ފޮރިން މިނިސްޓަރު އަބްދުﷲ ޝާހިދު ހދ.ނޭކުރެންދޫއަށް ވަޑައިގަންނަވާތީ، އޭނާ އަށް މަރުހަބާ ދެންނެވުމަށް އެރަށު ފެނަކަ އޮފީހުގެ މުވައްޒަފުން ދިޔުމަށް އަންގައިފިއެވެ.
ނޭކުރެންދޫ ފެނަކަ ބްރާންޗުގެ މުވައްޒަފުންނަށް އެ އޮފީހުގެ އިސް މުވައްޒަފަކު ފޮނުވި މެސެޖެއްގައި ބުނެފައިވަނީ މިއަދު އެމްޑީޕީގެ ލީޑަރޝިޕްގެ ބޭފުޅުން އެރަށަށް ވަޑައިގަންނަވަން ހަމަޖެހިފައިވާތީ ހުރިހާ މުވައްޒަފުން 2:40 އަށް ބަނދަރަށް ހާޒިރުވުމަށް އެ ދާއިރާގެ މެމްބަރު ރާއީ އަދި ނޭކުރެންދޫ ކެމްޕެއިން ޓީމުން އެދޭކަމަށެވެ.
"ދިޔަރެސް" އަށް އެރަށުން މައުލޫމާތު ދެއްވި ބޭފުޅަކު ވިދާޅުވި ގޮތުގައި މި އެންގުމަށް އަމަލު ނުކުރާ މުވައްޒަފުންގެ ވަޒީފާ ގެއްލޭނެ ކަމުގެ ބިރު އެބައޮތް ކަމަށެވެ.
ފެނަކައިގެ އިތުރުން އެހެން ސަރުކާރު ކުންފުނިތަކާއި ސަރުކާރު އޮފީސް ތަކުގެ މުވައްޒަފުންވެސް އެމްޑީޕީ ލީޑާޝިޕަށް މަރުހަބާ ކިޔުމަށް ނިކުތުމަށް އަންގާފައިވާ ކަމަށް މައުލޫމާތުލިބެއެވެ.
ރައީސް އިބްރާހީމާއި ސަރުކާރުގެ އިސްވެރިން އެކި ރަށްރަށަށް ވަޑައިގަންނަވާއިރު މަޖުބޫރުކޮށްގެން ސަރުކާރު ކުންފުނިތަކުގެ މުވައްޒަފުން ގެންދިޔުމަކީ ވަރަށް އާންމުކަމެކެވެ.