(ގދ. ތިނަދޫ) މިރަށަށް ދާއިމީ ގޮތެއްގައި ކަރަންޓު ދިނުމަށް ބޭނުންވާ ޖަނަރޭޓަރުތައް ގެނެސްފިއެވެ.
މާލެއިން ގެނައި ދެޖަނަރޭޓަރު ހިފައިގެން އައި ކޮޅުވެއްޓި މިރަށަށް ބަނދަރުކޮށްފައިވަނީ ހެނދުނު 7:20 ހާއިރެވެ. މިދެޖަނަރޭޓަރަކީ އެއްމެގަވޯޓްގެ ދެޖަނަރޭޓަރެވެ. އެއީ ސްޓެލްކޯގެ ޖަނަރޭޓަރަކާއި އެމްޑަބްލިއުއެސްސީގެ ޖަނަރޭޓަރެކެވެ.
މިރަށަށް ކަރަންޓްގެ ޚިދުމަތް ފޯރުކޮށްދޭ ފެނަކައިން މިއަދު ބުނީ ޖަނަރޭޓަރުތައް ތިނަދުއަށް ގެންދާތާ ބާރަ ގަޑިއިރުތެރޭގައި ކަރަންޓް ދެވޭނެ ކަމަށެވެ. އެހެންކަމުން މިރޭ އަށެއް ޖެހުމުގެ ކުރިން މިރަށަށް ކަރަންޓު ލިބޭނެ ކަމުގެ ވަރަށް ބޮޑު ޔަޤީންކަމެއް ވަނީ ލިބިފައެވެ. މިރަށު ކައުންސިލުން ވެސް ވަނީ މިރޭގެ ވަގުތެއްގައި ކަރަންޓު ދެވޭނެ ކަމަށް ބުނެފައެވެ.
ހަތަރު ދުވަސް ފަހުން މިރަށަށް ކަރަންޓު ލިބުނު ނަމަވެސް ކުރީގެ ހާލަތަށް ރުޖޫއަވުމަށް ދެމަހެއްހާ ދުވަސް ނަގާނެކަމަށް ފެނަކައިން ވަނީ ބުނެފައެވެ.