މާލެ ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ) ގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދު މަޤާމުން ސަސްޕެންޑްކޮށްފިއެވެ.
މިއަދު އެމްޑަބްލިއުއެސްސީން ބުނެފައިވަނީ، ފަޒީލް ސަސްޕެންޑްކޮށްފައިވަނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާ ގުޅޭގޮތުން ދިވެހި ފުލުހުންގެ ޚިދުމަތުން ކުރިއަށްގެންދާ ތަޙުޤީޤަށް ޖާގަދީ ފުރިހަމައަށް އެހީތެރިވުމުގެ ގޮތުން ކަމަށާއި އަދި މިއަދުން ފެށިގެން ހުރިހާ ޒިންމާތަކަކުން އެކަހެރިކޮށްފައިވާކަމަށެވެ.ފަޒީލްއަކީ އެޗްޑީސީގެ މެނޭޖިން ޑިރެކްޓަރު ފަޟުލް ރަޝީދުގެ ބޭބެއެވެ. އެޗްޑީސީން ގޯތި ދޫކުރުމުގައި ކޮރަޕްޝަން ހިމެނޭކަމަށް ތުހުމަތުކުރެވޭތީ ފަޟުލް އާއެކު އެޗްޑީސީ ބޯޑުގެ މެންބަރުން ވަނީ މިހާރު ސަސްޕެންޑްކުރެވިފައެވެ.
ފުލުހުންގެ ތަޙުޤީޤު އަމާޒުވެފައިވަނީ ލިޔެކިޔުންތަކެއް ފޯޖުކޮށްފައިވާކަމުގެ ތުހުމަތަށް ކަމަށް ވެސް މަޢުލޫމާތު ލިބެއެވެ. މި މައްސަލައިގައި އިތުރު ތަފްސީލެއް އަދި ހާމަކޮށްފައެއް ނުވެއެވެ.