ސޯޝަލް މީޑިއާގައި ފެތުރުނު އެއް ވީޑިއޯއަކުން ފެންނަނީ ފިރިހެނަކު އެ މަންޒަރު ބަލަމުން ކޮތަޅަކަށް ހޮޑުލާތަނެވެ. ތައިވާންގެ ވެރިރަށުގައި ހުންނަ އުސް އިމާރާތް 'ޓައިޕޭ 101'އަށް އެމެރިކާގެ އެލެކްސް ހޮނޯލްޑް އަރަމުން ދިޔައީ ރައްކާތެރިކަމުގެ އެއްވެސް ފިޔަވަޅެއް ނެތި އެވެ. ނެޓްފްލިކްސް އިން ވަގުތުން ދެއްކި އެވެ.
އިމާރާތުގެ އުސްމިނުގައި 508 މީޓަރު (1،667) ފޫޓު ހުރެ އެވެ. އެންމެ މަތީގައި ހުރި ޓަވަރުގެ މައްޗަށް އަރާ، ސެލްފީއެއް ކަނޑާލި އިރު އުމުރުން 40 އަހަރުގެ ހޮނޯލްޑްގެ ހަރަކާތަށް ހޭދަވީ އެންމެ ދޮޅު ގަޑިއިރެވެ.
އިންސާނަކު ވެއްޓި މަރުވުން ކައިރި މި އިވެންޓް ނެޓްފްލިކްސްއިން ވަގުތުން ދައްކަމުން ދިޔައީ 10 ސިކުންތު ލަސްކޮށެވެ. އެއީ ހޮނޯލްޑް ވެއްޓޭ ހާލަތެއްގައި އެ މަންޒަރު އާންމުކޮށް ނުދެއްކޭނެ ގޮތް ހަދާށެވެ.
ތިރީގައި މަންޒަރު ބަލަން އެއްވި އެތައް ހާސް ބަޔަކާއި ނެޓްފްލިކްސްއިން ވަގުތުން ބަލަމުން ދިޔަ އެތައް މިލިއަން ބަޔަކު ލޯ ހުއްޓާލައިގެން ތިބީ އަތަށް މޭގަނޑު ލައިގެންނޭ ވެސް ބުނެވިދާނެ އެވެ. ރަތް ކުލައިގެ ޓީޝާޓެއްގައި ހުރި ހޮނޯލްޑް، އިމާރާތުގެ އެއް އަރިމަތިން މަޑުމަޑުން މައްޗަށް އަރަމުން ދިޔަ އިރު، ބައެއް ހިސާބުތަކުގައި އޭނާ ހުއްޓި އެ ގެންނަ ހަރަކާތްތަކުން ވެސް ހީބިހި ނެގި އެވެ.
މިއީ 101 ބުރީގެ އިމާރާތެކެވެ. އެއްދުވަސްވަރެއްގައި ދުނިޔޭގެ އެންމެ އުސް އިމާރާތް ވެސް މެ އެވެ. މި އިމާރާތް ހަދާފައި ހުރީ ފުރަތަމަ 36 ބުރީގެ މައްޗަށް އަށް ބުރިން އަށް ބުރިން ވަކި ބައިތަކެއްގެ ގޮތަށެވެ. އޭގެ އިތުރުން ވަކި ހިސާބުތަކެއްގައި ހޮޅިތައް ހިމެނޭ ބަރިތަކެއް ވެސް ހުރެ އެވެ.
ހޮނޯލްޑްއަށް އެއިން އެއްވެސް ކަމެއް މާ ބުރަ، އުނދަގޫވެގެން އުޅޭ ތަނެއް ނުފެނެ އެވެ. ހޮޅިތައް ހުރަސްކުރުމުގެ ތެރޭގައި ދެ ފައިގެ ބާރުގައި މަޑުކޮށްލައި އިނދެ އެވެ. ދެން އަތުގެ ދާތައް ފޮހެލާފައި އަނެއްކާ ފަށަ އެވެ.
މަންޒަރު ބަލަން ތިބި މީހުން އާޝޯހުވެ، ބައެއް ފަހަރަށް ބިރުން އަނގަމަތީގައި އަތް އެޅެ އެވެ. އެހާ ވެސް ހޮނޯލްޑްގެ މި ހަރަކާތުގައި އެކުލެވިގެން ވީ ބިރުވެރިކަން ބޮޑެވެ.
