ދެކުނު ކޮރެއާގެ ކުރީގެ ފަސްޓް ލޭޑީ ކިމް ކިއޮން ހީގެ މައްޗަށް އުފުލާފައިވާ ރިޝްވަތުގެ މައްސަލަ ސާބިތުވެ، އޭނާގެ މައްޗަށް އެއް އަހަރާއި އަށް މަސް ދުވަހުގެ ޖަލު ހުކުމެއް އިއްވައިފިއެވެ. ދެކުނު ކޮރެއާގެ ރަސްމީ ނޫސް އެޖެންސީ ޔޮންހަޕް އިން ރިޕޯޓްކޮށްފައިވާ ގޮތުގައި ސޯލްގެ ސެންޓްރަލް ޑިސްޓްރިކްޓް ކޯޓުން ކިމްގެ މައްޗަށް މިއަދު ހުކުމް އިއްވާފައިވާއިރު، އޭނާގެ މައްޗަށް ދައުވާކޮށްފައިވާ އެހެން މައްސަލަތަކެއް ކަމަށްވާ ސްޓޮކް މެނިޕިއުލޭޝަން މައްސަލައާއި ސިޔާސީ ފަންޑުގެ ގާނޫނާ ޚިލާފުވުމުގެ މައްސަލަ ސާބިތުވާ ވަރަށް ހެކި ނެތުމުގެ ސަބަބުން ވަނީ ބޭރުކޮށްލާފައެވެ. ދެކުނު ކޮރެއާގެ ވެރިކަމުން ދުރުކުރި ކުރީގެ ރައީސް ޔޫން ސުކް ޔޮލްގެ ފުރަތަމަ އަނބިކަނބަލުން ކިމްއަށް ވިޔަފާރިވެރިންނާއި ސިޔާސީ ބޭފުޅުންގެ އިތުރުން ޔުނިފިކޭޝަން ޗާޗުން ގާތްގަޑަކަށް 200،000 ޑޮލަރުގެ ރިޝްވަތާއި އަގުބޮޑު ހަދިޔާ ލިބިފައިވާ ކަމަށް ބޭރުގެ ނޫސްތަކުން ރިޕޯޓުުކުރެއެވެ. އަގުބޮޑު ބްރޭންޑެއް ކަމަށްވާ ޝެނަލްގެ ދެ އަތްދަބަހާއި ޑައިމަންޑް ހާރެއް ހިމެނޭ ގޮތަށް ކިމްއަށް އަގުހުރި ތަކެތި ދިން ކަމަށް ޝައްކު ކުރެވޭތީ، ޕީޖީ ޓީމުން ވަނީ މިހާރު ޝަރީއަތް ހިންގާ ޔުނިފިކޭޝަން ޗާޗުގެ ލީޑަރު ހާން ހަކްޖާގެ މައްޗަށް ވެސް ދައުވާކޮށްފައެވެ. ކިމްގެ މައްޗަށް އުފުލި ރިޝްވަތުގެ މައްސަލަ ސާބިތުވެ 1 އަހަރާއި އަށް މަސް ދުވަހަށް ޖަލަށް ލާން ވަނީ ހުކުމްކޮށްފައި. ފޮޓޯ/ގެޓީ މިދިޔަ މަހު ބޭއްވި އެންމެ ފަހުގެ ޝަރީއަތުގައި ކިމް ވަނީ އޭނާގެ މައްޗަށް އުފުލާފައިވާ ހުރިހާ ދައުވާތަކެއް ދޮގުކޮށްފައެވެ. ހެކި ނައްތާލުމުގެ ފުރުސަތު އޮތް ކަމަށް ބުނެ މިދިޔަ އަހަރު އޮގަސްޓު މަހުން ފެށިގެން ކިމް ހުރީ ޖަލުގައި ބަންދުކޮށްފައެވެ. މި މައްސަލައިގެ ސަބަބުން 2024 ވަނަ އަހަރުގެ އޭޕްރީލް މަހު ބޭއްވި އާންމު އިންތިހާބުގައި ޔޫންގެ ޕާޓީއަށް ވަނީ ބޮޑު ނާކާމިޔާބީއެއް ލިބިފައެވެ. ޖިނާއީ ތުހުމަތުތަކުގެ އިތުރުން ކިމްއަށް ވަނީ އެހެން މައްސަލަތަކެއް ވެސް ކުރިމަތިވެފައެވެ. އެގޮތުން 1999 ވަނަ އަހަރު އާޓް އިންސްޓްރަކްޝަންގެ ދާއިރާއިން މާސްޓާސް ޑިގްރީ ހާސިލް ކުރި ކިމްގެ މާސްޓާސް ތީސީސް އަކީ ވަގަށް ނަގާފައިވާ ތީސީސްއެއްކަން ސާބިތުވެ ސޫކްމިޔުންގް ވިމެންސް ޔުނިވާސިޓީން މިދިޔަ އަހަރު ވަނީ ކިމްގެ ޑިގްރީ ސެޓްފިކެޓް ބާތިލުކޮށްފައެވެ. ކިމްއަށް ހުކުމް އިއްވާފައިވަނީ ފިރިކަލުން ޔޫންގެ މަދަނީ ވެރިކަން ސަސްޕެންޑް ކުރުމަށް އެހީތެރިވެދީ އެއްބާރުލުން ދިން ކަމަށް ބުނެ ކުރީގެ ބޮޑުވަޒީރު ހާން ޑަކް ސޫ 23 އަހަރަށް ޖަލަށް ލުމަށް ހުކުމް ކުރިތާ ދުވަސްކޮޅެއް ފަހުންނެވެ. ޔޫން ޖަލުގައި ބަންދުކޮށްފައި ވަނީ 2024 ވަނަ އަހަރު ގާނޫނުއަސާސީ ސަސްޕެންޑްކޮށް އަސްކަރީ ގާނޫނު ހިންގަން ކުރަން ކުރި މަސައްކަތް ނާކާމިޔާބުވެ، ސިޔާސީ ގޮތުން ބޮޑެތި ހަމަނުޖެހުންތަކެއް އުފެދި، މަގާމުން ދުރުކުރުމަށް ފަހުގައެވެ.