ރަޖިސްޓަރީ ކޮށްގެން ހިންގާތާ އަހަރު ދުވަސްވެފައިވާ ހުރިހާ މީޑިއާއަކަށް ވެސް އެހީ ދިނުން ހިމެނޭ ގޮތުން ބައެއް ބަދަލުތަކާ އެކު، މީޑިއާތަކަށް ދައުލަތުން ފައިސާގެ އެހީ ދިނުމުގެ އާ އުސޫލު މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުން އެކުލަވާލައި މިއަދު ގެޒެޓްކޮށްފި އެވެ.ރައީސް ޑރ. މުހައްމަދު މުއިއްޒުގެ ވައުދާ އެއްގޮތަށް މީޑިއާތަކަށް ދައުލަތުން މާލީ އޭހީދޭނެ އުސޫލު ފުރަތަމަ އެކުލަވައިލީ ޔޫތު މިނިސްޓްރީންނެވެ. އޭރު އެކުލަވައިލި އުސޫލުގައިވާ ގޮތުން އެހީ ދިނުމުގެ އެއް ޝަރުތަކީ ރަޖިސްޓަރީ ކޮށްގެން ހިންގާތާ ތިން އަހަރު ވެފައި ވުމެވެ. ފައިސާ ދޭނެ އަދަދު ކަނޑައެޅުމުގައި މީޑިއާތަކުގެ މުވައްޒަރުންގެ އަދަދަށް ރިއާޔަތް ކުރުމެއް އެ އުސޫލުގައި ނެތެވެ.އެ އުސޫލު އުވާލައި، މީޑިއާ ކޮމިޝަނާ ހަވާލުކޮށްގެން އެކުލަވާލައި މިއަދު ގެޒެޓްކުރި އުސޫލުގައިވާ ގޮތުން، އެހީ ދިނުމުގެ އެއް ޝަރުތަކީ ޖެނުއަރީ 2024 އިން ފެށިގެން ރަޖިސްޓަރީކޮށް، ލައިސަންސް ލިބިގެން މެދުނުކެނޑި ހިންގަމުން ގެންދިއުމެވެ.މީޑިޔާގެ މުއްދަތަށް 10 މާކްސް، މުވައްޒަފުންގެ އަދަދަށް 15 މާކްސް، މީޑިޔާ ކުރިއެރުވުމަށް ހުށަހަޅާ ކަންކަމަށާއި، ކޮންޓެންޓާއި ބާވަތް އަދި މާކްސް ކަނޑައަޅާފައިވާ ގޮތަށް 30 މާކްސް އަދި މުވައްޒަފުންގެ ތައުލީމީ ފެންވރާއި ތަޖުރިބާއަށް ބަލައި 10 މާކްސް ލިބޭ ގޮތަށް އޮތެވެ. އަދި އިދާރީ އިންތިޒާމުތަކަށް 20 މާކްސް ކަނޑައަޅާފައިވެއެވެ. އުސޫލާއެކު މި ގިންތިތަކުން މާކްސްދިނުމުގައި ގެންގުޅޭނެ މިންގަނޑު ޖަދުވަލުގައި ހިމަނާފައިވެއެވެ. އެ ޖަދުވަލުން ކޮންމެ މިންގަނޑަކުން މާކްސް ލިބޭނެ ގޮތް އެނގެއެވެ. ދައުލަތުން މީޑިއާތަކަށް ފައިސާ ދިނުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވައުދުފުޅެކެވެ. އެގޮތުން، ރާއްޖޭގައި ރަޖިސްޓްރީ ކޮށްގެން ހިންގާ އަމިއްލަ މީޑިއާތަކަށް ބަޖެޓުގެ އަންދާޒާކުރެވޭ އާމްދަނީގެ 0.1 އިންސައްތަ ދިނުމަށް ވަނީ ނިންމަވައިފައެވެ.