އިމާރާތުގެ އެންމެ މަތީގައި ހުރި ވައް ކުޑަކުޑަ ގުއްބުގެ މައްޗަށް އަރައި، ސެލްފީއެއް ނަގާ މަންޒަރުން ވެސް އެތައް ބައެއްގެ ގައިން ހީބިހި ނަގާނެ އެވެ. އެހާ އުސް ތަނެއްގެ އެހާ ކުޑަކުޑަ ތަންކޮޅެއްގައި، ބާރަށް ވައި ވެސް ޖެހެމުން ދިޔަ ވަގުތެއްގައި، ހުރުމަކީ އާދައިގެ މަންޒަރެއް ނޫނެވެ.
އެކަމަކު ހޮނޯލްޑްއަކީ އާދައިގެ އިންސާނެއް ވެސް ނުމެނޫންމެ އެވެ. ވަލެއް އަދި ސަލާމަތީ އެއްވެސް އެހެން އެއްޗެއް ނެތި އެމެރިކާގެ އެލް ކެޕްޓަން ފަރުބަދައަށް އޭނާ އަރާތަން ނެގި ޑޮކިއުމެންޓްރީއަށް 2019ގެ އޮސްކާ އެވޯޑް ވެސް ލިބުނެވެ. އެއީ 900 މީޓަރު، (3،000 ފޫޓު)ގެ އުސް ފަރުބަދައެކެވެ.
ހޮނޯލްޑްގެ ސިކުނޑީގެ ޓެސްޓްތަކުން ދައްކާ ގޮތުގައި ބިރުގަތުމުގެ ބައެއް އޭނާގެ ނެތެވެ. އޭނާގެ ސިކުނޑީގައި ބިރުގެ އިހުސާސް އުފެދެނީ، އާންމު އިންސާނުންނާ ހިލާފަށް، ވަރަށް ކުޑަ މިންވަރަކަށެވެ.
އެލް ކެޕްޓަންއާ ހިލާފަށް ޓައިޕޭ 101އަށް އޭނާ އެެރީ ވަގުތުން ލައިވްކުރަމުން ދިޔަ އިވެންޓެއްގަ އެވެ. އެހެންކަމުން ނެޓްފްލިކްސްއިން އޭނާއަށް ވަރަށް ބޮޑު ފީއެއް ދޭނެ ކަމަށް އެތައް ބަޔަކު ގަބޫލުކުރިއެވެ. އެކަމަކު އިމާރާތަށް އެރުމުގެ ކުރިން 'ނިއު ޔޯކް ޓައިމްސް'އަށް ދިން އިންޓަވިއުއެއްގައި ހޮނޯލްޑް ބުނީ އޭނާއަށް ލިބޭ އަގަކީ، އެހެން ކުޅިވަރުތަކަށް ބަލާ ނަމަ، 'ލަދުގަންނަ ވަރު'ގެ އެއްޗެއް ކަމަށެވެ. އޭނާގެ ގާތް ބައެއް މީހުން ފަހުން ބުނި ގޮތުގައި އެއީ ހަ އަދަދުގެ މިންވަރެކެވެ. މާނައަކީ މިލިއަން ޑޮލަރަށް ނާރަ އެވެ.
އެކަނިމާއެކަނި ފަރުބަދައަށް އެރުމުގެ ލޯބި ބޮޑު ހޮނޯލްޑް، މިދިއަ އާދިއްތަދުވަހުގެ އިވެންޓަށް ނުކުތް އިރު، ޒުވާން އިރާ ހިލާފަށް އޭނާގެ އަންބަކާއި ހަތަރު އަހަރުން ދަށުގެ ދެ އަންހެން ދަރިން ވެސް ތިބެ އެވެ. އެހެންކަމުން އެމީހުންނާ މެދު ނުވިސްނަންތޯ އޭނާއާ ސުވާލުކުރި އެވެ. ޖަވާބުގައި ބުނީ ވިސްނާ ކަމަށެވެ. ނަމަވެސް ޓައިޕޭ 101 އިމާރާތަށް އަރަން ލިބުނު ފުރުސަތު ދޫކޮށްލެވެން ނެތް ކަމަށް ބުންޏެވެ.
"އަހަންނަށް އެކަން ކުރެވޭނެކަމުގެ ޔަގީންކަން އެބަ އޮތް،" އޭރު އޭނާ ޖަވާބު ދިނެވެ.