އިންޑިއާގެ މަހާރާޝްތުރާ ސްޓޭޓްގެ ޑެޕިއުޓީ ޗީފް މިނިސްޓަރު އަޖިތު ޕަވާރް ދަތުރުކުރެއްވި މަތިންދާބޯޓު ވެއްޓި، އޭނާ އާއި އިތުރު ހަތަރު މީހަކު މިއަދު މަރުވެއްޖެ އެވެ.
ޑިރެކްޓަރޭޓް ޖެނެރަލް އޮފް ސިވިލް އެވިއޭޝަނުން ބުނި ގޮތުގައި، މުމްބާއީން ފުރައިގެން ދަތުރުކުރި މި މަތިންދާބޯޓު ވެއްޓިފައިވަނީ ޕަވާރްގެ އިންތިހާބީ ދާއިރާ ކަމަށްވާ ބަރާމަތީގެ އެއާޕޯޓަށް ޖައްސަން އުޅުމުގެ ތެރޭގަ އެވެ. މި ހާދިސާ ހިނގަން މެދުވެރިވި ސަބަބު ރަސްމީ އިދާރާތަކުން އަދި ހާމަކޮށްފައެއް ނުވެ އެވެ.
މި ހާދިސާގައި ޑެޕިއުޓީ ޗީފް މިނިސްޓަރުގެ އިތުރުން، އޭނާގެ އޮފީހުގެ ދެ މުވައްޒަފަކާއި ބޯޓުގެ ދެ ފަޅުވެރިން ވެސް ވަނީ މަރުވެފަ އެވެ. ހާދިސާ ހިނގި ސަރަހައްދުން ފެންނަ މަންޒަރުތަކުން ފެންނަނީ ބޯޓުގައި އަލިފާން ރޯވެ، ދުމުގެ ތެރޭގައި ވަރަށް ބޮޑަށް ހަލާކުވެފަ އެވެ.
މި ހަބަރާ ގުޅިގެން ބޮޑުވަޒީރު ނަރެންދުރަ މޯދީ ވަނީ 'އެކްސް' މެދުވެރިކޮށް ހިތާމަ ފާޅުކުރައްވާފަ އެވެ. މޯދީ ވަނީ އަޖިތު ޕަވާރް ގައުމަށް ކޮށްދެއްވި ހިދުމަތްތަކުގެ އަގު ވަޒަންކުރައްވައި ޝުކުރު އަދާކުރައްވާފަ އެވެ.
އަޖިތު ޕަވާރަކީ އިންޑިއާގެ ސިޔާސީ މައިދާނުގެ އިސް ބޭފުޅެއް ކަމަށްވާ، ނޭޝަނަލިސްޓް ކޮންގްރެސް ޕާޓީ (އެންސީޕީ) އުފެއްދެވި ޝަރަދު ޕަވާރަށް ބޮޑުބޭބެ ވިދާޅުވާ ބޭފުޅެކެވެ.
މަހާރާޝްތުރާގެ ސިޔާސީ މަސްރަހުގައި ނުފޫޒު ގަދަ ޝަހްސިއްޔަތެއް ކަމަށްވާ އަޖިތު ޕަވާރް ވަނީ އެތައް ފަހަރަކު އެ ސްޓޭޓްގެ ޑެޕިއުޓީ ޗީފް މިނިސްޓަރުކަން ކުރައްވާފަ އެވެ.
މީގެ އަހަރުތަކެއް ކުރިން އޭނާ ވަނީ ބޮޑުބޭބެގެ ޕާޓީން ވަކިވެވަޑައިގެން، އަމިއްލަ ޕާޓީއެއް އުފައްދަވާފަ އެވެ. އިންޑިއާގެ އިލެކްޝަން ކޮމިޝަނުން ފަހުން ވަނީ އެންސީޕީގެ ރަސްމީ ނަމާއި ނިޝާން އޭނާގެ ޕާޓީއަށް ދީފަ އެވެ.
އަޖިތު ޕަވާރްގެ ޕާޓީއަކީ މަހާރާޝްތުރާގެ ވެރިކަން ކުރާ އިއްތިހާދުގައި ހިމެނޭ، ބޮޑުވަޒީރު މޯދީގެ ބީޖޭޕީއާ ގުޅިފައިވާ ޕާޓީއެކެވެ.