއީ މައްސަލައެއްގެ ގޮތުގައި ތަހުގީގުކޮށްދޭން އެދިފާ ނުވަނީ އެކަން ކުރަން ނުފެންނާތީ
ތިމާއަށް ލިބިފައިވާ ހައްގުގެ ބޭނުންކުރާއިރު އަނެކާގެ ހައްގުތަކަށް އަރައިގަނެގެން ނުވާނެ
އެ ދެ ބޭފުޅުންނަކީ ދައުލަތުގެ އިސް މަގާމުތައް ފުރުއްވާފައިވާ ބޭފުޅުންނަށްވުމުން، އެއީ ވަރަށް ޒިންމާދާރުކަން ކުޑަކޮށް ކުރި ކަމެއް
"އަޅުގަނޑަށް ފެނުން ފަހުން ނޫސްތަކުން އަނބުރުގެ ދައުވާކުރާނެ ވާހަކަ. ހަމަ ކުރަންވީ. އަޅުގަނޑަށް ކެރޭނެ ޖަވާބުދާރީވާން. ސުވާލަކީ އެ ބޭފުޅުންނަށް ޖަވާބުދާރީވެވޭނެތޯ،" އިހުސާން ވިދާޅުވި އެވެ.
"ދަންނަވަންތޯ ދެ ކެމެރާ އެއްފަހަރާ އަޅުވާފައި ހުންނަ ހާލަތުގައި އެ ދެ ކެމެރާގެ ގަޑި ދިމާވާ ހާލަތުގައި ތަސައްރަފު ފުދިފައިވާ ކޮންމެ މީހަކަށް ވެސް އެނގޭނެ އެކަންވާ ގޮތް. ހަމަ ގައިމު ވެސް އަަޅުގަނޑަށް ވަރަށް ސާފު. އެއްވެސް ގާނޫނީ ހަމަތަކުގެ މަތިން ތަނަކަށް އެ ސާބިތުކޮށްދޭން ޖެހިއްޖެއްޔާ އެ ހެކި އަޅުގަނޑުގެ އަތުގައި އެބަހުރި. އެހެންވީމާ އަޅުގަނޑަށް ވަރަށް ފަސޭހަވާނެ އެ ހެކި ދައްކަން."
އިހުސާން ވިދާޅުވީ، ސޯޝަލް މީޑިއާގައި ވީޑިއޯ ހިއްސާކޮަށް އެ ވާހަކަ ދެއްކީ ސާބިތުކުރެވޭ ވަރަށް ހެކި ހުރުމުން ކަމަށެވެ. ތުހުމަތު ރައްދުވާ މީހުން އެކަމާމެދު ސުވާލު އުފެދޭ ނަމަ ގާނޫނީ ގޮތުން ހުށަހަޅަންޖެހޭ ތަންތަަނަށް ހުށަހަޅައިގެން ކުރިއަށް ދާންވީ ކަމަށާއި އޭރުން ޖަވާބުދާރީވާން ޖެހޭ ހާލަތުގައި ޖަވާބުދާރީވެސް ވާނެ ކަމަށް އިހުސާން ވިދާޅުވި އެވެ.
އިހުސާން ވިދާޅުވީ އެ ގޭގެ ކެމެރާ ނޫނަސް، އެ ސަރަަހައްދުގައި ދައުލަތުގެ އެކި މުވައްސަސާތަކުގެ ކެމެރާތައް ވެސް އެބަހުރި ކަމަށާއި ފުލުހުން އެ މައްސަލަ ބަލާ ހާލަތުގައި އެ ކެމެރާތައް ބަލައިގެން ވެސް ކުރާ ތުހުމަތުތައް ސާބިތުކުރެވޭނެ ކަމުގެ ޔަގީންކަން އެބައޮތް ކަމަށެވެ.
"އަޅުގަނޑަށް ބޮޑަށް ބެލެވެނީ އެބޭފުޅުން އެކަން ކުރިއިރު ވިސްނިވަޑައިނުގަތީ ކެމެރާތަކެއްގެ ކުރިމަތީގައި ތިބެގެންކަން މިކަން މިކުރެވުނީ. އެހެންވީމާ އެ ދެބަސްވުމެއް ނޫން ގެންގުޅެންވީ. ދެން ވެސް ކުރެވުނު ކުށް ގަބޫލުކުރަންވީ،" އިހުސާން ވިދާޅުވި އެވެ.