ތުރުކީގެ 40 އަށްވުރެ ގިނަ ޕޮރޮވިންސުން ކަރަންޓު ކަނޑައިގެން ދިޔުމާ ގުޅިގެން އާއްމުންނަށް ބޮޑެތި އުނދަގޫތަކާ ކުރިމަތިލާން ޖެހިއްޖެއެވެ.
ތުރުކީގެ 81 ޕްރޮވިންސްގެ ތެރެއިން 40 އަށްވުރެ ގިނަ ޕްރޮވިންސުން ކަރަންޓް ކަނޑައިގެން ގޮސްފައިވާއިރު، މީގެތެރޭގައި އަންކާރާ އާއި އިސްތަންބޫލް ވެސް ހިމެނެ އެވެ.
ކަރަންޓް ކަނޑައިގެން ދިޔުމާއި ގުޅިގެން ރޭލު ދަތުރުތަކަށް ބުރޫ އަރާފައިވާއިރު، ބައެއް ފްލައިޓްތަށް ޑިލޭ ނުވަތަ ކެންސަލް ކޮށްފައިވާ ކަމަށްވެސް ރިޕޯޓުތަށް ބުނެއެވެ.
ތުރުކީގެ އެނާޖީ މިނިސްޓަރު ތެނާ ޔިލްދިޒް ވިދާޅުވީ، މިފަދަ ހާދިސާތަކަކީ އާއްމުކޮށް ތުރުކީއަށް ކުރިމަތިވާ ހާދިސާތަކެއް ނޫންކަމަށާއި، މިކަން ހައްލުކޮށް އަލުން ކަރަންޓްގެ ހިދުމަތް ދިނުމަށް މަސައްކަތްކުރަމުންދާ ކަމަށެވެ.
"ޓެރެރިޒަމާ މިކަމާ ގުޅުމެއް ވޭތޯ ނުވަތަ ނޫންކަންވެސް މިވަގުތު ދަންނަވަން ދަތި. ނުވަތަ މިއީ ސައިބާ އެޓެކެކޭ ވެސް މިވަގުތު އަދި ދަންނަން ދަތި" އޭނާ ވިދާޅުވިއެވެ.
އެނާޖީ މިނިސްޓަރު ވިދާޅުވީ، ކަރަންޓް ކަނޑައިގެން ގޮސްފައިވަނީ، މިއަދު ހެނދުނު 10:36 ގައި ކަމަށާއި މި ހާދިސާއާ ގުޅިގެން ސަރުކާރުން "ކްރިއިސިސް ސެންޓަރު" ތަށް ގާއިމުކޮށްފައިވާ ކަމަށެވެ.
ތުރުކީގެ ބައެއް އޮފިޝަލުން ހާމަކުރައްވާ ގޮތުގައި މިއީ، މިދިޔަ 15 ވަރަކަށް އަހަރު ތެރޭ ތުރުކީ އަށް ދިމާވި ކަރަންޓުގެ އެންމެ ބޮޑު މައްސަލައެވެ.