ކައުންސިލް އިންތިހާބުގައި އިދިކޮޅު އެމްޑީޕީގެ ޓިކެޓްގައި ހުޅުމާލެ އުތުރު ދާއިރާއަށް ވާދަކުރައްވާ ފާތިމަތު ޒަހިއްޔާ (ޒާޔާ) މިދިޔަ އޮކްޓޯބަރު މަހު ފޭސްބުކްގައި ޖެހި ޕޯސްޓަކާ ގުޅިގެން މިއަދު ފުލުހަށް ހާޒިރުވުމަށް އިއްޔެ އެންގުމަށް ފަހު މިއަދު އެ ޗިޓު ކެންސަލްކޮށްފި އެވެ.ޒާޔާ ފުލުހަށް ހާޒިރު ވާން އެންގީ އޭނާ ސޯޝަލްމީޑިއާގައި ކުރި ޕޯސްޓަކާ ގުޅިގެން ބަޔާން ނެގުމަށް ކަމަށް ބުނެ އެވެ. އޭނާއަށް އިއްޔެ ފުލުހުން ފޮނުވި ޗިޓުގައި ބުނެފައި ވަނީ މިއަދުގެ މެންދުރުފަހު 2:00 އަށް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންއަށް ހާޒިރުވުމަށެވެ.ނަމަވެސް، އެ މައްސަލައިގައި ބަޔާން ނެގުމަށް ފަހުގެ ތާރީހެއްގައި ފުލުހަށް ހާޒިރުވާން އަންގާނެ ކަމަށް ބުނެ ރޭގެ 8:20 ހާއިރު ފުލުހުން ވަނީ އޭނާއަށް ފޯނުން ގުޅައި ޗިޓު ކެންސަލްވިކަން އަންގައިފަ އެވެ.ސޯޝަލް މީޑިއާގައި ކުރި ޕޯސްޓާ ގުޅޭ މައްސަލައިގައި، ޒާޔާގެ ފޯނު މިދިޔަ އަހަރުގެ އޮކްޓޫބަރު ހަތެއްގައި ހިފެހެއްޓިއެވެ. އެއަށްފަހު ފޯނު ދޫކޮށްލީ އެ މަހު 12ގައެވެ.އޭރު ފޯނު ހިފަހައްޓާފައި ވަނިކޮށް، ސޯޝަލް މީޑިއާގައި ޒާޔާގެ ޒާތީ ވީޑިއޯތަކެއް ލީކުވި މައްސަލައެއް ވެސް ފެންމަތިވިއެވެ. އެ މައްސަލަ ކަމާ ބެހޭ އިދާރާތަކަށް ވަނީ ހުށަހަޅާފައެވެ.ފުލުހަށް ހާޒިރު ވާން އަންގައި ޒާޔާއަށް ފުލުހުން ޗިޓު ފޮނުވިއިރު، ހުޅުމާލެ އުތުރު ދާއިރާއަށް އެމްޑީޕީގެ ޓިކެޓުގައި ވާދަކުރާނެކަން އޭނާ ވަނީ މިފަހުން އިއުލާނުކޮށްފަ އެވެ.