ތައުލީމީ ހަޔާތް ދަރިވަރުން ފަށަނީ ބޮޑެތި އުންމީދުތަކާ އެކީީގައެވެ. އެ އުންމީދުތަކުގައި ކުލަ ޖައްސަން ކުރަން ޖެހެނީ، އެކި ފަހަރަށް އެކި ކަންކަމެވެ. ފުރާވަރު ނުވަތަ ސާނަވީ ތައުލީމަށް ފެށުމުން ކާމިޔާބު ދަރިވަރުންނަށް ވުމުގެ އުންމީދު އާކުރެއެވެ. އެ މަރުހަލާގައި އެ ފޮނި އުންމީދުގައި ކުލަ ޖައްސަން އެތައް އުނދަގޫތަކާއި ހުރަސްތައް ކަޑަތު ކުރަން ޖެހެއެވެ. ދުވަހުގެ ތާވަލުގައި ވެސް އެތައް ކަމެއް ކުރަން ޖެހެއެވެ. ފިލާވަޅުތައް ނިންމައި، ދަސްކުރުމެވެ. ޓިއުޝަން ކުލާހާއި އިތުރު ގަޑިތަކެވެ. މިހެން ގޮސް އެތައް ކަމެކެވެ. ގިނަ ފަހަރަށް ވަގުތު އޮންނަނީ މަދުވެފައެވެ. ޕްރޮފެސަރު އުގައިލް --- ސަން ފޮޓޯ/ ފަޔާޒް މޫސާ އާ ދިރާސީ އަހަރުގެ ކިޔެވުން އިއްޔެ ފަށާފައިވާއިރު އެކަމާ ގުޅުވައި, ޕްރޮފެސަރު ޙަސަން އުގައިލް މި ވަނީ ކާމިޔާބު ދަރިވަރަކަށް ވުމަށް ކުރާ އުންމީދުގައި ކުލަޖައްސާނެ ގޮތް ކިޔައިދެއްވާފައެވެ. އޭނާ ވިދާޅުވި ގޮތުގައި، ކޮންމެ ކުއްޖަކަށް ވެސް މޮޅު ނުވަތަ ކާމިޔާބު ދަރިވަރަކަށް ވެވިދާނެއެވެ. އެކަން ކުރުމުގައި ކުރަން ޖެހެނީ ފަސް ކަމެކެވެ. ފުރަތަމަ ކަމަކަށް، ސާފު ޕްލޭނެއް ދަރިވަރުން ގެންގުޅެން ޖެހެއެވެ. ސައިންސްގެ ރޮނގުން ޕްރޮފެސަރުކަން ހާސިލުކުރައްވާފައިވާ އުގައިލް ވިދާޅުވީ، ޕްލޭނަކާ އެކީ ކަންކަން ކުރާނަމަ، ވަގުތުގެ ބޭނުން ހެޔޮ ގޮތުގައި ހިފޭނެއެވެ. އެއީ، ކޮންމެ ގޮތަކަށް ޕްލޭން ރާވާފައި އޮތް ކަމަށް ވިޔަސްމެއެވެ. ލިޔެފައި ނުވަތަ ޚިޔާލުގައި ވިޔަސް ޕްލޭނެއް އޮތުމުން ދަރިވަރުން ކަން ކުރަންވީ ގޮތް ސާފު ވާނެ ކަމަށް އުގައިލް ކިޔައިދެއްވިއެވެ. ކޮންމެ ކަމެއްގައި ވެސް ކުރަން ބޭނުންނުވާ ކަންކަން ހުންނާނެއެވެ. އެ އުސޫލުން ދަރިވަރުން ވެސް ހަދަން ބޭނުންނުވާ ފިލާވަޅުތައް ހުރެދާނެއެވެ. ނުވަތަ އުނދަގޫ ކަންކަން ކުރަން ޖެހިދާނެއެވެ. އެކަމަކު، އެ ކަންކަން ވެސް ވަކި ތާރީޚަކަށް ނިންމަން ޖެހެއެވެ. އެހެންވެ، ބޭނުންނުވެ ހުރެ ވެސް ޖެހެނީ ކުރާށެވެ. އެ ފަދަ ހާލަތްތަކުގައި ގިނަ ފަހަރަށް އުނދަގޫ ވާނީ، އެ ކަމެއް ފެށުމަށެވެ. އުގެއިލް ކިޔައިދެއްވި ގޮތުގައި، އެ ދުވަހަކަށް ކަމެއް ނިންމަން ބޭނުންވާނަމަ، އެ ކަމެއް އެ ދުވަހަކު ކުރަން ވާނެއެވެ. އެހެންވެ، ބޮޑެތި ފިލާވަޅުތައް ނުވަތަ ކަންކަން ކުރާއިރު އެ ކަންކަން ބަހާލައިގެން ކުރަން އުގައިލް އިރުޝާދު ދެއްވިއެވެ. އޭރަށް