ބޭހުގެ ފެންވަރު ރަނގަޅުވަނީ ޔޫރަޕުގައި އުފައްދައިގެން ނޫން ކަމަށާއި ބޭސް އުފައްދާ ގައުމު ނުވަތަ ބައްރަކަށް ބެލުމަށް ވުރެ މުހިންމީ ބޭހުގެ ކޮލިޓީ ކަށަވަރުކުރުން ކަމަށް ހެލްތު މިނިސްަޓަރު އަބްދުﷲ ނާޒިމް މިއަދު ވިދާޅުވެއްޖެ އެވެ.
އެނގުން މުހިންމު - ނާޒިމް މިހެން ވިދާޅުވީ 'އާދައިގެ ބޭސް' ގެނައުން ނިމުމަކަށް ގެނެސް، ސީދާ ޔޫރަޕުން ފެންވަރު ރަނގަޅު ބޭސް ގެންނާނެ ކަމަށް މީގެ ކުރިން ރައީސް މުހައްމަދު މުއިއްޒު ވިދާޅުވެފައިވަނިކޮށެވެ.
ރައީސްގެ ވާހަކަފުޅު އެ ދުވަހު ހުރީ، ފެންވަރު ރަނގަޅުވާނީ ޔޫރަޕާއި އެމެރިކާގައި އުފައްދާ ބޭސް އެކަންޏޭ ބުނާ ފަދަ މޭރުމަކަށެވެ.
""އާދައިގެ ބޭސް [ގެނައުން] ނިމުކަކަށް ގެނެސް، ސީދާ އުފައްދާ ތަނުން، ޔޫރަޕުންނާއި އެމެރިކާއިން އިރާދަކުރެއްވިއްޔާ އަޅުގަނޑުމެން ބޭސް އެތެރެ ކުރުން ބަދަލު ކުރާނަން،" ޗައިނާއަށް ކުރެއްވި ފުރަމާނަ ދަތުރުފުޅަކަށް ފަހު، 13 ޖެނުއަރީ 2024ގައި ރާއްޖެ ވަޑައިގެން، ވެލާނާ އިންޓަނޭޝަނަލް އެއާޕޯޓް (ވީއައިއޭ)ގައި ނޫސްވެރިންނާ ބައްދަލުކުރައްވައި ދެއްވި ބަޔާނުގައި ރައީސް ވިދާޅުވި އެވެ.
"އެކަންތައް މިހާރު ވަނީ ފެށިފައި. އިރާދަކުރެއްވިއްޔާ އަޅުގަނޑުމެންގެ ގައުމަށް ދެން މާ ލަސްތަކެއް ނުވެ، އެތެރެ ކުރާނީ ޔޫރަޕްގެ އަސްލު ބޭސް އުފައްދާ ތަންތަނުންނާއި އެމެރިކާގެ ތަންތަނުން."
ބުނީ ކީކޭ؟ - މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން މިނިސްޓަަރު ނާޒިމް ވިދާޅުވީ ކޮލިޓީ ރަނގަޅު ބޭސް ގެނައުމަކީ ސަރުކާރުން އަބަދުވެސް ގެންގުޅޭ ސިޔާސަތެއް ކަމަށެވެ.
ނަމަވެސް، މިނިސްޓަރު ވިދާޅުވީ ފެންވަރު ރަނގަޅުވުން މާނަކުރަނީ 'ޔޫރަޕު ކޮލިޓީ'ގެ ގޮތުގައި ނޫން ކަމަށެވެ.
"ކޮލިޓީ ރަނގަޅު ބޭސް އިންޑިއާގައި ވެސް އުފައްދާނެ، ބަންގްލަދޭޝްގައި ވެސް އުފައްދާނެ. އެހެންވީމަ އަޅުގަނޑުމެން ކޮލިޓީ ބަލާ މިންގަނޑުތަކެއް، އުސޫލުތަކެއް މި ހުންނަނީ،" ނާޒިމް ވިދާޅުވި އެވެ.
"ޔޫރަޕަށް ގެންދާ ވަރަށް ގިނަ ބޭހަކީ އިންޑިއާގައި އުފައްދާ ބޭސް، ނޫނީ ޕާކިސްތާނު ނޫނީ އެހެން ތަންތަނުގައި އުފައްދާ ބޭސް. މީގައި މުހިންމީ އުފައްދާ ތަނެއް، އުފައްދާ ގައުމެއް ނޫން ކަންނޭނގެ، އޭގެ ކޮލިޓީ ކަށަވަރު ކުރެވޭ، ރަނގަޅު ބޭސް އަޅުގަނޑުމެންނަށް ލިބޭނެކަން ކަށަވަރުކުރުން."
މިނިސްޓަރު ވިދާޅުވީ އެކަން ކަށަވަރުކުރަން ކުރަންޖެހޭ މަސައްކަތްތައް ތަރުތީބުކުރަމުން އަންނަ ކަމަށެވެ.
"ކޮންމެހެން ޔޫރަޕު، އޭޝިއާ، މިއެއް ނޫން އަޅުގަނޑުމެންގެ ފޯކަސްއަކީ. އަޅުގަނޑުމެންގެ ފޯކަސްއަކީ ރައްޔިތުންނަށް ކޮލިޓީ ކަށަވަރުކުރެވޭ، ކޮލިޓީ ކޮމްޕްރޮމައިޒްނުކުރެވޭ، ބޭސް ފޯޜުކޮށްދިނުމުގެ ނިޒާމް. އެ ނިޒާމު އަޅުގަނޑުމެން ވަރުގަދަކުރަނީ،" އޭނާ ވިދާޅުވި އެވެ.
ފާހަގަކޮށްލެވޭ ކަމެއް - ޔޫރަޕާއި އެމެރިކާއިން ބޭސް ގެންނާނެ ކަމަށް ރައީސް ވިދާޅުވި ދުވަސްކޮޅަކީ ރާއްޖެ އާއި އިންޑިއާއާ ދެމެދު ގުޅުން ގޯސްވެފައި އޮތް ދުވަސްވަރެކެވެ.
ރާއްޖެއިން އެންމެ ގިނަ އަދަދަކަށް ބޭސް އެތެރެ ކުރަނީ އިންޑިއާއިން ކަމަށްވާއިރު، އެ ގައުމަށް ބަރޯސާވެގެން ކުރާ ގިނަ ކަންކަން ނިމުމަކަށް ގެނައުމަށް އަމާޒު ހިފާފައިވާކަމަށް ވެސް ރައީސް އެ ދުވަހު ވަނީ ވިދާޅުވެފަ އެވެ.
"އެހެންވީމަ، ވަކި ގައުމަކުން ބޭސް ގެނައުން އިރާދަކުރެއްވިއްޔާ ނިމުމަކަށް އަންނާނެ... އަޅުގަނޑުމެން އަމިއްލަ ފައިމައްޗަށް އިރާދަކުރެއްވިއްޔާ ތެދުވާނީ ވަކި ބަޔަކަށް ބަރޯސާވުން ނިމުކަކަށް ގެނެސް،" އެ މަނިކުފާނު އެ ދުވަހު ވިދާޅުވި އެވެ.
ރައީސް އެހެން ވިދާޅުވުމަށް ފަހު، އެ އަހަރުގެ ޖުލައިގައި 'ޔޫރަޕު ކޮލިޓީ'ގެ 7 ބޭހެއް ގެނެސް، އެސްޓީއޯއިން ވިއްކަން ވެސް ފެށި އެވެ.