ކުރަން ޖެހޭ މަސައްކަތް މަޑުމަޑުން ނަމަވެސް، ކޮށް ނިންމޭނެއެވެ. ދަރިވަރުންނަކީ ވެސް ދުވާލެއްގެ މައްޗަށް ގިނަ ކަންކަން ކުރާ ބަޔެކެވެ. ސުކޫލަށް ދަމުން، ކިޔަވަމުން, ފިލާވަޅުތައް ހަދަން ޖެހެއެވެ. އެ ދަސް ކުރުމަށް އިތުރު ދިރާސާތައް ހަދަން ޖެހެއެވެ. އެ ކަންކަމަށް ވަގުތު އޮންނަނީ މަދުވެފައެވެ. އެހެންވިޔަސް، ގިނަ ކަންތައްތަކެއް އެއް ފަހަރާ ކުރަން އުޅުމުން ނަތީޖާ ރަނގަޅުވާނީ މަދު ފަހަރެއްގައި ކަމަށް އުގައިލް ގަބޫލުކުރައްވައެވެ. ދަރިވަރުންތަކެއް: ކޮންމެ ދަރިވަރަކަށް ވެސް ކާމިޔާބު ދަރިވަރަކަށް ވެވިދާނެ -- ފޮޓޯ/ ސީއެޗްއެސްސީ އެހެންވެ، ދަރިވަރުން ސަމާލުކަން ދޭން ޖެހޭ ތިން ވަނަ ކަމަކަށް ވާން ޖެހޭނީ، ފަހަރަކު ކަމެއް ކުރުން ކަމަށް އުގައިލް ކިޔައިދެއްވިއެވެ. އޭރަށް، އެ ކުރާ ކަމަކަށް ވަދެވި، ރަނގަޅު މަސައްކަތެއް ކުރެވެއެވެ. ތައުލީމީ ހަޔާތުގައި ދިމާވާ ރައްޓެހިންނަކީ ވެސް ބޮޑު ދައުރެއް އަދާކުރާ ބަޔެކެވެ. އެކުގައި އެތައް ވަގުތެއް ހޭދަކުރާނެއެވެ. އެހެންވެ، ކާމިޔާބު ދަރިވަރަކަށް ވުމުގައި ރައްޓެހިން ވެސް ބޮޑު ދައުރެއް އަދާކުރާ ކަމަށް ޕްރޮފެސަރު އުގައިލް ވިދާޅުވިއެވެ. އެ ރައްޓެހިންނަކީ، ކިޔެވުމަށް ލޯބިކުރާ އަޚުލާގު ރަނގަޅު ކުދިންނަށް ވާން ޖެހެއެވެ. އެ ކަމުގެ ސަބަބުން، އަމިއްލައަށް ކިޔަވަން ހިތްޖެހުމަށް މަގުފަހިވާކަން އޭނާ ފާހަގަކުރެއްވިއެވެ. އެ ހުރިހާ ކަމެއްގެ ތެރެއިން ވެސް، ދަރިވަރުން ހަމަޖެހިގެން އުޅުމަށް ބޮޑު ސަމާލުކަމެއް ދޭން ޖެހެއެވެ. އުގެއިލް ވިދާޅުވި ގޮތުގައި، ވަގުތު ހުސްކުރަންވާނީ ހަމައެކަނި ކިޔެވުމަކަށް ނޫނެވެ. ހަމައަށް ނިދުމާއި ކެއުމާއި އެހެނިހެން ކަންކަން ވެސް ކުރަން ވާނެއެވެ. އޭރަށް ކިޔަވާ ހިތްވެ، އެ ކަމުގައި ކުރިއަރަން ފަސޭހަ ވާނެ ކަމަށް އުގައިލް ކިޔައިދެއްވިއެވެ. މި ކަންކަމަކީ، ކާމިޔާބު ދަރިވަރަކަށް ވުމުގައި ކަންކަން ކުރަންވީ ގޮތެވެ. އޭރުން ނަތީޖާ ފޮނިވެފައި ކާމިޔާބު ވާނެ ކަމަށް އުގައިލް ގަބޫލުކުރައްވައެވެ. ގިނަ ބައެއްގެ ލޯބި ހޯދާފައިވާ ޕްރޮފެސަރު އުގައިލަކީ ސައިންސްގެ ރޮނގުން ޕްރޮފެސަރުކަން ހާސިލްކުރެއްވި ފުރަތަމަ ދިވެއްސެވެ. މާލެއިން ތައުލީމު ހާސިލްކުރެއްވުމަށް ފަހު އިންގްލޭންޑު ފަދަ ގައުމުތަކުން އޭނަ ތައުލީމު ހާސިލް ކުރެއްވިއެވެ. އޭނާ ވަނީ ޓެކްނޮލޮޖީގެ ރޮނގުން ގިނަ އިލްމީ ފޮތްތަކެއް ވެސް ލިޔުއްވާފައެވެ.